தமிழக பாஜக தலைவர் நயினார் நாகேந்திரன், தமிழ்நாடு மின் பகிர்மானக் கழகம் உயர் அழுத்தத் தொழில் நிறுவனங்களுக்கு இரவு நேரங்களில் மின்சாரத்தைப் பயன்படுத்தாமல் சொந்த ஜெனரேட்டர்களை இயக்க அறிவுறுத்தியதை வன்மையாகக் கண்டித்துள்ளார். இது தொழில் துறையைப் பெரும் நெருக்கடிக்குத் தள்ளும் நடவடிக்கை என அவர் குறிப்பிட்டார்.புதிய ஆட்சி சிறந்த நிர்வாகத்தைக் கொண்டுவருவதாக வாக்குறுதி அளித்த தவெக அரசால் மின் பற்றாக்குறையைக்கூட சமாளிக்க முடியவில்லை என நயினார் நாகேந்திரன் சுட்டிக்காட்டினார்.

முன்கூட்டிய திட்டமிடல் இல்லாமல் தமிழகத்தைத் தொழில் முடக்கத்திற்கும் அறிவிக்கப்படாத மின்வெட்டுக்கும் தள்ளிவிட்டதே இந்த அரசின் நிர்வாகத் தோல்விக்கு அப்பட்டமான சான்று என அவர் தெரிவித்தார்.மின்சார வாரியத்தின் மின்சாரம் யூனிட்டுக்கு ஏழு ரூபாய் என்ற நிலையில், டீசல் ஜெனரேட்டர்களைப் பயன்படுத்தும்போது உற்பத்திச் செலவு யூனிட்டுக்கு பதினாறு முதல் முப்பது ரூபாய் வரை உயரும். இதனால் தொழிற்துறை பெரும் நஷ்டத்தைச் சந்திக்கும் அபாயம் ஏற்பட்டுள்ளது.

குறிப்பாக கோவை, திருப்பூர் உள்ளிட்ட முக்கியத் தொழில் நகரங்களில் இயங்கும் வார்ப்பகங்கள் மற்றும் பஞ்சாலைகளின் இயக்கம் கடுமையாகப் பாதிக்கப்பட்டுள்ளது. இதனால் லட்சக்கணக்கான தொழிலாளர்களின் வேலைவாய்ப்பும் கேள்விக்குறியாகியுள்ளதாக அவர் எச்சரித்தார்.தொழில்முனைவோருக்குத் துணை நிற்காமல் அவர்கள் தலையிலேயே கூடுதல் நிதிச் சுமையை ஏற்றுவது எவ்வகையிலும் நியாயமற்றது என நயினார் நாகேந்திரன் வலியுறுத்தினார்.

இதையும் படிங்க: அமித் ஷா பங்கேற்கும் பொதுக்கூட்டத்துக்கு வெடிகுண்டு மிரட்டல்!! ஜலந்தரில் உச்சக்கட்ட பாதுகாப்பு!

தவெக அரசு மெத்தனப் போக்கைக் கைவிட்டு மாற்று வழிகளில் மின்சாரத்தை உடனடியாகக் கொள்முதல் செய்ய வேண்டும். தொழிற்சாலைகளுக்கு இருபத்து நான்கு மணி நேரமும் தடையற்ற, சீரான மின்சாரம் கிடைப்பதை உறுதிசெய்து, தொழில்துறையினரின் நலனையும் தொழிலாளர்களின் வாழ்வாதாரத்தையும் காக்க அரசு போர்க்கால அடிப்படையில் துரித நடவடிக்கை எடுக்க வேண்டும் என அவர் கோரிக்கை விடுத்தார்.

இதையும் படிங்க: ரேஷன் கார்டுக்கு செக்! 6 மாதமாக பொருள் வாங்காதவர்களின் கார்டு நாளை முதல் முடக்கம்!