சென்னை அரும்பாக்கம் ராதாகிருஷ்ணன் சாலை பகுதியைச் சேர்ந்த சிவா என்பவர், அமைந்தகரை கலெக்டர் காலனி ரெட்டி தெருவில் சொந்தமாகப் பால்கடை நடத்தி வருகிறார்.

இந்த நிலையில், நேற்று மாலை அவரது கடைக்கு பெண் ஒருவர் பால் வாங்க வந்துள்ளார். பொருட்களை வாங்கிய அந்தப் பெண், கடைக்காரரிடம் 500 ரூபாய் நோட்டை கொடுத்து, மீதித்தொகையைத் தருமாறு கேட்டுள்ளார்.

அப்போது, அந்தப் பெண் கொடுத்த 500 ரூபாய் நோட்டின் மீது கடைக்காரர் சிவாவுக்கு சந்தேகம் ஏற்பட்டுள்ளது. அந்த நோட்டு கள்ளநோட்டாக இருக்கலாம் என சந்தேகமடைந்த அவர், உடனடியாக அமைந்தகரை காவல்துறையினருக்கு தகவல் தெரிவித்துள்ளார்.

இதையும் படிங்க: பெயர் மாற்றும் ஆர்வம் நிதி ஒதுக்கீட்டில் இல்லை... நியாயமா CM..? வெளுத்துவிட்ட அன்பில் மகேஷ்..!!

தகவலின் பேரில் சம்பவ இடத்திற்கு வந்த அமைந்தகரை போலீசார், அந்தப் பெண்ணிடம் விசாரணை மேற்கொண்டனர். அப்போது அவரிடம் மேலும் இரண்டு 500 ரூபாய் கள்ளநோட்டுகள் இருந்தது தெரியவந்தது.

இதையடுத்து, அந்தப் பெண்ணின் வீட்டிற்குச் சென்று போலீசார் சோதனை மேற்கொண்டனர். அப்போது அவரது வீட்டில் 42,500 ரூபாய் மதிப்பிலான கள்ளநோட்டுகள் இருப்பது கண்டுபிடிக்கப்பட்டதாக போலீசார் தெரிவித்துள்ளனர். மேலும், 79 ரூபாய் அளவிற்கு உண்மையான ரூபாய் நோட்டுகளும் இருந்ததாக கூறப்படுகிறது.

இதையடுத்து அந்தப் பெண்ணை போலீசார் கைது செய்து விசாரணை மேற்கொண்டனர். விசாரணையில், அவர் அமைந்தகரையைச் சேர்ந்த அலமேலு என்பதும், அவருக்கு 46 வயது என்பதும் தெரியவந்துள்ளது. இவர் அமைந்தகரை பகுதியில் வீட்டு வேலை செய்து வருவதும் தெரியவந்துள்ளது.

மேலும், இந்த கள்ளநோட்டுகளை அப்பகுதியில் உள்ள தெருக்களில் இருக்கும் குப்பைத்தொட்டிகளில் இருந்து எடுத்ததாக அலமேலு போலீசாரிடம் தெரிவித்ததாக கூறப்படுகிறது.

தொடர்ந்து போலீசார் தீவிர விசாரணை மேற்கொண்டு வருகின்றனர். இந்த சம்பவத்தில் கள்ளநோட்டு கும்பலுக்கு தொடர்பு உள்ளதா அல்லது உண்மையிலேயே குப்பைத்தொட்டிகளில் இருந்து கள்ளநோட்டுகளை எடுத்தாரா என்பது குறித்து பல்வேறு கோணங்களில் விசாரணை நடைபெற்று வருகிறது.

மேலும், இதற்குப் பின்னால் கள்ளநோட்டு கும்பல் ஏதேனும் செயல்படுகிறதா என்ற கோணத்திலும் போலீசார் அலமேலுவிடம் தொடர்ந்து விசாரணை நடத்தி வருகின்றனர்.

இதையும் படிங்க: நீங்கா நினைவில்..!! மறைந்த தமிழறிஞர் சாலமன் பாப்பையாவுக்கு அரசு மரியாதை... தமிழ்நாடு அரசு அறிவிப்பு..!!