வங்கக் கடலில் தீவிரமடைந்து நெருங்கி வரும் ‘மோந்தா’ புயலின் எதிரொலியாக, ஆந்திரப் பிரதேசத்திலிருந்து சென்னை வரும் பல்வேறு விமானங்கள் ரத்து செய்யப்பட்டுள்ளன. இந்திய வானிலை ஆய்வு மையம் (IMD) விடுத்த எச்சரிக்கைகளின் காரணமாக, சென்னை விமான நிலையத்தில் பாதுகாப்பு நடவடிக்கையாக இத்தகவல் எடுக்கப்பட்டுள்ளது. புயலின் தாக்கம் ஆந்திராவின் காக்கிநாடா அருகே இன்று மாலை அல்லது இன்று இரவு கரையைக் கடக்கும் என எதிர்பார்க்கப்படும் நிலையில், தமிழ்நாட்டின் வடகடலோரப் பகுதிகளிலும் கனமழை பெய்கிறது.

மோந்தா புயல் தற்போது சென்னையிலிருந்து சுமார் 480 கி.மீ. தொலைவில் கிழக்கு-தென்கிழக்கு திசையில் நிலை கொண்டுள்ளது. கடந்த 6 மணி நேரத்தில் மணிக்கு 13-15 கி.மீ. வேகத்தில் வடமேற்கு நோக்கி நகர்ந்து வரும் இப்புயல், தீவிர புயலாக வலுவடையும் என வானிலை ஆய்வு மையம் தெரிவித்துள்ளது. ஆந்திராவின் மசூலிப்பட்டினம் முதல் கலிங்கப்பட்டினம் வரையிலான 100 கி.மீ. கடற்கரைப் பகுதியில் மணிக்கு 90-110 கி.மீ. வேகத்தில் காற்று வீசும்.

இதையும் படிங்க: ஆந்திராவை நெருங்கும் ஆபத்து... பேயாட்டம் போடும் மோந்தா புயல்... 70 ரயில்கள் ரத்து...!

இந்நிலையில், மோந்தா புயல் காரணமாக ஆந்திராவில் இருந்து சென்னைக்கு வரும் 6 விமானங்கள் இன்று ரத்து செய்யப்பட்டுள்ளன. அதேபோல் சென்னையில் இருந்து ஆந்திரா செல்லும் 3 விமானங்கள் ரத்து செய்யப்பட்டுள்ளன. குறிப்பாக விஜயவாடா, விசாகப்பட்டினம் போன்ற நகரங்களிலிருந்து சென்னைக்கு வரும் விமானங்கள் பெரும்பாலும் ரத்து செய்யப்பட்டுள்ளன. இதனால் ஏர் இந்தியா, இண்டிகோ, ஸ்பைஸ்ஜெட் போன்ற நிறுவனங்களின் சேவைகள் பாதிக்கப்பட்டுள்ளன. பயணிகள் எண்ணிக்கை குறைவு மற்றும் பாதுகாப்பு கருதி இந்த முடிவு எடுக்கப்பட்டதாக விமான நிலையம் அறிவித்துள்ளது. இருப்பினும் டிக்கெட் முன்பதிவு செய்த பயணிகள் மிகுந்த ஏமாற்றமடைந்துள்ளனர்.

“புயல் காரணமாக ஓடுதளத்தில் மழைநீர் தேங்கியுள்ளதால், பராமரிப்புப் பணிகள் நடைபெறுகின்றன,” என விமான நிலைய அதிகாரி ஒருவர் தெரிவித்தார். சென்னை உள்ளிட்ட 10 மாவட்டங்களுக்கு IMD விடுத்துள்ள ஆரஞ்சு மற்றும் மஞ்சள் எச்சரிக்கைகள் பரவலான கவலையை ஏற்படுத்தியுள்ளன. புயல் காரணமாக சென்னை, திருவள்ளூர் உள்ளிட்ட மாவட்டங்களில் மிதமானது முதல் கனமழை பெய்யும் என்பதால், பள்ளி, கல்லூரிகளுக்கு விடுமுறை அறிவிக்கப்பட்டுள்ளது.

சென்னை புறநகரில் விடிய விடிய 12 செ.மீ. மழை பதிவாகியுள்ளது. போக்குவரத்து பாதிப்புகளும் ஏற்பட்டுள்ளன; 50-க்கும் மேற்பட்ட மரங்கள், கிளைகள் விழுந்து, சாலைகளைத் தடுத்துள்ளன. மின்சார கம்பங்கள் சாய்ந்து, சில பகுதிகளில் மின்கசிவு ஏற்பட்டுள்ளது. ஆந்திர அரசு முழு அளவில் தயாராக உள்ளது. புயல் பாதிப்பு பகுதிகளிலிருந்து ஆயிரக்கணக்கான மக்கள் பாதுகாப்பான இடங்களுக்கு இடம்பெயர்க்கப்பட்டுள்ளனர்.

தமிழ்நாடு பேரிடர் மேலாண்மை அமைச்சகம், NDRF குழுக்களை நிலைநிறுத்தியுள்ளது. பயணிகள் விமான நிலைய இணையதளங்கள் அல்லது ஆப் மூலம் புதுப்பிப்புகளைப் பின்தொடருமாறு அறிவுறுத்தப்பட்டுள்ளனர். புயலின் தாக்கம் குறைந்தவுடன் சேவைகள் மீண்டும் தொடரும் என எதிர்பார்க்கப்படுகிறது. இப்போது பயணத் திட்டங்களை மாற்றியமைக்க பயணிகள் அலர்ட்டாக இருக்க வேண்டும்.

இதையும் படிங்க: High Alert... ஆந்திராவில் ஆட்டத்தை ஆரம்பித்த “மோந்தா” புயல்.... கதிகலங்கும் கடலோர மாவட்டங்கள்...!