தமிழக அரசியலில் நடிகர் தனுஷ் குறித்த ஊகங்கள் அதிகரித்து வரும் நிலையில், தமிழக வெற்றிக் கழக (தவெக) அரசின் நிதியமைச்சர் மரிய வில்சன் இன்று தெளிவான நிலைப்பாட்டை கூறியுள்ளார். தனுஷின் அரசியல் பயணம் எந்தவித திருப்புமுனையாகவும் அமையாது என்றும், அவரால் ஒருபோதும் முதலமைச்சர் விஜயுடன் போட்டி போட முடியாது என்றும் அவர் வலியுறுத்தினார். “எப்போதும் முதல்வர் விஜய் தான்” என்று உறுதியாகக் கூறிய மரிய வில்சன், யார் வேண்டுமானாலும் கட்சி தொடங்கலாம் என்றாலும் தவெகவுக்கு திமுக அல்லது அதிமுகவிடமிருந்து கூட போட்டி இல்லை எனக் குறிப்பிட்டார்.

சமீப காலமாக தனுஷ் தனது ரசிகர் மன்றங்களை நற்பணி இயக்கமாக மாற்றி, தொகுதி வாரியாக நிர்வாகிகளை நியமித்து உறுப்பினர் சேர்க்கையை தீவிரப்படுத்தி வருகிறார். கோவையில் நடைபெற்ற கூட்டத்தில் புதிய இலச்சினையும் வெளியிடப்பட்டது. இதையடுத்து அவர் டெல்லிக்கு அவசரப் பயணம் மேற்கொண்டு முக்கிய அரசியல்வாதிகளை சந்தித்ததாகவும், தேர்தல் ஆணையத்தில் கட்சிப் பதிவு தொடர்பான ஊகங்களும் பரவியுள்ளன.

இதனிடையே அதிமுக முன்னாள் அமைச்சர் கே.டி. ராஜேந்திர பாலாஜி, தனுஷ் கட்சியில் இணைந்தால் இரு கைகளாலும் வரவேற்போம் என அழைப்பு விடுத்துள்ளார். இரு தரப்பினரும் இதுகுறித்து அமைதி காத்து வருகின்றனர்.

இதையும் படிங்க: தமிழகத்தில் ஏப்ரலில் உள்ளாட்சித் தேர்தல்? ஒரே கட்டமாக நடத்த முதல்வர் விஜய் அதிரடி திட்டம்!!

இந்தப் பின்னணியில் பேசிய மரிய வில்சன், தனுஷ் தனக்கு நீண்டகால நண்பர் என்றும், அவருடைய முடிவு சரியா தவறா என்பது வரும் நாட்களில் தெரியும் என்றும் தெரிவித்தார். 2026 சட்டமன்றத் தேர்தலில் கூட்டணி அமைத்தும் தவெகவை வீழ்த்த முடியவில்லை என்பதை நினைவுகூர்ந்த அவர், இப்போது ஒரு நட்சத்திர நடிகரை வைத்து புதிய கணக்கு போடுவது பலனளிக்காது என்றார்.

1991, 1996, 1999 தேர்தல்கள் உள்ளிட்ட கடந்த அனுபவங்களைச் சுட்டிக்காட்டிய அவர், மக்கள் தெளிவாக இருக்கிறார்கள் என்றும், காலம் ஏற்கனவே பதில் சொல்லிவிட்டது என்றும் வலியுறுத்தினார். விஜயின் ஊழலற்ற ஆட்சி நிலைப்பாடே போதுமானது எனவும் அவர் கூறினார்.

தவெக ஆட்சியில் நிதியமைச்சராகப் பொறுப்பேற்றுள்ள மரிய வில்சன், ஜேப்பியார் கல்விக் குழுமத்தின் மருமகன் என்பது குறிப்பிடத்தக்கது. அவரது இந்த பேச்சு, தனுஷின் அரசியல் வருகை குறித்த விவாதங்களை மேலும் தீவிரப்படுத்தியுள்ளது.

இதையும் படிங்க: வெற்றித் தமிழகத்தைப் படைப்போம்: ஆயுதபூஜை, விஜயதசமிக்கு முதல்வர் விஜய் வாழ்த்து!