சாத்தான்குளம் அருகே நடைபெற்ற கொடூரமான படுகொலை சம்பவம் குறித்து திமுக நாடாளுமன்ற உறுப்பினர் கனிமொழி கடுமையாக கண்டனம் தெரிவித்துள்ளார். சாத்தான்குளம் அருகே உள்ள வீட்டிற்குள் புகுந்து மேரி விஜீலா என்ற பெண் வெட்டிக் கொல்லப்பட்டதாகவும், அவரது இரண்டு பெண் குழந்தைகள் கடத்தப்பட்டதாகவும், அவரின் கணவரும் மகனும் படுகாயமடைந்ததாகவும் தகவல்கள் வெளியாகியுள்ளன. இந்த சம்பவம் தமிழகத்தில் பெண்கள் மற்றும் குழந்தைகளின் பாதுகாப்பு குறித்த கவலையை மீண்டும் எழுப்பியுள்ளது.

இந்த கொடூரமான நிகழ்வு குறித்து பேசிய கனிமொழி, “பெண்களுக்கும் குழந்தைகளுக்கும் வீட்டிலும் பாதுகாப்பில்லை, பொது வெளியிலும் பாதுகாப்பில்லை எனும் அளவிற்கு ஓர் அசாதாரணச் சூழலுக்குள் தமிழ்நாட்டைத் தள்ளியிருக்கிறது பொறுப்பற்ற தவெக அரசு” என்று கூறியுள்ளார். பெண்களுக்கு எதிரான வன்முறைகள் அன்றாடச் செய்தியாக மாறி வரும் நிலையில், அவற்றைத் தடுக்க அரசு என்ன நடவடிக்கை எடுத்து வருகிறது என்று அவர் கேள்வி எழுப்பியுள்ளார்.

“பெண்களுக்கு எதிரான வன்முறைகள் அன்றாடச் செய்தியாகிக் கொண்டிருக்கும் போது, அவற்றைத் தடுக்காமல் என்ன செய்துகொண்டிருக்கிறது ரீல்ஸ் அரசின் சினிமாத்தனமான அதிரடிப்படை?” என்று கேள்வி எழுப்பிய கனிமொழி, தங்களுக்கு வாக்களித்த பெண்களின் பாதுகாப்புக்கு வேட்டு வைப்பதுதான் தவெக அரசு அவர்களுக்குத் தரும் பரிசா என்றும் கடுமையாக விமர்சித்துள்ளார்.பெண்கள் மற்றும் குழந்தைகளின் பாதுகாப்பை உறுதி செய்வதில் அரசு தோல்வியடைந்துள்ளதாக அவர் குற்றம்சாட்டியுள்ளார்.

இதையும் படிங்க: அரசு கொடுத்த சந்தனக் கட்டைகள்.! ஏற்க மறுத்த நாகூர் தர்கா நிர்வாகம்..! அரசியல் தலையிடா.? வெடிக்கும் சர்ச்சை..!!

இதுபோன்ற சம்பவங்கள் தொடர்ந்து நடைபெறுவது சமூகத்தில் அச்சத்தை ஏற்படுத்துவதோடு, மக்களின் நம்பிக்கையைக் குலைப்பதாகவும் அவர் சுட்டிக்காட்டியுள்ளார். குற்றவாளிகளை உடனடியாகக் கைது செய்து, நீதியை நிலைநாட்ட வேண்டும் என்றும், பாதிக்கப்பட்ட குடும்பத்திற்கு உரிய பாதுகாப்பு மற்றும் உதவி வழங்கப்பட வேண்டும் என்றும் அவர் வலியுறுத்தியுள்ளார்.தமிழகத்தில் பெண்களுக்கு எதிரான குற்றங்கள் அதிகரித்து வரும் நிலையில், அரசு உடனடி மற்றும் பயனுள்ள நடவடிக்கைகளை மேற்கொள்ள வேண்டும் என்று கனிமொழி கோரியுள்ளார். இந்த சம்பவம் குறித்து போலீசார் விசாரணை நடத்தி வருகின்றனர்.

இதையும் படிங்க: வடகிழக்கு பருவமழை..!! தடையற்ற மருத்துவ சேவை..! முதல்வர் விஜயின் கறார் உத்தரவு..!!