தமிழக நகராட்சி நிர்வாகம் மற்றும் குடிநீர் வாரியத்தில் (TWAD) 2,538 பணி நியமனங்களில் நடந்த மொத்த ஊழலும், 10 ரூபாய் நோட்டை மையமாக வைத்தே நடந்துள்ளது என அமலாக்கத்துறை (ED) அதிகாரிகள் அதிரவைக்கும் தகவலை வெளியிட்டுள்ளனர். 

அமைச்சர் கே.என். நேருவின் தம்பி ரவிச்சந்திரன், மற்றொரு தம்பி மணிவண்ணன் மற்றும் அவர்களின் உதவியாளர்கள் ரமேஷ், செல்வமணி, கவி பிரசாத் ஆகியோர் மூலம், பதவிக்கு ஏற்ப 25 முதல் 35 லட்சம் ரூபாய் வரை வசூல் செய்யப்பட்டுள்ளது. இதற்கான ஆவணங்கள், வாட்ஸ்அப் செய்திகள், 10 ரூபாய் நோட்டின் படங்கள் ஆகியவை ED சோதனையில் பறிமுதல் செய்யப்பட்டுள்ளன. இந்த ஊழல் விவகாரத்தில் தமிழக போலீஸ் FIR பதிவு செய்ய ED கடிதம் அனுப்பியுள்ளது.

திமுக அமைச்சர் கே.என். நேரு வசம் உள்ள நகராட்சி நிர்வாகம் மற்றும் குடிநீர் வழங்கல் துறையில், இளநிலை பொறியாளர்கள், உதவி பொறியாளர்கள், நகரமைப்பு திட்டமிடல் அதிகாரிகள், மண் பரிசோதனை ஆய்வாளர்கள் என 2,538 பேருக்கு பணி நியமனம் செய்யப்பட்டது. 

இதையும் படிங்க: அமைச்சர் நேரு வீட்டில் அள்ளியது என்னென்ன?! புட்டு புட்டு வைத்த ED! முழு தகவல் அறிக்கை!!

இதில் பெரும் முறைகேடு நடந்துள்ளது. விண்ணப்பதாரர்கள் ரவிச்சந்திரன், மணிவண்ணன் ஆகியோரை அணுகி, பணம் கொடுத்து பணி பெற்றுள்ளனர். ED சோதனையில், ரவிச்சந்திரன் வீட்டில் இருந்து 150 விண்ணப்பதாரர்களின் பட்டியல் பறிமுதல் செய்யப்பட்டது. அதில், பணம் வசூல் செய்ததை குறிக்கும் 'குறியீடுகள்' எழுதப்பட்டிருந்தன.

தேர்வு முடிவுகள் வெளியாவதற்கு முன்பே, ரவிச்சந்திரனின் உதவியாளர் செல்வமணி வாட்ஸ்அப்பில் "நீங்கள் தேர்ச்சி பெற்றுவிட்டீர்கள், பணி ஆணை உறுதி" என செய்தி அனுப்பியுள்ளார். பல விண்ணப்பதாரர்கள் "நன்றி ஐயா" என பதில் அனுப்பியுள்ளனர். 

குறைந்த மதிப்பெண் பெற்ற ஒருவரை, கவி பிரசாத் மூலம் இறுதி பட்டியலில் சேர்த்துள்ளனர். அரசு துறை இணை இயக்குநரின் மகளுக்கு ரவிச்சந்திரனே பணி ஆணை ஏற்பாடு செய்துள்ளார். மதிப்பெண்களில் குளறுபடி செய்து தேர்ச்சி பெற வைத்ததற்கான ஆதாரங்களும் உள்ளன.

ஊழலின் 'மையம்' 10 ரூபாய் நோட்டு! ரவிச்சந்திரன், மணிவண்ணன் ஆகியோர் விண்ணப்பதாரர்களிடம் "எங்களிடம் இருந்து வரும் நபரின் வாட்ஸ்அப்பில் 10 ரூபாய் நோட்டின் படம் இருக்கும். அதை காட்டினால், நோட்டில் உள்ள எண்களை சரிபார்த்து, தெரிவிக்கும் வங்கி கணக்குக்கு பணம் செலுத்துங்கள்" என கூறியுள்ளனர். இந்த நோட்டின் படம், செய்திகள் EDயிடம் உள்ளன. பணம் வசூல் செய்யப்பட்டதை உறுதிப்படுத்தும் வகையில் இது செயல்பட்டுள்ளது.

ED அதிகாரிகள் கூறுகையில், "இந்த ஊழல் குறித்து அக்டோபர் 27 அன்று தமிழக DGP வெங்கடராமனுக்கு கடிதம் எழுதினோம். 232 பக்க ஆவணங்களை இணைத்து, FIR பதிவு செய்யக் கோரினோம். அதன் பிறகே PMLA வழக்கு பதிவு செய்ய முடியும். ரவிச்சந்திரன், மணிவண்ணன், உதவியாளர்கள் ரமேஷ், செல்வமணி, கவி பிரசாத் ஆகியோருக்கு தொடர்பு உள்ளது. 150 பேர் முறைகேடாக பணி பெற்றுள்ளனர்" என தெரிவித்தனர்.

இந்த விவகாரம், திமுக அரசுக்கு பெரும் அவமானத்தை ஏற்படுத்தியுள்ளது. எதிர்க்கட்சிகள் AIADMK, BJP "ஊழல் அரசு" என விமர்சிக்கின்றன. அமைச்சர் நேரு "அரசியல் பழிவாங்கல்" என மறுத்துள்ளார். ED சோதனை தொடர்கிறது. உண்மை வெளிவர வேண்டும் என பொதுமக்கள் எதிர்பார்க்கின்றனர். 

இதையும் படிங்க: விஸ்வரூபம் எடுக்கும் பணிநியமன ஊழல்...!! அமலாக்கத்துறைக்கு போட்டியாக களமிறங்கும் தமிழக காவல்துறை... கே.என்.நேரு கொடுத்த லேட்டஸ்ட் அப்டேட்...!