தமிழக அரசியல் களம் அடுத்தகட்ட நகர்வை நோக்கிச் சென்று கொண்டிருக்கும் வேளையில், பிரபல தொழிலதிபர் லாட்டரி மார்ட்டினின் மனைவி லீமா ரோஸ் மார்ட்டின் இன்று அதிகாரப்பூர்வமாக அதிமுகவில் இணைந்தார். கடந்த 14 ஆண்டுகளாக இந்திய ஜனநாயகக் கட்சியில் (IJK) இணைந்து பணியாற்றி வந்த அவர், பிப்ரவரி 10-ஆம் தேதி அக்கட்சியிலிருந்து விலகிய நிலையில், இன்று சென்னை ராயப்பேட்டையில் உள்ள அதிமுக தலைமை அலுவலகத்தில் பொதுச்செயலாளர் எடப்பாடி பழனிசாமி முன்னிலையில் கட்சியில் இணைந்தார். இபிஎஸ் அவருக்குக் கட்சியின் உறுப்பினர் அட்டையை வழங்கி வரவேற்றார். இந்த திடீர் 'என்ட்ரி' கொங்கு மண்டலம் மட்டுமன்றி, ஒட்டுமொத்த தமிழக அரசியலிலும் ஒரு முக்கிய அதிர்வை ஏற்படுத்தியுள்ளது.

கடந்த ஜனவரி மாதம் எடப்பாடி பழனிசாமியைச் சந்தித்த போதே லீமா ரோஸ் அதிமுகவில் இணையப் போவதாகத் தகவல்கள் கசிந்தன. இருப்பினும், அப்போது அந்தத் தகவலை மறுத்த அவர், பிப்ரவரி 10-ஆம் தேதி ஐஜேகே-விலிருந்து விலகிய போது, கட்சியில் தனது உழைப்புக்கு உரிய அங்கீகாரம் கிடைக்கவில்லை என்ற குற்றச்சாட்டை முன்வைத்தார். குறிப்பாக, கடலூர் மாநாட்டில் தனக்கு உரிய முக்கியத்துவம் அளிக்கப்படாதது மற்றும் கடந்த 8 மாதங்களாக நிலவி வந்த அதிருப்தியே இந்த முடிவுக்குக் காரணம் எனத் தெரிகிறது. தமிழக வெற்றிக் கழகத்தின் முக்கிய நிர்வாகி ஆதவ் அர்ஜுனாவின் மாமியார் என்ற பின்னணியைக் கொண்டிருந்தாலும், அவர் தனது அரசியல் பயணத்திற்கு அதிமுகவைத் தேர்ந்தெடுத்திருப்பது ஒரு 'மாஸ்டர் பிளான்' ஆகப் பார்க்கப்படுகிறது.

வரும் 2026 சட்டமன்றத் தேர்தலில், தனது சொந்த ஊரான திருவாடானை தொகுதியிலோ அல்லது அவர் வசிக்கும் கோவை பகுதியிலோ லீமா ரோஸ் போட்டியிட வாய்ப்புள்ளதாகக் கூறப்படுகிறது. மார்ட்டின் அறக்கட்டளை மூலம் அவர் செய்து வரும் பல்வேறு சமூகப் பணிகள் அவருக்குத் தொகுதிக்குள் செல்வாக்கை அளித்துள்ளன. அதிமுகவின் 'இரட்டை இலை' சின்னத்தில் அவர் களம் காணும் பட்சத்தில், அது அக்கட்சிக்குத் தேர்தல் நிதியிலும், களப் பணிகளிலும் மிகப்பெரிய 'பூஸ்ட்' ஆக அமையும் என அரசியல் விமர்சகர்கள் கணிக்கின்றனர். குறிப்பாக, தென் மாவட்டங்கள் மற்றும் கொங்கு மண்டலத்தில் லீமா ரோஸின் வருகை அதிமுகவின் தேர்தல் வியூகங்களை மேலும் வலுப்படுத்தும் என எதிர்பார்க்கப்படுகிறது.

இதையும் படிங்க: சொத்தை பழம் போல் பட்ஜெட்...! எல்லாம் ஏமாற்று வேலை... வறுத்தெடுத்த EPS..!

இதையும் படிங்க: எடப்பாடி பழனிசாமி இல்லத்தில் பாஜக தலைவர்கள் திடீர் சந்திப்பு: 2026 தேர்தல் கூட்டணி குறித்து ரகசிய ஆலோசனை!