தமிழகம் முழுவதும் வடகிழக்குப் பருவமழை தீவிரமடைந்துள்ள நிலையில், நீலகிரி மாவட்டத்தில் பெய்து வரும் கனமழையால் பல்வேறு பகுதிகளில் பாதிப்புகள் ஏற்பட்டுள்ளன. குறிப்பாக, கடந்த 24 மணி நேரத்தில் குன்னூர் மலைப்பகுதியில் உள்ள பர்லியாரில் அதிகபட்சமாக 25 சென்டிமீட்டர் மழை பதிவாகியுள்ளது.

நீலகிரி மாவட்டத்தில் நேற்று இரவு முதல் உதகை, குன்னூர், கோத்தகிரி, கூடலூர், குந்தா உள்ளிட்ட பல்வேறு பகுதிகளில் கனமழை பெய்துள்ளது. குறிப்பாக, பர்லியார் மற்றும் கீழ் கோத்தகிரி பகுதிகளில் மிகக் கனமழை கொட்டித் தீர்த்துள்ளது. இதனால் பல இடங்களில் மண்சரிவு ஏற்பட்டு, சாலைகளில் போக்குவரத்து பாதிக்கப்பட்டுள்ளது.

மேட்டுப்பாளையத்தில் இருந்து நீலகிரி மாவட்டத்துக்குச் செல்லும் மலைப்பாதையில் பல இடங்களில் மண்சரிவு ஏற்பட்டுள்ளது. உதகை மற்றும் குன்னூர் பகுதிகளை இணைக்கும் முக்கியச் சாலையிலும் மண்சரிவு ஏற்பட்டுள்ளதாகத் தகவல்கள் தெரிவிக்கின்றன.

இதையும் படிங்க: இந்த 5 மாவட்டங்களில் இன்று ருத்ர தாண்டவம் ஆடப்போகும் மழை... வெளியானது அதிமுக்கிய அலர்ட்...!

இதன் காரணமாக, அந்தப் பகுதிகளில் போக்குவரத்து நிறுத்தப்பட்டுள்ளது. கோவை மாவட்டம் மேட்டுப்பாளையத்தில் இருந்து நீலகிரி செல்லும் வாகனங்கள் ஆங்காங்கே நிறுத்தி வைக்கப்பட்டுள்ளன.

ஏற்கெனவே, கடந்த வாரம் பெய்த கனமழையின்போது பாறை விழுந்து ஒருவர் உயிரிழந்த நிலையில், தற்போது மலைப்பாதைகளில் முன்னெச்சரிக்கை நடவடிக்கைகள் தீவிரப்படுத்தப்பட்டுள்ளன. மேலும், மாவட்டத்தின் சில பகுதிகளில் மரங்களை அகற்றும் பணிகளும் நடைபெற்று வருகின்றன.

கடந்த 24 மணி நேரத்தில் பதிவான மழையளவின்படி, பர்லியாரில் 25 சென்டி மீட்டர், கீழ் கோத்தகிரியில் 20 சென்டி மீட்டர், தேவாலாவில் 8.2 சென்டி மீட்டர், ஓவேலி, பாலக்குளா, கென்னக்குறை ஆகிய பகுதிகளில் தலா 7 செ.மீ. மழை பதிவாகியுள்ளது. பந்தலூரில் 6 சென்டி மீட்டர் மழை பெய்துள்ளது.

தொடர்ந்து கனமழை பெய்து வருவதால், நீலகிரி மாவட்டத்தின் மலைப்பாதைகளில் பயணிப்போர் எச்சரிக்கையுடன் இருக்குமாறு அறிவுறுத்தப்படுகின்றனர். மழை மற்றும் மண்சரிவு தொடர்பான அறிவிப்புகளைப் பின்பற்றி, பாதுகாப்பாகப் பயணிக்க வேண்டியது அவசியமாகியுள்ளது.

இதையும் படிங்க: கொட்டித் தீர்க்கும் பெருமழை: நெல்லை, குமரிக்கு ரெட் அலெர்ட் விடுத்த வானிலை ஆய்வு மையம்!