தென்மேற்கு வங்கக்கடல் பகுதியில் புதிதாக உருவாகியுள்ள வளிமண்டலக் காற்று சுழற்சி காரணமாக, அடுத்த 48 மணி நேரத்திற்குள் தமிழகத்தில் நடப்பாண்டிற்கான வடகிழக்குப் பருவமழை அதிகாரப்பூர்வமாகத் தொடங்கும் என்று இந்திய வானிலை ஆய்வு மையம் மிக முக்கியமான அறிவிப்பை வெளியிட்டுள்ளது.

தமிழகம், புதுவை மற்றும் அதனை ஒட்டிய தென்னிந்தியப் பகுதிகளில் வடகிழக்குப் பருவமழையைத் தொடங்குவதற்கான சாதகமான சூழல் வேகமாக உருவாகி வருகிறது. இதுகுறித்து இந்திய வானிலை ஆய்வு மையம் வெளியிட்டுள்ள தகவலில், தென்மேற்கு வங்கக்கடல் மற்றும் அதனை ஒட்டிய தென் தமிழகக் கடலோரப் பகுதிகளில் வலுவான காற்று சுழற்சி நிலவி வருகிறது. இந்தக் காற்று சுழற்சியானது கிழக்குத் திசைக் காற்றை நிலப்பகுதியை நோக்கி இழுத்து தீவிரப்படுத்தி வருவதால், அடுத்த 48 மணி நேரத்தில் வடகிழக்கு பருவமழை முழு வீச்சில் தொடங்குவதற்கான அனைத்து அம்சங்களும் கூடிவந்துள்ளன என்று தெரிவிக்கப்பட்டுள்ளது.

இதன் காரணமாக, கடலோர மாவட்டங்கள், காவிரி டெல்டா பகுதிகள் மற்றும் தென் மாவட்டங்களில் படிப்படியாக மழைப்பொழிவு அதிகரிக்கும். அடுத்தடுத்த நாட்களில் பரவலாக இடி, மின்னல் மற்றும் பலத்த காற்றுடன் கூடிய கனமழை வெளுத்து வாங்க வாய்ப்புள்ளதாக எச்சரிக்கப்பட்டுள்ளது.

இதையும் படிங்க: அக்டோபர் 15 முதல் தமிழகத்தில் வெளுத்து வாங்கப்போகும் கனமழை! வானிலை ஆய்வு மையம் எச்சரிக்கை!

பருவமழை முன்கூட்டியே தீவிரமடைய வாய்ப்புள்ளதால், அரசுத் துறைகளும் மாவட்ட நிர்வாகங்களும் தேவையான முன்னெச்சரிக்கை மற்றும் பேரிடர் மீட்பு நடவடிக்கைகளை முழுவீச்சில் தயார் நிலையில் வைக்குமாறு அறிவுறுத்தப்பட்டுள்ளனர். விவசாயிகள் மற்றும் பொதுமக்கள் வானிலை மையத்தின் அதிகாரப்பூர்வ அறிவிப்புகளைத் தொடர்ந்து கவனிக்குமாறு கேட்டுக்கொள்ளப்பட்டுள்ளனர்.

இதையும் படிங்க: அக். 15-க்கு பின் வெப்பம் படிப்படியாக குறையும்! சென்னை வானிலை மையம் முக்கிய தகவல்!