திமுக தலைவர் மு.க. ஸ்டாலின் இன்று தமிழக அரசின் செயல்பாடுகள் குறித்து கடும் விமர்சனம் தெரிவித்துள்ளார். அவர் பேசும்போது, த.வெ.க. ஆட்சி அமைந்த நான்கே மாதங்களில் தமிழ்நாடு பணவீக்கம் மற்றும் விலைவாசி உயர்வில் முதலிடத்தைப் பிடித்துள்ளதாக சுட்டிக்காட்டினார். அத்தியாவசியப் பொருட்களின் விலையைக் கட்டுக்குள் வைக்கத் தெரியாத நிலையில், விலைவாசி உயர்வே ஏற்படவில்லை என்று உணவுத்துறை அமைச்சர் கூறும் பொய்யான அறிக்கைகளைக் கேட்டு ஏழை மக்கள் இன்னும் எரிச்சலடைந்துள்ளனர் என்று அவர் குற்றம்சாட்டினார்.

மின்வெட்டு பிரச்சினை குறித்தும் அனைத்து எதிர்க்கட்சிகளும் கடந்த பல மாதங்களாக எச்சரித்து வந்ததாக ஸ்டாலின் நினைவுபடுத்தினார். அப்போதே சுதாரித்து உரிய நடவடிக்கைகளை எடுத்திருக்க வேண்டும் என்றும் அவர் வலியுறுத்தினார். மின்துறை அமைச்சர் பஞ்சாபுக்குச் சென்றிருக்க, முதலமைச்சர் இலண்டனுக்குப் பறந்துவிட்ட நிலையில், இப்போது கடைசி நிமிடத்தில் கதவைத் தட்டி யூனிட்டுக்கு 35 ரூபாய் கொடுத்து வெளிச்சந்தையில் மின்சாரம் வாங்கப் போவதாக அறிவித்துள்ளனர். கழக ஆட்சியில் குறைந்த விலைக்கு வாங்கிய ஒப்பந்தங்களை இரத்து செய்துவிட்டு, இந்தியாவிலேயே எந்த மாநிலமும் வாங்காத அதிக விலைக்கு வாங்குவதுதான் இவர்கள் கொண்டு வந்துள்ள மாற்றம் என்று அவர் கேள்வி எழுப்பினார்.

இது யார் வீட்டுக் காசு என்று கேள்வி எழுப்பிய ஸ்டாலின், அ.தி.மு.க.வில் இருந்து மேலும் 15 பேரை வாங்கப் போவதாக வெட்கமே இல்லாமல் ஒப்புதல் வாக்குமூலம் கொடுப்பதாகவும் குறிப்பிட்டார். அதற்குப் பணம் போதாமல்தான் மின்சாரம் வாங்குவதில் ஊழல் நடக்கிறதா என மக்கள் மனதிலும் கேள்விகள் எழத் தொடங்கிவிட்டன என்று அவர் கூறினார்.குறுவை பயிர் பொய்த்த நிலையில், டெல்டா விவசாயிகளின் பேச்சைக் கேட்காமல் ஜோசியரின் பேச்சைக் கேட்டு மேட்டூர் அணையைத் தவறான தேதியில் திறந்து வைத்ததாகவும் அவர் குற்றம்சாட்டினார். ஐந்து கோடி ரூபாய் செலவில் சாலையோரத் தடுப்புகள் அமைத்து முதலமைச்சர் ரீல்கள் எடுத்ததைத் தவிர அதனால் விளைந்த பயன் என்ன என்று கேள்வி எழுப்பிய அவர், இப்போது சம்பா சாகுபடியும் சாத்தியமாகுமா எனத் தெரியாமல் கடைமடை விவசாயிகள் நீரின்றிப் பரிதவிப்பதாக வருத்தம் தெரிவித்தார்.

இதையும் படிங்க: பஞ்ச் பேசும் நடிகர் எங்கே போனார்? முதல்வர் விஜய்யையும் காங்கிரஸையும் வறுத்தெடுத்த தயாநிதி மாறன்!

முன்யோசனையும் இல்லாத மூளையும் இல்லாத ஒரு மூடர் கூட்டத்திடம் சிக்கி, நம் கண்முன்னே தமிழ்நாடு சீரழிந்து கொண்டிருக்கிறது என்று ஸ்டாலின் சுட்டிக்காட்டினார். வாலில் தீப்பற்றிய குரங்குக் கூட்டம் வனமெல்லாம் தாவி கொளுத்தி விடுவதைப் போலத்தான் த.வெ.க. அரசின் அமைச்சரவை அமைந்திருக்கிறது என்று அவர் உருவகப்படுத்தினார். இவர்களை வழிநடத்த வேண்டிய முதலமைச்சரோ உடுப்பி, இலண்டன், விஜயவாடா என மாதம் ஒரு ஊருக்குச் சென்று விழாவைச் சிறப்பிப்பதிலேயே குறியாக இருக்கிறார் என்றும் குறிப்பிட்டார்.ஆட்சி நிர்வாகத்தின் அடிப்படை கூட அறியாத இந்த அறிவிலிகளின் அலட்சியத்தாலும் அழிச்சாட்டியத்தாலும் எதிர்வரும் மாதங்களைத் தமிழ்நாட்டு மக்கள் எப்படி எதிர்கொள்ளப் போகிறார்கள் என்ற அச்சம்தான் மேலோங்குகிறது என்று ஸ்டாலின் கூறியுள்ளார்.

இதையும் படிங்க: தலைமைச் செயலகத்திலேயே மின்வெட்டு.! “ரீல்ஸ் ஆட்சி"..! TVK அரசை கடுமையாக விமர்சித்த செந்தில் பாலாஜி..!!