தமிழ்நாடு சட்டமன்றத் தேர்தலுக்கான அதிமுக - பாஜக கூட்டணியில், பாஜக 27 தொகுதிகளில் போட்டியிடுவதாக ஏற்கெனவே அறிவிக்கப்பட்டுள்ளது. கடந்த 25-ம் தேதி இந்த தொகுதிகளின் விவரங்கள் அதிகாரப்பூர்வமாக வெளியிடப்பட்டன. இதைத் தொடர்ந்து, அந்தத் தொகுதிகளுக்கான வேட்பாளர்களைத் தேர்வு செய்யும் பணியில் பாஜக தீவிரமாக ஈடுபட்டு வருகிறது. இந்த நிலையில், யார் யார் எந்தெந்தத் தொகுதியில் போட்டியிடலாம் என்பது குறித்து பாஜக மாநில அலுவலகத்தில் கடந்த வியாழக்கிழமை முக்கிய ஆலோசனைக் கூட்டம் நடைபெற்றது. 

இந்தக் கூட்டத்தில் அகில இந்திய பொதுச் செயலாளர் பி.எல். சந்தோஷ் சிறப்பு விருந்தினராகக் கலந்துகொண்டார். கூட்டத்துக்குப் பின்னர், வேட்பாளர்களுக்கான விருப்ப மனுக்களும் பெறப்பட்டன. இந்த ஆலோசனைகளின் அடிப்படையில், சென்னை மயிலாப்பூர் தொகுதியில் முன்னாள் பாஜக மாநிலத் தலைவர் டாக்டர் தமிழிசை சவுந்தரராஜன் போட்டியிடக்கூடும் என்ற தகவல் வெளியாகியுள்ளது. முன்னதாக, கடந்த சட்டமன்றத் தேர்தலில் நெல்லை தொகுதியில் போட்டியிட்ட நயினார் நாகேந்திரன், இம்முறை சாத்தூர் தொகுதியில் களமிறங்க உள்ளார்.

இதையும் படிங்க: நாளை சென்னை வருகிறார் பியூஸ் கோயல்..!! தொகுதி பங்கீடு குறித்து பேச்சுவார்த்தை நடத்த திட்டம்..!!

இருப்பினும், பாஜக வேட்பாளர்கள் தேர்வு இன்னும் முழுமையடையவில்லை. விரைவில் வேட்பாளர் பட்டியல் வெளியிடப்படும் என்று நயினார் நாகேந்திரன் தெரிவித்துள்ளார். இந்தச் சூழலில், தமிழ்நாட்டுக்கான பாஜக வேட்பாளர்கள் தொடர்பாக முக்கிய ஆலோசனை இன்று நடைபெற உள்ளது. மத்திய அமைச்சரும், தமிழக பாஜக தேர்தல் பொறுப்பாளருமான பியூஸ் கோயல், பிரதமர் நரேந்திர மோடியைச் சந்தித்து வேட்பாளர்கள் தொடர்பாக விரிவான விவாதம் நடத்த உள்ளார். 

மேலும், மத்திய உள்துறை அமைச்சர் அமித் ஷாவையும் அவர் சந்தித்துப் பேசவிருக்கிறார்.பா.ஜ.க. வேட்பாளர்கள் இறுதிப் பட்டியல் ஏற்கெனவே கட்சித் தலைமைக்கு அனுப்பி வைக்கப்பட்டுள்ள நிலையில், இந்த உயர்மட்ட ஆலோசனை கூட்டம் நடைபெறுகிறது. ஆலோசனை முடிவடைந்த பிறகு, பியூஸ் கோயல் நாளை தமிழ்நாடு வந்தடைய உள்ளார்.

தமிழகம் வந்தவுடன், மாநில பாஜக தலைவர்களுடன் மற்றொரு முக்கிய ஆலோசனைக் கூட்டத்தை நடத்தவும் திட்டமிடப்பட்டுள்ளது. இந்தத் தொடர் ஆலோசனைகளுக்குப் பின்னர், நாளை அல்லது நாளை மறுநாள் பாஜக சார்பில் போட்டியிடும் வேட்பாளர்களின் இறுதிப் பட்டியல் வெளியிடப்படும் என்று எதிர்பார்க்கப்படுகிறது. தமிழ்நாட்டில் அதிமுக கூட்டணியில் பாஜக வலுவான போட்டியை வழங்கும் வகையில் வேட்பாளர்களைத் தேர்வு செய்யும் முயற்சிகள் தீவிரமடைந்துள்ளன.

இதையும் படிங்க: ஸ்டாலின் ஆட்சிக்கு முடிவு..! இன்றைய தினம் புதிய துவக்கம்... பியூஷ் கோயல் உற்சாகம்..!!