பிரதமர் நரேந்திர மோடியை சந்தித்த தமிழக முதல்வர் விஜய், மாநிலத்தின் வளர்ச்சி மற்றும் நலத்திட்டங்களுக்கான பல்வேறு கோரிக்கைகள் அடங்கிய விரிவான மனுவை வழங்கியுள்ளார். இந்த சந்திப்புக்குப் பிறகு, தமிழக அரசின் கோரிக்கைகள் மீது மத்திய அரசு தீவிரமாக கவனம் செலுத்தத் தொடங்கியுள்ளதாக டெல்லி அரசியல் வட்டாரங்களில் தகவல்கள் வெளியாகியுள்ளன.
முதல்வர் விஜய் வழங்கிய மனுவில், தமிழகத்திற்கு கூடுதல் நிதி ஒதுக்கீடு, பல்வேறு நலத்திட்டங்களுக்கு மத்திய உதவி, உள்கட்டமைப்பு மேம்பாட்டு திட்டங்கள் மற்றும் நீண்டகாலமாக விவாதத்தில் இருக்கும் மேகதாது அணை விவகாரம் உள்ளிட்ட முக்கிய அம்சங்கள் இடம்பெற்றிருந்ததாக கூறப்படுகிறது.
இந்த மனுவை ஆய்வு செய்து, மத்திய அரசால் எந்தெந்த கோரிக்கைகளுக்கு உதவி வழங்க முடியும் என்பது குறித்து விரிவான அறிக்கை தயாரிக்குமாறு பிரதமர் மோடி தனது இரண்டாவது முதன்மை செயலரான சக்திகாந்த தாசுக்கு அறிவுறுத்தியுள்ளதாக தகவல்கள் தெரிவிக்கின்றன.
இதையும் படிங்க: ஸ்டூடண்ட் எலெக்சன் இனி நடத்தலாம்! மாணவர்கள் மூலம் கல்லூரி, பல்கலையில் நுழைய தவெக திட்டம்!!
தமிழகத்தைச் சேர்ந்த மூத்த ஐ.ஏ.எஸ். அதிகாரியான சக்திகாந்த தாஸ், இந்திய ரிசர்வ் வங்கியின் முன்னாள் கவர்னராகவும் பணியாற்றியவர். தற்போது பிரதமர் அலுவலகத்தில் முக்கிய பொறுப்பில் உள்ள அவர், முதல்வர் விஜயை நேரில் சந்தித்து பல்வேறு அம்சங்கள் குறித்து ஆலோசனை நடத்தியதாக கூறப்படுகிறது.
அதேபோல், மத்திய அரசின் உயரிய நிர்வாகப் பதவிகளில் ஒன்றான கேபினட் செயலர் பொறுப்பில் இருக்கும் தமிழகத்தைச் சேர்ந்த டி.வி. சோமநாதனும் முதல்வர் விஜயை சந்தித்து மாநில வளர்ச்சி தொடர்பான விஷயங்கள் குறித்து கலந்துரையாடியுள்ளார். மத்திய அரசு மற்றும் தமிழக அரசு இடையிலான ஒருங்கிணைப்பை வலுப்படுத்தும் வகையில் இந்த சந்திப்புகள் அமைந்துள்ளதாக அதிகாரப்பூர்வ வட்டாரங்கள் தெரிவிக்கின்றன.
இதற்கிடையில், மத்திய நிதி அமைச்சர் நிர்மலா சீதாராமனையும் அவரது அலுவலகத்தில் சந்தித்த முதல்வர் விஜய், தமிழகத்திற்கு கூடுதல் நிதி உதவி வழங்குவது குறித்து விரிவாக பேசியதாக கூறப்படுகிறது. இந்த சந்திப்பின் போது அமைச்சகங்களில் பணியாற்றும் தமிழர்கள் உள்ளிட்ட பலரும் முதல்வர் விஜயை சந்தித்து புகைப்படங்கள் எடுத்துக் கொண்டதாக தகவல்கள் வெளியாகியுள்ளன.
தமிழக அரசின் கோரிக்கைகள் மீது மத்திய அரசு என்ன முடிவு எடுக்கப் போகிறது என்ற எதிர்பார்ப்பு அரசியல் மற்றும் நிர்வாக வட்டாரங்களில் அதிகரித்துள்ளது.
இதையும் படிங்க: தவெகவின் முதல் அமைச்சரவை கூட்டம்! முதல்வர் விஜய் அரசின் முழுமுதல் பட்ஜெட்! எகிறும் எதிர்பார்ப்பு!