தமிழ் சினிமாவின் சூப்பர் ஸ்டார் ரஜினிகாந்திற்குச் சொந்தமான சென்னை கோடம்பாக்கத்தில் அமைந்துள்ள புகழ்பெற்ற ஸ்ரீ ராகவேந்திரா திருமண மண்டபத்தின் 36 ஆண்டுகாலப் பயணம் அதிகாரப்பூர்வமாக முடிவுக்கு வந்துவிட்டதாகவும், அதனை இடிக்கத் திட்டமிட்டிருப்பது உண்மைதான் என்றும் அவரது மகளும் இயக்குநருமான சௌந்தர்யா ரஜினிகாந்த் செய்தியாளர்களிடம் உறுதிப்படுத்தியுள்ளார்.

சௌந்தர்யா ரஜினிகாந்த் தயாரிப்பில் உருவாகியுள்ள புதிய காதல் வலைத்தொடர் வரும் அக்டோபர் 2-ஆம் தேதி நெட்பிளிக்ஸ் ஓடிடி தளத்தில் உலகளவில் வெளியாகவுள்ளது. இதனை முன்னிட்டு சென்னையில் நடைபெற்ற செய்தியாளர் சந்திப்பில் சௌந்தர்யா ரஜினிகாந்த் உள்ளிட்ட படக்குழுவினர் கலந்துகொண்டு செய்தியாளர்களின் பல்வேறு கேள்விகளுக்குப் பதிலளித்தனர்.

அப்போது, சினிமா வட்டாரத்திலும் சென்னை வாசிகள் மத்தியிலும் கடந்த சில நாட்களாகப் பெரும் பேசுபொருளாக இருந்துவரும், கோடம்பாக்கம் ராகவேந்திரா திருமண மண்டபம் இடிக்கப்பட உள்ளதாக வெளியாகும் தகவல்கள் உண்மைதானா? என்ற கேள்வி எழுப்பப்பட்டது. அதற்கு மிக வெளிப்படையாகவும் உருக்கமாகவும் பதிலளித்த சௌந்தர்யா ரஜினிகாந்த், ராகவேந்திரா திருமண மண்டபம் என்பது சென்னை நகரின் ஒரு மிகப்பெரிய அடையாளம்; கடந்த 36 ஆண்டுகளாக அது எங்கள் குடும்பத்துடன் இரண்டறக் கலந்துள்ளது என்று தெரிவித்தார்.

இதையும் படிங்க: ரஜினி, தனுஷ், சூர்யாவை குறிவைத்து சைபர் தாக்குதல்! முற்றுப்புள்ளி வைப்பாரா முதல்வர் விஜய்?! பரபரப்பு பின்னணி!

தொடர்ந்து பேசிய அவர், ஒவ்வொரு விஷயத்திற்கும் ஒரு குறிப்பிட்ட காலகட்டம் முடிவுக்கு வரும்போது, அது அடுத்த கட்டத்தை நோக்கி நகர வேண்டும்; கால மாற்றத்திற்கு ஏற்ப நாமும் மாற வேண்டும் என்று அப்பா எப்போதும் நினைப்பார் எனக் குறிப்பிட்டார். மேலும், ராகவேந்திரா திருமண மண்டபத்தின் பயணம் இப்போது முழுமையாக முடிந்துவிட்டது; அந்த இடத்தில் அடுத்து என்ன பிரம்மாண்ட திட்டத்தைக் கொண்டு வருவது என்பது குறித்த தீவிர ஆலோசனைகள் குடும்பத்திற்குள் சென்று கொண்டிருக்கின்றன; எனவே மண்டபம் இடிக்கப்பட உள்ளது என்பது உண்மைதான் என்று தெரிவித்தார்.

கடந்த 1990-களில் சூப்பர் ஸ்டார் ரஜினிகாந்தால் கட்டப்பட்ட இந்த ஸ்ரீ ராகவேந்திரா திருமண மண்டபத்தில்தான், தனது அகில இந்திய ரசிகர் மன்ற நிர்வாகிகளை அவர் வழக்கமாக நேரில் சந்தித்து வந்தார். ரசிகர் மன்றத்தின் முக்கிய நலத்திட்டப் பணிகள், அரசியல் தொடர்பான ஆலோசனைக் கூட்டங்கள் மற்றும் ரசிகர்களுடன் தனித்தனியாகப் புகைப்படம் எடுத்துக்கொள்ளும் வரலாற்றுத் தருணங்கள் அனைத்தும் இந்த அரங்கில் தான் அரங்கேறின. 

கோலிவுட்டின் இதயப் பகுதியான கோடம்பாக்கத்தின் முக்கிய நில அடையாளங்களில் ஒன்றாகத் திகழ்ந்த ராகவேந்திரா திருமண மண்டபம் இடிக்கப்பட உள்ளது என்ற அதிகாரப்பூர்வ தகவல், ரஜினி ரசிகர்களிடையே மட்டுமின்றி ஒட்டுமொத்த சென்னை மக்களிடையேயும் பெருத்த சோகத்தையும் ஏக்கத்தையும் ஏற்படுத்தியுள்ளது.

இதையும் படிங்க: காந்தி ஜெயந்தி தொடர் விடுமுறை: சொந்த ஊர் செல்வோருக்கு தெற்கு ரயில்வே சிறப்பு ரயில்கள் அறிவிப்பு!