ஆட்சிக்கு வரும்போது அளித்த எந்தவொரு தேர்தல் வாக்குறுதியையும் நிறைவேற்றாமல் தமிழக மக்களைத் தவெக அரசு நடுத்தெருவில் நிறுத்தியுள்ளது என்றும், தேர்தல் நேரத்தில் கொடுத்த இலவச வாக்குறுதிகள் அனைத்தும் காற்றில் பறந்துபோய் விண்ணை முட்டும் விலைவாசி உயர்வே விஜய் அரசின் சாதனையாக மாறியுள்ளது என்றும் திமுக துணைப் பொதுச்செயலாளரும் நாடாளுமன்ற உறுப்பினருமான கனிமொழி மிகக் காட்டமாகச் சாடியுள்ளார்.

செங்கல்பட்டு மாவட்டம் மதுராந்தகம் சட்டமன்றத் தொகுதிக்கு நடைபெறவுள்ள இடைத்தேர்தலில் திமுக வேட்பாளராகக் களம் காணும் பரந்தாமனை ஆதரித்து, அச்சரப்பாக்கம் அடுத்த பெரும்பேர்கண்டிகையில் நடைபெற்ற எழுச்சிமிகு மகளிர் சந்திப்புக் கூட்டத்தில் கலந்துகொண்டு கனிமொழி எம்பி தேர்தல் பரப்புரையாற்றினார்.

அப்போது கூட்டத்தில் திரண்டிருந்த தாய்மார்கள் மத்தியில் உரையாற்றிய அவர், எந்தவொரு இக்கட்டான சூழலிலும் தனது கொள்கையை ஒருபோதும் விட்டுக்கொடுக்காத நேர்மையான கொள்கை வேட்பாளரான பரந்தாமனை நமது கழகத் தலைவர் மு.க.ஸ்டாலின் மதுராந்தகம் தொகுதிக்குத் தேர்வு செய்துள்ளார் என்று தெரிவித்தார்.

இதையும் படிங்க: ஐஸ் ஹவுஸ் அஜித் கொலை..! கொஞ்சமாச்ச அக்கறை இருக்கா.? முதல்வர் விஜய் வெளுத்த கனிமொழி MP..!

மேலும், தற்போதைய ஆட்சி நிர்வாகத்தின் எதேச்சதிகாரப் போக்கைச் சுட்டிக்காட்டிய அவர், முதலமைச்சர் விஜய் இதுவரை பொதுவெளியில் வந்து ஊடகங்களையும் செய்தியாளர்களையும் சந்திப்பதே இல்லை; ஆனால் மக்கள் குறைகளைத் தீர்க்கப் போகும் மதுராந்தகம் திமுக வேட்பாளர் பரந்தாமன் எப்போதும் வெளிப்படைத்தன்மையுடன் செய்தியாளர்களையும் மக்களையும் சந்திப்பார் எனக் குறிப்பிட்டார்.

எதிர்க்கட்சிகளின் அச்சுறுத்தல்கள் குறித்துப் பேசிய அவர், மத்திய, மாநில அரசுகளின் எத்தனை அடக்குமுறைகள், பழிவாங்கும் வழக்குகள், வருமான வரித்துறை ரெய்டுகள் குறுக்கே வந்தாலும், திமுகவினர் தாங்கள் வரித்துக்கொண்ட சுயமரியாதைக் கொள்கையில் எஃகு போல் உறுதியாக நிற்பவர்கள்; நீங்கள் வாக்களித்த சட்டமன்ற உறுப்பினர் எந்நாளும் உங்களுடனேயே களத்தில் இருக்க வேண்டும் என்றால் உதயசூரியன் சின்னத்திற்கு வாக்களியுங்கள் என்று தெரிவித்தார்.

தவெகவின் தேர்தல் வாக்குறுதிகளைக் கிழித்துத் தொங்கவிட்ட கனிமொழி, தேர்தல் நேரத்தில் தவெக மகளிருக்கு மாதம் ₹2,500, ஆண்டுக்கு 6 இலவச எரிவாயு சிலிண்டர், வேலையில்லா பட்டதாரிகளுக்கு ₹4,000 உதவித்தொகை தருவோம் என்றெல்லாம் அள்ளி வீசினார்கள்; ஆனால் கடைசியில் வேலையில்லா பட்டதாரி திரைப்படத்தில் நடித்த நடிகர் தனுஷ் மட்டும்தான் அரசியலுக்கு வந்துள்ளாரே தவிர, இளைஞர்களுக்கு எந்த நிதியுதவியும் கிடைக்கவில்லை என்று கிண்டலடித்தார்.

மின்சாரப் பிரச்சினை குறித்துக் கடுமையான விமர்சனத்தை முன்வைத்த அவர், 200 யூனிட் வரை இலவச மின்சாரம் தருவோம் என்று பொதுமக்களுக்கு ஆசை காட்டினார்கள்; ஆனால் இன்றைக்கு வீடுகளுக்கு மின்சாரமே ஒழுங்காக வருவதில்லை; மின்சாரத்திற்குப் பதிலாகத் தாங்க முடியாத அளவுக்கு மின் கட்டணமும், வரியும் தான் விண்ணை முட்டும் அளவிற்கு அதிகரித்துள்ளது என்று கொதித்தார்.

சமீபத்தில் தாராபுரத்தில் நடைபெற்ற தவெக கூட்டத்தில் அரங்கேறிய நாடகத்தை அம்பலப்படுத்திய அவர், தாராபுரம் தேர்தல் கூட்டத்தில் அமைச்சர் ராஜ்மோகனுக்குத் திடீரென ஒரு தொலைபேசி அழைப்பு வருகிறது; உடனே அவர் மேடையில் தவெக வேட்பாளர் காதில் ஏதோ ரகசியம் பேசிவிட்டு, திடீரெனக் கண்ணீர் விட்டு அழுகிறார்; இவ்வளவு தரம் தாழ்ந்த பெரிய நடிப்பை தமிழக அரசியல் வரலாற்றிலேயே நாங்கள் இதுவரை பார்த்ததே இல்லை என்று விளாசினார்.

இறுதியாகப் பொருளாதார அவலங்கள் குறித்துப் பேசிய அவர், தமிழ்நாட்டில் அத்தியாவசியப் பொருட்களின் விலைவாசி ஒவ்வொரு நாளும் தாறுமாறாக உயர்ந்து கொண்டே செல்கிறது; வேலைவாய்ப்பின்மை பெருகி, மக்கள் வாழ வழியில்லை என்ற மோசமான இருள் சூழ்ந்த நிலைக்குத் தமிழகத்தைத் தவெக அரசு தள்ளிக் கொண்டிருக்கிறது; இந்த மக்கள் விரோத அரசுக்குப் பாடம் புகட்ட இடைத்தேர்தலில் திமுக வேட்பாளர் பரந்தாமனைப் பெருவாரியான வாக்குகள் வித்தியாசத்தில் வெற்றி பெறச் செய்யுங்கள் என்று கேட்டுக் கொண்டார்.

இதையும் படிங்க: மதுராந்தகம், தாராபுரத்தில் திமுக புதிய வியூகம்! மகளிரணிக்கு கனிமொழி கொடுத்த முக்கிய டாஸ்க்!