தமிழகத்தில் இன்று காலை 10 மணிக்குள் சென்னை உட்பட 16 மாவட்டங்களில் மழை பெய்ய வாய்ப்புள்ளதாக வானிலை ஆய்வு மையம் எச்சரிக்கை விடுத்துள்ளது.

அதன்படி, சென்னை, திருவள்ளூர், காஞ்சிபுரம், செங்கல்பட்டு, ராணிப்பேட்டை ஆகிய மாவட்டங்களில் காலை 10 மணிக்குள் மழை பெய்ய வாய்ப்புள்ளதாகத் தெரிவிக்கப்பட்டுள்ளது.

அடுத்த மூன்று மணி நேரத்தில் விழுப்புரம், கடலூர், மயிலாடுதுறை, நாகப்பட்டினம், திருவாரூர் ஆகிய மாவட்டங்களிலும் மழை பெய்ய வாய்ப்புள்ளது. மேலும், தஞ்சாவூர், புதுக்கோட்டை, ராமநாதபுரம், தூத்துக்குடி, திருநெல்வேலி, கன்னியாகுமரி உள்ளிட்ட மாவட்டங்களிலும் மழை பெய்யக்கூடும் என வானிலை ஆய்வு மையம் தெரிவித்துள்ளது.

இதையும் படிங்க: #BREAKING வெளியானது ஹைஅலர்ட்... உருவானது முதல் புயல் சின்னம்... அடித்து நொறுக்கப்போகும் கனமழை...!

குறிப்பாக சென்னையில் நேற்று நள்ளிரவு முதல் விடிய விடிய கொட்டித் தீர்த்து வரும் கனமழையால் முக்கிய நீராதாரங்களாக விளங்கும் ஏரிகளில் தண்ணீர் வரத்து அதிகரித்து வருகிறது. 

புழல் ஏரி நிலவரம்: 

நீர்ப்பிடிப்புப் பகுதிகளில் பெய்த மழையின் காரணமாக, சென்னைக்குக் குடிநீர் வழங்கும் முக்கிய ஏரிகளில் ஒன்றான புழல் ஏரிக்கு வரும் நீர்வரத்து கணிசமாக அதிகரித்துள்ளது. நேற்று வினாடிக்கு 775 கன அடியாக இருந்த புழல் ஏரிக்கான நீர்வரத்து, இன்று காலை நிலவரப்படி வினாடிக்கு 1,126 கன அடியாக அதிகரித்துள்ளது.

மொத்தம் 3,300 மில்லியன் கன அடி கொள்ளளவு கொண்ட புழல் ஏரியில், இன்று காலை நிலவரப்படி 2,248 மில்லியன் கன அடி தண்ணீர் உள்ளது. ஒரே நாளில் புழல் ஏரிக்கு 81 மில்லியன் கன அடி தண்ணீர் வந்துள்ளது. இதன் மூலம், புழல் ஏரி தற்போது தனது மொத்தக் கொள்ளளவில் 68 சதவீதம் நீரைக் கொண்டுள்ளது.

புழல் ஏரியிலிருந்து குடிநீர்த் தேவைக்காக வினாடிக்கு 171 கன அடி தண்ணீர் திறந்துவிடப்படுகிறது. சென்னைக்குக் குடிநீர் வழங்கும் முக்கிய ஏரிகளில் நீர்மட்டம் மெல்ல உயரத் தொடங்கியுள்ளது.

கிடுகிடுவென உயரும் செம்பரம்பாக்கம் ஏரி: 

தொடர்ந்து பெய்து வரும் கனமழையின் காரணமாக, சென்னையின் குடிநீர் ஆதாரங்களில் ஒன்றான செம்பரம்பாக்கம் ஏரிக்கு வரும் நீர்வரத்து தொடர்ந்து அதிகரித்து வருகிறது.

இன்று காலை நிலவரப்படி, 24 அடி மொத்த நீர்மட்டம் கொண்ட செம்பரம்பாக்கம் ஏரியில் தற்போது 14.47 அடி உயரத்திற்குத் தண்ணீர் உள்ளது. மொத்தம் 3,645 மில்லியன் கன அடி கொள்ளளவு கொண்ட ஏரியில், தற்போது 1,435 மில்லியன் கன அடி தண்ணீர் இருப்பு உள்ளது.

தற்போது செம்பரம்பாக்கம் ஏரிக்கு பூண்டி ஏரியிலிருந்து வரும் நீரும், மழைநீரும் சேர்ந்து வினாடிக்கு சுமார் 550 முதல் 555 கன அடி வரை வந்து கொண்டிருக்கிறது.

தொடர்ந்து மழை பெய்யும் என எதிர்பார்க்கப்படுவதுடன், செம்பரம்பாக்கம் ஏரிக்கு நீர் ஆதாரமாக விளங்கும் பல்வேறு ஏரிகளில் இருந்தும் நீர் வரத்து தொடர்ந்து வருகிறது. இதனால், இன்னும் சில மணி நேரங்களில் செம்பரம்பாக்கம் ஏரிக்கான நீர்வரத்து மேலும் அதிகரிக்கக்கூடும் என்று பொதுப்பணித் துறை அதிகாரிகள் தெரிவிக்கின்றனர்.

இதன் காரணமாக, செம்பரம்பாக்கம் ஏரியின் நீர்மட்டம் தொடர்ந்து உயர்ந்து வருகிறது. ஏரிக்கு வரும் நீரின் அளவைப் பொதுப்பணித் துறை அதிகாரிகள் தொடர்ந்து கண்காணித்து வருகின்றனர்.

கடந்த சில மாதங்களாகப் பருவமழை இல்லாததால், செம்பரம்பாக்கம் ஏரி தொடர்ந்து வறண்ட நிலையில் காணப்பட்டது. தற்போது தொடர்ந்து மழை பெய்து வருவதால், ஏரிக்கு வரும் நீரின் அளவு அதிகரித்து, நீர்மட்டமும் வேகமாக உயர்ந்து வருகிறது.

இதையடுத்து, பொதுப்பணித் துறை அதிகாரிகள் ஒவ்வொரு மணி நேரமும் ஏரியின் நீர்மட்டத்தைக் கண்காணித்து, அதற்கேற்ப நடவடிக்கைகளை மேற்கொண்டு வருகின்றனர்.
 

இதையும் படிங்க: 16 மாவட்டங்களுக்கு குறி வைக்கும் கனமழை... இன்று எங்கெல்லாம் ருத்ரதாண்டவம் ஆடப்போகிறது தெரியுமா?