தன் அருகில் நிற்பவர் எந்தச் சமூகத்தைச் சேர்ந்தவர் என்று கூடப் பார்க்காமல், சீருடையில் அனைவரும் ஒன்றிணைந்து சமூக நீதியை நடைமுறையில் பின்பற்றும் ஒரே அமைப்பு ஆர்.எஸ்.எஸ். மட்டுமே என்று பாஜக மூத்த தலைவரும் முன்னாள் ஆளுநருமான டாக்டர் தமிழிசை சௌந்தரராஜன் தெரிவித்துள்ளார்.

1925-ஆம் ஆண்டு விஜயதசமி நாளில் தொடங்கப்பட்ட ராஷ்ட்ரிய சுயம்சேவக் சங்கம் (ஆர்.எஸ்.எஸ்.), தனது நூற்றாண்டை நிறைவு செய்து தற்போது 101-வது ஆண்டில் அடியெடுத்து வைத்துள்ளது. இந்த வரலாற்று மைல்கல்லை முன்னிட்டு, சென்னை எழும்பூர் நரியன்காடு சாலையில் தொடங்கி ராஜரத்தினம் அரங்கம் வரை தொண்டர்களின் பிரம்மாண்ட சீருடை அணிவகுப்பு நடைப்பேரணி நடைபெற்றது. இதேபோல் சென்னை மற்றும் தாம்பரம் உள்ளிட்ட 6 முக்கியப் பகுதிகளில் இந்த அணிவகுப்புப் பேரணிகள் எழுச்சியுடன் நடைபெற்றன.

எழும்பூரில் நடைபெற்ற அணிவகுப்புப் பேரணியை நேரில் பார்வையிட்ட பின் செய்தியாளர்களிடம் பேசிய டாக்டர் தமிழிசை சௌந்தரராஜன், ஆர்.எஸ்.எஸ். அமைப்பு ஒவ்வோர் ஆண்டும் எவ்வித அசம்பாவிதமும் இன்றி அமைதியான முறையில் சமுதாயச் சேவைகளை ஆற்றி வருவதாகவும், தொடர்ந்து பேரணிகளை நடத்தி வருவதாகவும் குறிப்பிட்டார். 

இதையும் படிங்க: 1925-ல் தொடங்கிய ஆர்எஸ்எஸ்!! 100 ஆண்டுகள் நிறைவு! மோகன் பாகவத்தின் உரைக்கு மோடி பாராட்டு!

ஆனால், தமிழ்நாட்டில் தற்போதைய அரசாக இருந்தாலும் சரி, இதற்கு முன்பு இருந்த அரசாக இருந்தாலும் சரி, அமைதியான இந்தப் பேரணியை நடத்துவதற்குக் கூட நீதிமன்றத்தை நாடி உத்தரவு பெற்றுத்தான் நடத்த வேண்டிய சூழல் நிலவுவது வேதனையளிப்பதாகத் தெரிவித்தார்.

தொடர்ந்து பேசிய அவர், ஆர்.எஸ்.எஸ். இயக்கம் உண்மையிலேயே சமூக நீதியைக் கடைப்பிடிக்கும் உன்னதமான அமைப்பாகச் செயல்பட்டு வருகிறது. தன் அருகில் நிற்பவர் எந்தச் சாதியைச் சேர்ந்தவர், எந்தப் பின்னணியைக் கொண்டவர் என்பதை அறியாமலேயே, ஒரே சீருடையில் கைகோர்த்து நிற்கும் அமைப்பாக இது திகழ்கிறது. 

நான் மருத்துவக் கல்லூரியில் பயின்ற காலத்தில், ஆர்.எஸ்.எஸ். அமைப்பைச் சேர்ந்த ஒருவர் ரத்த தானம் செய்தார்; அவர் தனது சொந்த முகவரியைக் கூட வெளிப்படுத்த விரும்பவில்லை. அந்த அளவிற்குத் தன்னலமற்ற முறையில் அமைதியாகச் சமுதாயத்திற்குச் சேவை செய்து வரும் வரலாற்றுச் சிறப்புமிக்க இயக்கம் ஆர்.எஸ்.எஸ் என்று பெருமிதத்துடன் தெரிவித்தார்.

இதையும் படிங்க: இந்தியாதான் இறுதி இலக்கு?! குறிவைக்கும் மேற்கத்திய நாடுகள்! RSS தலைவர் மோகன் பாகவத் வார்னிங்!