சென்னை போரூரில் அமைந்துள்ள புகழ்பெற்ற ஸ்ரீ ராமச்சந்திரா உயர் கல்வி மற்றும் ஆராய்ச்சி நிறுவனத்தின் 42-வது பட்டமளிப்பு விழா, கல்லூரி வேந்தர் வி.ஆர். வெங்கடாசலம் தலைமையில் சிறப்பாக நடைபெற்றது.

இவ்விழாவில் மத்திய அறிவியல், தொழில்நுட்பம் மற்றும் புவி அறிவியல் துறை அமைச்சர் டாக்டர் ஜிதேந்திர சிங் சிறப்பு விருந்தினராகக் கலந்துகொண்டு, பல்கலைக்கழகத் தேர்வுகளில் சிறப்பிடம் பிடித்த மாணவ, மாணவிகளுக்கு 106 தங்கப் பதக்கங்களை வழங்கினார். மேலும் மருத்துவம், பொறியியல் மற்றும் மேலாண்மைத் துறைகளைச் சேர்ந்த 2,116 மாணவ, மாணவிகளுக்கு முனைவர், முதுநிலை மற்றும் இளநிலைப் பட்டங்களை வழங்கி அவர் வாழ்த்தினார்.

நிகழ்ச்சியில் சிறப்புரையாற்றிய அமைச்சர் ஜிதேந்திர சிங், 1984-ஆம் ஆண்டு தொடங்கப்பட்ட இந்த மருத்துவ நிறுவனம் கடந்த நான்கு தசாப்தங்களில் அடைந்துள்ள மாபெரும் மருத்துவ மற்றும் கல்வி வளர்ச்சியைப் பாராட்டினார். தொடர்ந்து பேசிய அவர், 21-ஆம் நூற்றாண்டின் புதிய தொழில்நுட்பங்களான செயற்கை நுண்ணறிவு (AI), மரபணுவியல் மற்றும் குவாண்டம் தொழில்நுட்பம் ஆகியவை மருத்துவத்துறையில் புரட்சிகரமான மாற்றங்களை ஏற்படுத்தி வருவதாகக் குறிப்பிட்டார். மருத்துவர்கள் கவனிக்கத் தவறும் நுணுக்கமான தகவல்களைக் கூட செயற்கை நுண்ணறிவே பகுப்பாய்வு செய்து கொள்ளும் அளவிற்குத் தொழில்நுட்பம் அபரிமிதமான வளர்ச்சி அடைந்துள்ள போதிலும், மருத்துவப் பணியின் மனிதநேயமும் அடிப்படை அறநெறிகளும் குறைந்துவிடாமல் இந்த நவீன தொழில்நுட்பங்களைக் கையாளுவதே இன்றைய இளம் மருத்துவர்கள் முன் உள்ள முதன்மைச் சவால் என அவர் தெரிவித்தார்.

இதையும் படிங்க: போலீசுக்கு டிமிக்கி கொடுத்த போக்சோ கைதி.! குன்றத்தூரில் பதுங்கிய சுரேஷ் அதிரடி கைது..!!

தற்போதைய சுகாதாரத்துறை சந்தித்து வரும் இரட்டைச் சவால்களாக, விரிவடைந்து வரும் நோய்களின் தன்மை மற்றும் அதிகரித்து வரும் மனிதர்களின் சராசரி ஆயுட்காலம் ஆகியவற்றை அமைச்சர் சுட்டிக்காட்டினார். முந்தைய காலங்களில் காசநோய், மலேரியா போன்ற தொற்றும் நோய்களே பெரும் சவாலாக இருந்த நிலையில், தற்போது நீரிழிவு மற்றும் மாரடைப்பு போன்ற வாழ்க்கை முறை சார்ந்த தொற்றா நோய்கள் இளம் தலைமுறையினரையே அதிகம் பாதிப்பது மிகுந்த கவலையளிக்கும் விஷயமாக உருவெடுத்துள்ளது என்றார். மருத்துவ ஆராய்ச்சியில் இந்தியாவின் அபார சாதனைகளைப் பட்டியலிட்ட அவர், கோவிட் பெருந்தொற்றுக்கான உலகின் முதல் டிஎன்ஏ தடுப்பூசி, கர்ப்பப்பை வாய் புற்றுநோய்க்கான உள்நாட்டுத் தடுப்பூசி மற்றும் இந்தியாவில் உருவாக்கப்பட்ட புதிய நுண்ணுயிர் எதிர்ப்பிகள் ஆகியவற்றைப் பெருமையுடன் நினைவுகூர்ந்தார்.

மேலும், தனிப்பயனாக்கப்பட்ட மருத்துவ சிகிச்சைகளை (Personalized Medicine) பொதுமக்களுக்கு வழங்கும் நோக்கில், 'சங்கம்' திட்டத்தின் கீழ் ஒரு மில்லியன் இந்தியர்களின் மரபணுக்கள் ஆய்வு செய்யப்பட்டு வருவதாகவும் அவர் தெரிவித்தார். 2047-ஆம் ஆண்டில் 'வளர்ந்த பாரதம்' என்ற பாரதப் பிரதமரின் உன்னத இலக்கை முழுமையாக எட்ட வேண்டுமானால் இளைஞர்களின் உடல்நலமும் ஆற்றலும் இன்றியமையாதது என்று குறிப்பிட்ட அமைச்சர், எளிதில் தடுக்கக்கூடிய நோய்களால் இளம் தலைமுறையினரின் நல்வாழ்வும் ஆற்றலும் வீணாவதைத் தவிர்க்க அரசு மற்றும் தனியார் மருத்துவத் துறைகள் ஒன்றிணைந்து விழிப்புணர்வுடன் செயல்பட வேண்டும் என வலியுறுத்தினார்.

இதையும் படிங்க: மக்கள் ஆட்சியா.? ஜோதிடர் ஆட்சியா.? பட்டினப்பாக்கம் பிரச்சனை..! கிளறிய கனிமொழி MP.!!