சென்னையில் இன்று திட்டமிட்டிருந்த தேர்தல் பரப்புரையின் போது, தமிழக வெற்றிக் கழகத் தலைவர் விஜய் செல்ல வேண்டிய பாதை மாறி வேறு வழியில் சென்றதால், புரசைவாக்கம் பகுதியில் அவரது பரப்புரை திடீரென ரத்து செய்யப்பட்டது. இதனால் நீண்ட நேரமாகக் காத்திருந்த நூற்றுக்கணக்கான தொண்டர்கள் ஏமாற்றமடைந்தனர்.

இன்று மாலை தியாகராய நகர் மற்றும் ஆயிரம் விளக்கு ஆகிய தொகுதிகளில் தனது பரப்புரையை விஜய் வெற்றிகரமாக முடித்தார். அதனைத் தொடர்ந்து, எழும்பூர் தொகுதிக்கு உட்பட்ட புரசைவாக்கம் ரித்தர்ட்டன் சாலைக்கு (Ritherdon Road) அவர் வர வேண்டியிருந்தது. பரப்புரை செய்ய வேண்டிய குறிப்பிட்ட இடத்திற்கு வருவதற்குப் பதிலாக, அவரது வாகன அணிவகுப்பு வழி தவறி வேறு ஒரு பாதையில் சென்றுவிட்டது. மீண்டும் அந்த இடத்திற்குத் திரும்புவதில் காலதாமதம் மற்றும் போக்குவரத்துச் சிக்கல்கள் ஏற்பட்டதால், ரித்தர்ட்டன் சாலை பரப்புரை ரத்து செய்யப்பட்டது.

ரித்தர்ட்டன் சாலையில் விஜய்யைக் காண்பதற்காகவும், அவரது பேச்சைக் கேட்பதற்காகவும் 500-க்கும் மேற்பட்ட தவெக தொண்டர்கள் மற்றும் பொதுமக்கள் திரண்டிருந்தனர். நீண்ட நேரம் காத்திருந்த நிலையில், அவர் வரவில்லை என்ற தகவல் வெளியானதால் அனைவரும் பெரும் ஏமாற்றத்திற்கு உள்ளாகினர்.

இதையும் படிங்க: புஸ்ஸி ஆனந்தை ஆதரித்து தி. நகரில் விஜய் சூறாவளி பிரச்சாரம்..! ஆர்ப்பரிக்கும் தொண்டர்கள்..!!

இந்தத் தவறு குறித்து விளக்கம் அளித்த தமிழக வெற்றிக் கழக நிர்வாகிகள், தொண்டர்களுக்கு ஏற்பட்ட சிரமத்திற்கு வருத்தம் தெரிவித்தனர்: திட்டமிட்ட பாதையை விட்டு வாகனம் மாறிச் சென்றதால் இந்தச் சங்கடம் ஏற்பட்டுள்ளது. இதற்காகத் தொண்டர்களிடம் மன்னிப்புக் கேட்டுக்கொள்கிறோம் என அவர்கள் வேண்டுகோள் விடுத்துள்ளனர்.

சென்னையில் இன்று பல இடங்களில் விஜய்யின் பரப்புரை நடைபெற்றதால் கடும் போக்குவரத்து நெரிசல் காணப்பட்டது. ஒரு பகுதியில் ஏற்பட்ட தாமதம் மற்றும் பாதை மாற்றம் மற்ற இடங்களின் கால அட்டவணையைப் பாதித்ததே இந்தத் தவறுக்கு முக்கியக் காரணமாகக் கூறப்படுகிறது.

இந்தச் சம்பவம் தவெக நிர்வாகிகளிடையே சலசலப்பை ஏற்படுத்தியுள்ள நிலையில், இனிவரும் பரப்புரைகளில் இத்தகைய குளறுபடிகள் நடக்காமல் இருக்கத் திட்டமிடப்பட்டுள்ளது.

இதையும் படிங்க: விஜய் நேரா எதுக்கு என் தொகுதியில பரப்புரைக்கு வரணும்..? சீமான் கேள்வி..!