ஜப்பானின் நகோயாவில் நடைபெற்று வரும் 2026 ஆசிய விளையாட்டுப் போட்டிகளில் இந்தியாவின் முன்னணி பளுதூக்குதல் வீராங்கனை சைகோம் மீராபாய் சானு வரலாற்று சாதனை படைத்துள்ளார். பெண்களுக்கான 49 கிலோ எடைப் பிரிவில் வெள்ளிப் பதக்கம் வென்ற அவர், தனது நீண்டகால ஆசிய விளையாட்டுப் பதக்கக் கனவை நனவாக்கியதோடு, இந்தியாவின் பளுதூக்குதல் பிரிவில் 28 ஆண்டுகளாக நிலவி வந்த பதக்க வறட்சிக்கு முற்றுப்புள்ளி வைத்துள்ளார்.
நாகோயா சிட்டி டிரேட் அண்ட் இண்டஸ்ட்ரி சென்டரில் நடைபெற்ற போட்டியில் மீராபாய் மொத்தம் 198 கிலோ எடையைத் தூக்கி இரண்டாவது இடத்தைப் பிடித்தார். ஸ்னாட்ச் பிரிவில் 87 கிலோவும், கிளீன் அண்ட் ஜெர்க்கில் 111 கிலோவும் அவரது சிறப்பான முயற்சிகளாகும். ஸ்னாட்ச்சில் முதல் முயற்சியில் 83 கிலோ, அடுத்தடுத்து 85 மற்றும் 87 கிலோவை வெற்றிகரமாகத் தூக்கிய அவர், இந்தப் பிரிவில் மூன்றாவது இடத்தில் இருந்தார்.
கிளீன் அண்ட் ஜெர்க்கில் 107 கிலோவுடன் தொடங்கி, இரண்டாவது முயற்சியில் 111 கிலோவைத் தூக்கி பதக்கத்தை உறுதி செய்தார். தங்கப் பதக்கத்தை வடகொரியாவின் ரி சாங்-கும் கைப்பற்றினார். அவர் மொத்தம் 215 கிலோ (ஸ்னாட்ச் 94, கிளீன் அண்ட் ஜெர்க் 121) தூக்கி உலக சாதனைகளைப் படைத்தார். இது அவரது தொடர்ச்சியான மூன்றாவது ஆசிய விளையாட்டுத் தங்கமாகும்.
இதையும் படிங்க: தொடரும் பதக்க வேட்டை! ஆசிய விளையாட்டில் துப்பாக்கிச்சுடுதலில் அசத்திய இந்திய வீராங்கனைகள்!
வெண்கலப் பதக்கம் இந்தோனேசியாவின் லுலுக் டயானா திரி விஜயானாவுக்குச் சென்றது. அவர் 191 கிலோ (88+103) தூக்கினார்.32 வயதான மீராபாய்க்கு இது ஆசிய விளையாட்டுப் போட்டிகளில் கிடைக்கும் முதல் பதக்கம். முன்னதாக கிளாஸ்கோ காமன்வெல்த் போட்டியில் தனது மூன்றாவது தங்கத்தை வென்றிருந்தாலும், ஆசிய அரங்கில் பதக்கம் என்பது அவரது நீண்ட நாள் காத்திருப்பாக இருந்தது. 2023 ஹாங்க்சோ ஆசிய விளையாட்டுகளில் நான்காம் இடத்திலேயே நின்று, உடற்தகுதிப் பிரச்சினையால் பதக்க வாய்ப்பை நூலிழையில் தவறவிட்டார்.
2014 இன்சியானில் ஒன்பதாம் இடம், 2018-ல் காயம் காரணமாக கலந்துகொள்ளாதது ஆகியவை அவரது ஆசிய விளையாட்டுப் பயணத்தின் சவால்களாக இருந்தன.இந்த வெள்ளிப் பதக்கம் அவரது சாதனைப் பட்டியலை மேலும் வலுப்படுத்தியுள்ளது. டோக்கியோ ஒலிம்பிக் வெள்ளி, உலக சாம்பியன்ஷிப் தங்கம் உள்ளிட்ட மூன்று பதக்கங்கள், பல காமன்வெல்த் தங்கங்கள், ஆசிய சாம்பியன்ஷிப் வெண்கலம் ஆகியவை ஏற்கனவே அவரது வசத்தில் உள்ளன.
கர்ணம் மல்லேஸ்வரி 1998 பாங்காக்கில் வெள்ளி வென்ற பிறகு இந்தியப் பளுதூக்குதல் வீரர்/வீராங்கனை யாரும் ஆசிய விளையாட்டுப் பதக்கம் வெல்லவில்லை. மீராபாய் அந்த வரலாற்று இடைவெளியை முடித்து, ஒலிம்பிக், ஆசிய விளையாட்டு, காமன்வெல்த், உலக சாம்பியன்ஷிப் என அனைத்து முக்கிய சர்வதேசப் போட்டிகளிலும் பதக்கம் வென்ற இரண்டாவது இந்தியப் பளுதூக்குதல் வீராங்கனையாகவும் உருவெடுத்துள்ளார். தீவிர தயாரிப்புடன் களமிறங்கிய மீராபாயின் இந்த வெற்றி, இந்திய விளையாட்டு வரலாற்றில் புதிய அத்தியாயத்தைத் தொடங்கியுள்ளது.
இதையும் படிங்க: இந்தோனேசியாவை துவம்சம் செய்த இந்தியா! 17-1 என இமாலய வெற்றி! ஹாக்கியில் கோல் மழை!