திமுக முன்னாள் அமைச்சர் அன்பில் மகேஷ் பொய்யாமொழி 100 கோடி முறைகேடு வழக்கில் சென்னை மத்திய குற்றப்பிரிவு போலீசாரால் கைது செய்யப்பட்டு நள்ளிரவில் புழல் மத்திய சிறைக்கு அழைத்து வரப்பட்டார். அப்போது சிறை வாசலில் திமுக தொண்டர்கள் கூடியிருந்தனர். அவர்களில் வேலூர் மாநகராட்சி 12-வது வார்டு திமுக கவுன்சிலர் டீட்டா சரவணன் உள்ளிட்டோர் போராட்டத்தில் ஈடுபட்டனர்.

அந்த நேரத்தில் சரவணன் பேசிய வீடியோ சமூக வலைதளங்களில் பரவியது. அதில் கரூரில் வைத்து அவரை முடித்திருந்தால் இன்று இந்த நிலைமை வந்திருக்காது என அவர் குறிப்பிட்டதாகத் தெரிகிறது. இது 2025 செப்டம்பர் 27 அன்று கரூரில் தமிழக வெற்றிக் கழக பேரணியின் போது ஏற்பட்ட நெரிசலில் 41 பேர் உயிரிழந்த சம்பவத்துடன் தொடர்புபடுத்தப்பட்டு முதல்வர் விஜய் குறித்த குறிப்பாக எடுத்துக்கொள்ளப்பட்டது.

வீடியோ வெளியானதைத் தொடர்ந்து தமிழக வெற்றிக் கழகத்தினர் மற்றும் பொதுமக்கள் மத்தியில் கடும் எதிர்ப்பு எழுந்தது. இதையடுத்து புழல் போலீசார் டீட்டா சரவணன் மீது பாரதீய நியாய சன்ஹிதா (பிஎன்எஸ்) சட்டப்பிரிவுகள் 192, 296(b), 353(1), 351(3) ஆகியவற்றின் கீழ் வழக்குப்பதிவு செய்தனர்.

இதையும் படிங்க: விக்கிரவாண்டி மாநாட்டின் 2-ஆம் ஆண்டு நிறைவு: தவெக ஐடி விங் பெருமித அறிக்கை!

இதில் பொது ஊழியர்களைத் தடுத்தல், பொது அமைதியைக் குலைத்தல், மிரட்டல் உள்ளிட்ட குற்றங்கள் சேர்க்கப்பட்டுள்ளன. வழக்குப்பதிவுக்குப் பிறகு சரவணன் தலைமறைவாகிவிட்டார். அவரைக் கைது செய்ய புழல் போலீசார் மூன்று தனிப்படைகளை அமைத்து தீவிர தேடுதல் வேட்டையில் இறங்கினர்.

விசாரணையில் அவர் பெங்களூரு செல்வது போல் போக்கு காட்டிவிட்டு விழுப்புரம் மாவட்டத்திற்குச் சென்று மறைந்திருப்பது தெரியவந்தது. குறிப்பாக விழுப்புரம் மாவட்ட திமுக இளைஞரணி அமைப்புச் செயலாளர் பிரேம் என்பவர் வீட்டில் அடைக்கலம் பெற்றிருப்பதாகத் தகவல் கிடைத்தது. புழல் போலீஸ் தனிப்படைகள் விழுப்புரம் ரங்கநாதன் தெருவில் உள்ள பிரேம் வீட்டிற்குச் சென்றனர்.

அப்போது சரவணன் பிரேமுடன் நரசிங்கபுரத்தில் உள்ள எம்.எல்.டி. சங்கர் வீட்டிற்குச் சென்றது தெரியவந்தது. உடனடியாக அங்கு சென்ற போலீசார் டீட்டா சரவணன் மற்றும் அவருக்கு அடைக்கலம் கொடுத்த பிரேம் ஆகிய இருவரையும் கைது செய்து அழைத்துச் சென்றனர்.

கைதான இருவரும் விசாரணைக்காக புழல் பகுதிக்குக் கொண்டு வரப்பட்டுள்ளனர். இந்தச் சம்பவம் அரசியல் வட்டாரங்களில் பரபரப்பை ஏற்படுத்தியுள்ளது. கரூர் நெரிசல் சம்பவம் தொடர்பான விசாரணைகள் மற்றும் அரசியல் விமர்சனங்கள் தொடர்ந்து வரும் நிலையில் இந்தக் கைது நடவடிக்கை மேலும் கவனத்தை ஈர்த்துள்ளது. போலீசார் மேலும் விசாரணை நடத்தி வருகின்றனர்.

இதையும் படிங்க: செஃப் தாமு மறைவு: சமையல் கலைத் துறைக்குப் பேரிழப்பு! முதல்வர் விஜய் இரங்கல்!