அதிமுக பூத் கமிட்டி பயிற்சிக் கூட்டத்தில் அதிமுக முன்னாள் அமைச்சரும் மாநிலங்களவை உறுப்பினருமான சி.வி.சண்முகம் கலந்துக் கொண்டார். அப்போது, இலவசமாக மிக்சி, கிரைண்டர் வழங்குவது போல் மனைவியையும் இலவசமாக வழங்குவார்கள் என அதிமுக முன்னாள் அமைச்சர் சி.வி.சண்முகம் சர்ச்சைக்குரிய வகையில் பேசியதாக அமைச்சர் கீதா ஜீவன் கண்டனம் தெரிவித்துள்ளார்.
அதிமுகவுக்கு பெண்கள் மீது இருக்கும் வக்கிரமும், வன்மமும் வெளிப்பட்டிருப்பதாகவும், அடிப்படையில் மனிதராகவே இருப்பதற்கு தகுதியற்றவர் சி.வி.சண்முகம் எனவும் தெரிவித்தார். திராவிட மாடல் அரசு மக்களின் நலனுக்காகப் பல்வேறு திட்டங்களை நிறைவேற்றி வருகிறது என்றும் குறிப்பாக மகளிர் முன்னேற்றத்திற்காகப் பல திட்டங்களைச் செயல்படுத்தி வருகிறது எனவும் தெரிவித்தார் .
பொண்டாட்டிகளையும் இலவசமாகத் தருவார்கள் எனப் பெண்களை இலவசத்தோடு ஒப்பிட்டுக் கொச்சைப்படுத்தியிருக்கிறார் என்றும் ஓர் அரசியல்வாதியாக அல்ல., அடிப்படையில் ஒரு மனிதராகவே இருப்பதற்குக் கூட தகுதியற்றவர் சி.வி.சண்முகம் என்றும் சாடினார்.
இதையும் படிங்க: “குருமூர்த்தி ஒரு அரசியல் வியாபாரி”... என்னை பற்றி விமர்சிக்க தகுதியில்லை - சி.வி.சண்முகம் அட்டாக்...!
ஜெயலலிதா இருக்கும் போது சி.வி.சண்முகம் இப்படிப் பேசியிருக்க முடியுமா என்றும் அவரை இருக்கும் இடம் தெரியாமல் அரசியலில் இருந்தே அப்புறப்படுத்தியிருப்பார் ஜெயலலிதா எனவும் தெரிவித்தார். ஆளுமை இல்லாத எடப்பாடி பழனிசாமி ஒரு கண்டிப்பைக்கூடச் செய்யவில்லை என்றும் அடிமையாய் மாறிவிட்டால், எடப்பாடி பழனிச்சாமியிடம் ஆளுமையும் சூடு சொரணையும் எப்படி இருக்கும் என்றும் உங்கள் வீட்டுப் பெண்கள் எல்லாம் உங்களைப் பார்த்து என்ன நினைப்பார்கள் எனவும் கேட்டுள்ளார்.
பெண்கள் பயணம் செய்யும் மகளிர் விடியல் பயணப் பேருந்துகளை லிப் ஸ்டிக் பூசிய பேருந்துகள் எனக் கேவலமாகப் பேசியவர்தானே எதிர்க் கட்சித் தலைவர் எடப்பாடி பழனிசாமி., அவரின் அடிவருடி சி.வி.சண்முகத்தின் நாக்கில் நாராசம்தானே வரும் என்றும் சாடினார். கெட்ட வார்த்தைகளில் திட்டுவதற்குக் கூட பெண் இனத்தைப் பயன்படுத்தும் கேடு கெட்டவர் சி.வி.சண்முகம் என்றும் அதிமுகவுக்கும் அதன் கூட்டணிக் கட்சிகளுக்கும் 2026 சட்டப் பேரவைத் தேர்தலில் மக்கள் தக்கப் பதிலடிக் கொடுத்து பாடம் புகட்டுவார்கள் என அமைச்சர் கீதா ஜீவன் தெரிவித்துள்ளார்.
இதையும் படிங்க: BOMB வெச்சுருக்கோம்... EPS வீட்டுக்கு வெடிகுண்டு மிரட்டல்... பதற்றம்...!