தமிழக அரசியலில் விஜய் தலைமையிலான தமிழக வெற்றிக் கழகம் (த.வெ.க.) பெரும் எதிர்பார்ப்பை ஏற்படுத்தியுள்ளது. 2026 சட்டமன்றத் தேர்தலில் தமிழகத்தில் போட்டியிடுவதற்கு 'விசில்' சின்னத்தை தேர்தல் ஆணையம் ஒதுக்கியுள்ளது. இது கட்சியினருக்கு மிகப்பெரிய உற்சாகத்தை தந்துள்ளது. ஆனால், புதுச்சேரி யூனியன் டெரிட்டரியில் நடைபெறவிருக்கும் தேர்தலில் த.வெ.க. போட்டியிடுமா என்பது குறித்து இப்போது சந்தேகம் எழுந்துள்ளது.

தேர்தல் ஆணையத்துக்கு த.வெ.க. சார்பில் 2025 நவம்பர் மாதம் அனுப்பப்பட்ட கடிதத்தில், தமிழகத்துக்கு மட்டுமே 'விசில்' சின்னம் கோரப்பட்டுள்ளது. புதுச்சேரிக்கு தனியாக சின்னம் கேட்கப்படவில்லை என்பது தற்போது வெளியாகியுள்ளது. 

இதனால், புதுச்சேரியில் த.வெ.க. வேட்பாளர்கள் நிறுத்தினாலும், பொது சின்னமான 'விசில்' கிடைக்குமா என்பது சந்தேகமாக உள்ளது. கட்சி வட்டாரங்கள் கூறுகையில், "கடிதத்தில் புதுச்சேரி குறிப்பிடப்படவில்லை. எனவே, அங்கு தனி சின்னத்தில் போட்டியிட வேண்டியிருக்கலாம். இது குறித்து கட்சி தலைமை முடிவெடுக்கும்" என்றனர்.

இதையும் படிங்க: திமுகவின் கோட்டையை தகர்க்கும் விஜயின் பிரமாஸ்திரம்! தலையெழுத்தே மாறப்போகுது! ஹைஸ்பீடில் தவெக!

இதற்கு முக்கிய காரணமாக, புதுச்சேரி முதல்வர் என். ரங்கசாமியுடன் விஜய் நெருக்கமாக இருப்பது கூறப்படுகிறது. ரங்கசாமியை எதிர்த்து போட்டியிட வேண்டாம் என்பதற்காகவே, புதுச்சேரியை கடிதத்தில் சேர்க்காமல் விட்டுவிட்டதாக கட்சியினர் தெரிவிக்கின்றனர்.

விஜய் தலைமையிலான த.வெ.க. தமிழகத்தில் அனைத்து தொகுதிகளிலும் போட்டியிடுவதாக அறிவித்துள்ள நிலையில், புதுச்சேரியில் தனித்து போட்டியிடுவதா அல்லது கூட்டணி வைப்பதா என்பது இன்னும் தெளிவாகவில்லை.

முன்பு புதுச்சேரியில் த.வெ.க. பொதுக்கூட்டங்கள் நடத்தப்பட்டன. விஜய் அங்கு கலந்துகொண்டு பேசியபோது, 2026-ல் புதுச்சேரியிலும் ஆட்சி அமைப்போம் என்று தொண்டர்களுக்கு உற்சாகம் ஊட்டினார். ஆனால், சின்னம் கோரிக்கை இல்லாதது புதிய கேள்விகளை எழுப்பியுள்ளது. தேர்தல் நெருங்கும் நிலையில், த.வெ.க. தலைமை இதுகுறித்து விரைவில் முடிவெடுக்கும் என எதிர்பார்க்கப்படுகிறது.

இந்த முடிவு புதுச்சேரி அரசியலை பெரிதும் பாதிக்கும். ரங்கசாமி ஆட்சியை எதிர்த்து போட்டியிடாமல் இருப்பது த.வெ.க.வுக்கு புதிய உத்தியா? அல்லது வேறு திட்டமா? அனைவரும் காத்திருக்கின்றனர். விசில் சத்தம் தமிழகத்துடன் புதுச்சேரியிலும் ஒலிக்குமா என்பது விரைவில் தெரியவரும்.

இதையும் படிங்க: விஜய்க்கு தீராத தலைவலி!! தவெகவில் உச்சக்கட்ட உட்கட்சி மோதல்!! எச்சரித்தும் அடங்காத நிர்வாகிகள்!