2014-ம் ஆண்டு வெளியான ‘வருத்தப்படாத வாலிபர் சங்கம்’ திரைப்படம், நடிகர் சிவகார்த்திகேயனின் திரைப்பட வாழ்க்கையில் ஒரு முக்கியமான திருப்புமுனையாக அமைந்தது. எளிமையான கிராமத்து பின்னணியில், காதலும், நகைச்சுவையும் கலந்து உருவாக்கப்பட்ட இந்த படத்தில், சிவகார்த்திகேயனும், ஸ்ரீதிவ்யாவும், சூறாவளி போல் இருந்த சூரியும், ரசிகர்களை வெகுவாக கவர்ந்தனர். இந்தப் படத்தின் முக்கிய அம்சங்களில் ஒன்று, 'ஊதா கலர் ரிப்பன்...' என்ற பாடல். இது ரசிகர்களிடையே பெரிய வரவேற்பைப் பெற்றது. இசை, பாடல் வரிகள், நடனம், மற்றும் வண்ணமயமான காட்சிகள் என அனைத்தும் இந்த பாடலின் வெற்றிக்கு காரணமாக இருந்தது. குறிப்பாக, இந்தப் பாடலில், சிவகார்த்திகேயன் “ஊதா கலர் ரிப்பன்...” என்று பாடும் போது, அவர் கையில் நீல நிற ரிப்பன் வைத்திருப்பது நம் அனைவருக்கும் தெரிந்ததே.

ஆனால் இதனை இப்பொழுது கவனித்த ஜேம்ஸ் வசந்தன் இந்த காட்சியைக் குறித்து தற்போது தனது சமூக ஊடக பதிவில், கடுமையாக விமர்சித்து தனது கண்டனத்தை தெரிவித்துள்ளார். அதன்படி அவர் பதிவில், " ஏதோ ஒன்றைத் தேடிக்கொண்டிருந்தபோது இந்த ‘ஊதா கலர் ரிப்பன்’ காட்சி என் கண்களில் பட்டது. இதில், ‘ஊதா’ என்று சொல்வதுடன், கையில் நீல நிற ரிப்பன் வைத்துக்கொண்டு பாடுகிறார் சிவகார்த்திகேயன். இது ஒரு தவறான தகவலை பரப்பும் செயல். தமிழறியாத படைப்புக்குழு ஒன்று சேர்ந்து இப்படிச் செய்துவிட்டது போல தெரிகிறது. இது தலைமுறையொன்றுக்கு தவறான கல்வியை கற்பிக்கிறது. வெட்கக்கேடு.. ஊதா என்பது Purple அல்லது Violet நிறம். இது சிவப்பு + நீலம் கலந்த ஒரு கத்தரிக்காய் நிறம். இது மிக தெளிவான விஷயம்.

ஆனால் இப்போது இந்த காட்சியைக் கண்ட கோடிக்கணக்கான மக்கள், ‘ஊதா என்பது நீலம்’ என்ற தவறான புரிதலை பெற்றிருப்பார்கள். அதில் சிறுவர்கள் என்ன செய்வார்கள்" என எழுத்துப்பூர்வமாக தனது வருத்தத்தையும் கோபத்தையும் பதிவு செய்துள்ளார்.  இப்படி இருக்க தமிழ் மொழியில் 'ஊதா' எனப்படும் நிறம், Purple/Violet நிறத்தை குறிக்கும். இது சிவப்பு மற்றும் நீல நிறங்களை கலந்து பெறும் ஒரு இடைநிறம். இது கத்தரிக்காய், வெண்கிழங்கு வகைகள், சில பூக்கள் ஆகியவற்றின் நிறம் போன்றது. ஆனால் பெரும்பாலான மக்கள், குறிப்பாக பழைய பாடல்களில் கூட, ஊதா என்பதை நீலமாகப் பொருள் கொள்ளும் பழக்கம் இருந்து வந்துள்ளது. இதுபோன்ற நிற விஷயங்களில், ஒவ்வொரு கலாச்சாரமும், மொழியும், சில சமயங்களில் குழப்பங்களைக் கொண்டிருக்கலாம் என்பது உண்மை தான். ஆனால், திரைப்படங்கள் மற்றும் பாடல்களால், இது போன்ற தவறான புரிதல்கள் விரைவாக பரவக்கூடியது என்பதால், அதற்கான பொறுப்பும் இருக்க வேண்டியது அவசியம்.

இதையும் படிங்க: பட வாய்ப்புகள் குறைந்ததால் கிளாமர் பக்கம் திரும்பிய நடிகை நந்திதா ஸ்வேதா..!

ஆகவே இப்போது இந்த குற்றச்சாட்டுகள் சமூக ஊடகங்களில் பரவி வருகின்றன. ரசிகர்கள், ஜேம்ஸ் வசந்தனின் கருத்தை ஆதரிக்கும் வகையில் “நிற உண்மை” பற்றி விவாதிக்கின்றனர். சிலர், இது ஒரு சின்ன விஷயம் என்றும், பாட்டு ஒரு கற்பனைச் சூழ்நிலையைச் சொல்லும் என்பதற்காக அதிகமாக ஆழமாகப் பார்க்க வேண்டாம் என்றும் கருத்து தெரிவிக்கின்றனர். ஆகவே திரைப்பட இயக்குனர் பொன் ராம், இசையமைப்பாளர் டி.இமான் அல்லது சிவகார்த்திகேயன் ஆகியோரிடமிருந்து இதுவரை இந்த குற்றச்சாட்டுக்கு பதில் வரவில்லை. ஜேம்ஸ் வசந்தனின் பதிவு முக்கியமாக குழந்தைகள் குறித்த கவலையை வெளிக்காட்டுகிறது. இன்று, யூடியூப், பாடல்களுக்கான வீடியோக்கள் மற்றும் பாடல் வரிகள், குழந்தைகளுக்கு மிகவும் எளிமையாகக் கிடைக்கும் வகையில் உள்ளது. அவர்கள் அந்தக் காட்சிகளை பார்த்து, கேட்டுப் பழகும் போதே தவறான நிறங்களை புரிந்துகொள்வது கல்வி ரீதியாகவும், மொழி ஞானத்திற்கும் பாதிப்பைக் கொடுக்கக்கூடும். அதனால், ஓவிய வகுப்புகள், வண்ண விளக்கம், வசதியான கல்வி செயலிகள் ஆகியவற்றின் உதவியால், குழந்தைகளுக்கு உண்மையான வண்ணங்களைத் தெளிவாகக் கற்றுத்தர வேண்டும் என்பதே அவரது எண்ணமாகத் தெரிகிறது. இது ஒரு சாதாரண பாடல் காட்சி என்பதைவிட, நிற அறிவியல், மொழிப் பரிமாற்றம், மற்றும் பொதுவாகக் கருத்து பரிமாற்றங்களில் ஏற்படும் குழப்பங்களை சுட்டிக்காட்டும் ஒரு உணர்ச்சிகரமான விவாதமாக மாறியுள்ளது. நிறங்களைச் சரியாக பயன்படுத்துவது, குறிப்பாக குழந்தைகள் பார்க்கும் ஊடகங்களில், மிகவும் முக்கியமானது என்பதை ஜேம்ஸ் வசந்தன் தனது பதிவு மூலம் நினைவூட்டியிருக்கிறார்.

இந்த விவகாரத்தில், படக்குழு பதில் அளிக்குமா? அல்லது, இது ஒரு 'பாடலுக்குள் வந்த கற்பனையின் சுதந்திரம்' என எளிதாகத் தட்டிக்கழிக்கப்படுமா என்பதை வருகிற நாட்களில் பார்க்க வேண்டியது அவசியமாக மாறியுள்ளது.

இதையும் படிங்க: சிகப்பு நிற மாடன் உடையில் கலக்கும் பிரபல பிக்பாஸ் நடிகை சாக்ஷி அகர்வால்..!