காலையில் எழுந்ததும் வெறும் வயிற்றில் எடுத்துக்கொள்ளும் உணவுகள் உடலின் அடிப்படை செயல்பாடுகளை நேரடியாக பாதிக்கின்றன. இரவு முழுவதும் ஓய்வில் இருந்த உடல், புதிய நாளின் தொடக்கத்தில் சரியான ஊட்டச்சத்தைப் பெறும்போது செரிமானம், இரத்த சர்க்கரை கட்டுப்பாடு, கொழுப்பு அளவு மற்றும் குடல் இயக்கம் ஆகியவை சீராக இருக்கின்றன. 

சமீபகாலமாக சமூக ஊடகங்களில் பல தவறான பரிந்துரைகள் பரவி வருகின்றன. இதனால் மக்கள் குழப்பமடைகின்றனர். இந்நிலையில் சித்த மருத்துவ அறிவும் நவீன ஆராய்ச்சிகளும் இணைந்த வகையில் மருத்துவர் ஒருவர் காலையில் வெறும் வயிற்றில் எடுத்துக்கொள்ளத் தகுதியான 15 உணவுகளை விளக்கியுள்ளார்.

முதலில் வெதுவெதுப்பான நீரைக் குடிப்பது அவசியம். இரவு முழுவதும் நீர் உட்கொள்ளாததால் உடல் நீரற்ற நிலையில் இருக்கும். வெதுவெதுப்பான நீர் செரிமான அக்னியைத் தூண்டி வயிற்றைத் தயார்படுத்துகிறது. கொழுப்பு குறையும் என்ற கருத்துக்கு வலுவான ஆதாரங்கள் இல்லை என்றாலும், நீரேற்றம் மற்றும் செரிமானத்திற்கு இது அடிப்படை.

இதையும் படிங்க: சாப்பிட்ட பிறகு இந்தத் தவறுகளை செய்கிறீர்களா? 90% பேர் அறியாமல் செய்யும் பழக்கங்கள்!!

துளசி இலைகளை மென்று சாப்பிடுவதோ அல்லது நீரில் போட்டுக் குடிப்பதோ நோயெதிர்ப்பு சக்தியை உயர்த்துகிறது. இரத்த சர்க்கரை மற்றும் மன அழுத்தத்தைக் குறைக்க உதவுவதாக ஆய்வுகள் கூறுகின்றன. கறிவேப்பிலை 4-5 இலைகளை மென்று உட்கொண்டால் செரிமானம் மேம்படுவதோடு இரும்புச்சத்தும் ஹீமோகுளோபினும் அதிகரிக்கின்றன. தலைமுடி ஆரோக்கியத்திற்கும் இது பயனளிக்கிறது.

சீரகத்தை இரவு ஊறவைத்து காலையில் வடிகட்டிக் குடித்தால் வாயு, அஜீரணம் மற்றும் வயிற்று உப்புசம் குறையும். சித்த மருத்துவத்தில் செரிமான பிரச்சனைகளுக்கு இது மருந்தாகக் கருதப்படுகிறது. எடை மற்றும் கொழுப்பு கட்டுப்பாட்டிற்கும் ஆரம்பகட்ட ஆராய்ச்சிகள் ஆதரவு தெரிவிக்கின்றன. 

இஞ்சி நீரும் குமட்டல் மற்றும் வாந்தியைத் தடுக்கும். ஆனால் அல்சர் அல்லது அமிலத்தன்மை உள்ளவர்கள் தவிர்க்க வேண்டும். தயிர், இஞ்சி, கறிவேப்பிலை சேர்த்து தயாரிக்கும் மோர் வயிற்றைக் குளிர்வித்து ப்ரோபயாட்டிக் கிருமிகளால் குடல் ஆரோக்கியத்தை மேம்படுத்துகிறது. அமிலத்தன்மை உள்ளவர்கள் காலை உணவுக்குப் பிறகு எடுத்துக்கொள்ளலாம். 

முளைக்கட்டிய பச்சைப் பயறுகளில் புரதம், வைட்டமின் சி மற்றும் நார்ச்சத்து நிறைந்துள்ளன. வயிற்று உப்புசம் உள்ளவர்களும் முதியோரும் வேகவைத்து உண்ணலாம். ஊறவைத்த கொண்டைக்கடலை புரதம் மற்றும் நார்ச்சத்துடன் குறைந்த கிளைசீமிக் குறியீட்டைக் கொண்டுள்ளதால் சர்க்கரை அளவை மெதுவாக உயர்த்துகிறது. 

ஊறவைத்த பேரிச்சம்பழம் இரும்பு மற்றும் நார்ச்சத்தை அளிக்கும். சர்க்கரை நோயாளிகள் ஒரு பழமாகக் கட்டுப்படுத்திக் கொள்ளலாம். கருப்பு உலர் திராட்சையும் நார்ச்சத்து, இரும்பு மற்றும் ஆன்டிஆக்ஸிடன்ட்களுடன் மலமிளக்கியாகச் செயல்படும். சர்க்கரை நோயாளிகள் அளவாக எடுக்க வேண்டும். பப்பாளி நார்ச்சத்து மற்றும் பப்பாயின் என்ற நொதியால் வயிறு மற்றும் குடலைச் சுத்தப்படுத்துகிறது. 

முருங்கை இலை சூப் இரத்த சோகைக்கு உதவுவதோடு நீரிழிவுக்கு முந்தைய நிலையைக் கட்டுப்படுத்தும் ஆற்றல் கொண்டது. நெல்லிக்காய் மூன்று தோஷங்களையும் சமன் செய்து கொழுப்பு மற்றும் சர்க்கரை அளவைக் குறைக்க உதவுகிறது. வெந்தயத்தை ஊறவைத்து உட்கொண்டால் சர்க்கரை கட்டுப்பாடு கிடைக்கும். ஊறவைத்த பாதாம் ப்ரீ-டயாபட்டிஸ் உள்ளவர்களுக்கு சர்க்கரை உயர்வைத் தடுத்து எடை மற்றும் கொழுப்பைக் குறைக்க உதவுகிறது.

இந்த உணவுகளைத் தினசரி பழக்கத்தில் சேர்த்துக் கொள்வதன் மூலம் இயற்கையான முறையில் உடல்நலத்தை மேம்படுத்தலாம். தனிப்பட்ட உடல்நிலைக்கு ஏற்ப மருத்துவரின் ஆலோசனை பெற்றுப் பயன்படுத்துவது சிறந்தது.

இதையும் படிங்க: டார்க் சாக்லேட் பிரியர்களே..!! அதிகம் சாப்பிட்டால் இதெல்லாம் நடக்கலாம்! உஷார்..!!