ஏ.ஆர். ரகுமானின் இசைப்பயணம் ஒரு அற்புதமான கதை போன்றது. இசையின் மாயையால் உருவான ஒரு புரட்சி, உலகளாவிய அங்கீகாரம் பெற்ற ஒரு பயணம். தொண்ணூறுகளின் தொடக்கத்தில் விளம்பரங்களுக்கு ஜிங்கிள்கள் இசையமைத்தார். பின்னர், தனது வீட்டு பின்புறத்தில் பஞ்சதன் ரெக்கார்ட் இன் என்ற ஸ்டூடியோவை அமைத்தார். 1992-இல் மணிரத்னம் இயக்கிய ரோஜா திரைப்படத்திற்கு இசையமைத்தது அவரது வாழ்வின் மிகப்பெரிய திருப்புமுனை. அந்த இசை இந்திய திரை இசையை முற்றிலும் மாற்றியமைத்தது. பாரம்பரிய இந்திய இசை, மேற்கத்திய இசை, எலக்ட்ரானிக் சவுண்டுகளை இணைத்த அவரது பாணி உலகையே திரும்பிப் பார்க்க வைத்தது.

ரோஜாவிற்கு முதல் தேசிய விருது கிடைத்தது.அதன் பிறகு, பாம்பே, காதலன், திருடா திருடா, ரங்கீலா, தாள், லகான், ஸ்வதேஸ், ரங்க் தே பசந்தி, குரு, ஜோதா அக்பர் போன்ற படங்களின் இசை உலகளாவிய புகழ் பெற்றது. தமிழ், ஹிந்தி, தெலுங்கு, மலையாளம் என பல மொழிகளில் இசையமைத்தார். 2008-இல் டேனி போய்ல் இயக்கிய ஸ்லம்டாக் மில்லியனர் படத்திற்கு இசையமைத்து, இரண்டு ஆஸ்கார் விருதுகளை வென்றார். இது இந்திய இசை உலகிற்கு மிகப்பெரிய மைல்கல்.

ஹாலிவுட்டில் 127 அவர்ஸ், மில்லியன் டாலர் ஆர்ம், தி ஹண்ட்ரெட்-புட் ஜர்னி போன்ற படங்களுக்கு இசையமைத்தார். தியேட்டரில் பாம்பே ட்ரீம்ஸ் போன்றவற்றுக்கும் பங்களித்தார். சுமார் 175-க்கும் மேற்பட்ட படங்களுக்கு இசையமைத்துள்ளார். 7 தேசிய விருதுகள், பத்மஸ்ரீ, பத்ம விபூஷண், பல கிராமி, கோல்டன் க்ளோப், பாஃப்டா விருதுகள் பெற்றுள்ளார். "மோஸார்ட் ஆஃப் மெட்ராஸ்" என்று உலகம் அழைக்கும் ரகுமான், இசையை மட்டுமல்ல, மனிதாபிமானத்தையும் வளர்த்தார். கே.எம். மியூசிக் கன்சர்வேட்டரியை நிறுவினார்.சமீப காலங்களில் பொன்னியின் செல்வன், ஆடுஜீவிதம், அமர் சிங் சம்கிலா, சாவா போன்ற படங்களுக்கு இசையமைத்தார். 

இதையும் படிங்க: சூரிய மின்சக்தி கருவி... வாக்குறுதி என்னாச்சு? தமிழக வெற்றி கழகம் சரமாரி கேள்வி...!

எண்ணற்ற சாதனைகள் புரிந்த இசை புயல் ஏ.ஆர். ரகுமான் இன்று தனது பிறந்த நாளை கொண்டாடுகிறார். அவருக்கு தமிழக முதலமைச்சர் ஸ்டாலின் பிறந்தநாள் வாழ்த்துக்களை தெரிவித்துள்ளார். இசையால் எல்லைகளைக் கடந்து, எட்டுத்திக்கும் ஆளும் அன்பு இளவல் இசைப்புயல் A.R. ரஹ்மானுக்கு இனிய பிறந்தநாள் நல்வாழ்த்துகள் என்று கூறினார். உங்களது இசையைப் போலவே நீங்களும் என்றும் இளமையோடும் துள்ளலோடும் திகழ்ந்து, தொடர்ந்து சாதனைகளைப் படைத்திட விழைகிறேன் என்று தெரிவித்தார். 

இதையும் படிங்க: பட்டியலினத்தவர் தனித் குடித்தனம் போனா கான்கிரீட் வீடு..! இபிஎஸ் கொடுத்த வாக்குறுதி..!