தாராபுரம் தொகுதி இடைத்தேர்தலின்போது தொடரப்பட்ட வழக்கைக் காரணம் காட்டி, நாம் தமிழர் கட்சியின் வேட்பாளர் திருமிகு. கார்த்திகா அவர்களைத் தமிழக வெற்றிக் கழக அரசு கைது செய்திருப்பது வன்மையான கண்டனத்திற்குரியது என்றும், த.வெ.க. அரசு எதிர்க்கட்சிகளை ஜனநாயக விரோதமாக ஒடுக்கும் நோக்கிலேயே தொடர்ந்து செயல்பட்டு வருகிறது என்றும் திமுக துணைப் பொதுச்செயலாளரும் தூத்துக்குடி நாடாளுமன்ற உறுப்பினருமான கனிமொழி தெரிவித்துள்ளார்.

திருப்பூர் மாவட்டம் தாராபுரம் சட்டமன்றத் தொகுதி இடைத்தேர்தல் பிரச்சாரத்தின்போது ஏற்பட்ட மோதல் மற்றும் சாலை மறியல் விவகாரத்தில் தொடரப்பட்ட வழக்கின் அடிப்படையில், நாம் தமிழர் கட்சியின் மகளிர் பாசறை மாநில ஒருங்கிணைப்பாளரும், அத்தொகுதி வேட்பாளருமான கார்த்திகாவை அவரது கோயம்புத்தூர் இல்லத்தில் வைத்துக் காவல்துறையினர் கைது செய்துள்ளனர். இக்கைது நடவடிக்கை தமிழக அரசியல் களத்தில் பெரும் சலசலப்பை ஏற்படுத்தியுள்ளது.

இந்நிலையில், இக்கைது நடவடிக்கைக்குக் கடும் எதிர்ப்புத் தெரிவித்து திமுக எம்பி கனிமொழி தனது அதிகாரப்பூர்வ சமூக வலைதளப் பக்கத்தில் வெளியிட்டுள்ள அறிக்கையில் குறிப்பிட்டிருப்பதாவது தாராபுரம் தொகுதி இடைத்தேர்தலின்போது தொடரப்பட்ட வழக்கைக் காரணம் காட்டி, நாம் தமிழர் கட்சியின் வேட்பாளர் திருமிகு. கார்த்திகா அவர்களைத் த.வெ.க. அரசு கைது செய்திருப்பது வன்மையான கண்டனத்திற்குரியது. கொள்கை முரண்பாடுகள் இருந்தாலும், திராவிட முன்னேற்றக் கழக ஆட்சியில் ஜனநாயக வழியிலேயே அவர்கள் மீதான விமர்சனங்கள் முன்வைக்கப்பட்டன. ஆனால், தற்போதைய த.வெ.க. அரசு எதிர்க்கட்சிகளை ஒடுக்கும் நோக்கிலேயே அதிகாரத்தைத் தவறாகப் பயன்படுத்திச் செயல்பட்டுக் கொண்டிருக்கிறது.

இதையும் படிங்க: சட்ட நடவடிக்கையா.? திட்டமிட்ட பழிவாங்கலா.? கார்த்திகா கைது..! வேல்முருகன் எதிர்ப்பு..!!

தமிழ்நாட்டில் சட்டம் ஒழுங்குச் சீர்கேடு, தொடர் மின்வெட்டு, அத்தியாவசியப் பொருட்களின் விலைவாசி உயர்வு என நாள்தோறும் பொதுமக்கள் பல்வேறு இன்னல்களுக்கு ஆளாகி வருகின்றனர். இத்தகைய சூழலில், மாற்றுக் கட்சியினரையும் எதிர்க்கட்சிகளையும் ஒடுக்குவதில் மட்டுமே முழு கவனம் செலுத்துவதை அரசு உடனடியாக நிறுத்திக்கொள்ள வேண்டும். மக்கள் சந்தித்து வரும் அடிப்படைப் பிரச்சினைகளுக்கு முன்னுரிமை அளித்துத் தீர்த்து, முறையான நல்லாட்சியை நடத்த வேண்டும்" என்று அவர் வலியுறுத்தியுள்ளார்.

இதையும் படிங்க: #BREAKING: தாராபுரத்தில் பதற்றம்..! நாதக கார்த்திகாவிடம் விசாரணை..! காவல் நிலையத்தில் குவியும் நாதகவினர்..!