அகமதாபாத்: குஜராத் மாநிலம் பரூச் மாவட்டத்தில் உள்ள ரசாயனத் தொழிற்சாலையில் ஏற்பட்ட பயங்கர வெடிப்பில் 5 தொழிலாளர்கள் உயிரிழந்தனர். மேலும், 6 பேர் காயமடைந்ததாகத் தகவல்கள் வெளியாகியுள்ளன.
நள்ளிரவில் நிகழ்ந்த இந்த விபத்தைத் தொடர்ந்து வாயுக் கசிவு ஏற்பட்டு, தொழிற்சாலை வளாகம் முழுவதும் புகை மண்டலமாகக் காட்சியளித்தது. விபத்துக்கான காரணம் குறித்து அதிகாரிகள் விசாரணை நடத்தி வருகின்றனர்.
பரூச் மாவட்டத்தின் வாக்ரா தாலுகாவில் உள்ள சய்கா ஜிஐடிசி தொழிற்பேட்டையில் செயல்பட்டு வரும் சின்ஜீல் பார்மாகெம் (SynZeal Pharmachem) நிறுவனத்தில் வெள்ளிக்கிழமை இரவு சுமார் 10 மணியளவில் இந்த விபத்து நிகழ்ந்துள்ளது. மருந்து தயாரிப்புக்குத் தேவையான மூலப்பொருட்களை உற்பத்தி செய்யும் இந்த ஆலையில், ஹைட்ரஜனேற்றச் செயல்முறை நடைபெற்றுக் கொண்டிருந்தபோது, 15 கிலோ லிட்டர் கொள்ளளவு கொண்ட உலையில் திடீரென வெடிப்பு ஏற்பட்டதாக அதிகாரிகள் தெரிவித்துள்ளனர்.
இதையும் படிங்க: நரேந்திர மோடி மைதானத்தை குறிவைத்து வெடிகுண்டு மிரட்டல்! அகமதாபாத்தில் பரபரப்பை ஏற்படுத்திய இ-மெயில்!
வெடிப்பின் தாக்கம் மிகவும் வலுவாக இருந்ததால், உலையின் பாகங்கள் சிதறியதுடன், தொழிற்சாலைக்குள் இருந்த இயந்திரங்களின் பகுதிகளும் சிதறிக் கிடந்ததாகக் கூறப்படுகிறது. இதைத் தொடர்ந்து மெத்திலீன் டைகுளோரைடு (MDC) வாயு கசிவு ஏற்பட்டதாகத் தகவல்கள் தெரிவிக்கின்றன. இதனால் அப்பகுதியில் புகை மற்றும் மங்கலான சூழல் உருவானது. தொழிலாளர்களுக்கு கண் எரிச்சல், மூச்சுத்திணறல் உள்ளிட்ட பாதிப்புகள் ஏற்பட்டதாகக் கூறப்படுகிறது.
விபத்து குறித்த தகவல் கிடைத்ததும் காவல்துறையினர், தீயணைப்புப் படையினர் மற்றும் மாவட்ட நிர்வாக அதிகாரிகள் சம்பவ இடத்துக்கு விரைந்தனர். உயிரிழந்தவர்களின் உடல்கள் மீட்கப்பட்டு மருத்துவமனைக்குக் கொண்டு செல்லப்பட்டன. காயமடைந்தவர்கள் சிகிச்சைக்காக மருத்துவமனைகளில் அனுமதிக்கப்பட்டனர்.
இந்த விபத்தில் உயிரிழந்தவர்களில் குஜராத்தைச் சேர்ந்த தொழிலாளர்களும், உத்தரப் பிரதேசத்தைச் சேர்ந்தவர்களும் அடங்குவதாக அதிகாரிகள் தெரிவித்துள்ளனர். பாதிக்கப்பட்டவர்களின் குடும்பத்தினருக்குத் தகவல் தெரிவிக்கும் பணிகளும் மேற்கொள்ளப்பட்டன.
இதற்கிடையே, குஜராத் மாசுக் கட்டுப்பாட்டு வாரியம் மற்றும் தொழில்துறை பாதுகாப்பு, சுகாதார இயக்குநரக அதிகாரிகள் சம்பவ இடத்தில் ஆய்வு மேற்கொண்டு வருகின்றனர். வெடிப்பு ஏற்பட்டதற்கான துல்லியமான காரணம் இன்னும் உறுதி செய்யப்படவில்லை. தொழிற்சாலையில் பாதுகாப்பு நடைமுறைகள் முறையாகப் பின்பற்றப்பட்டனவா என்பது உள்ளிட்ட அம்சங்களும் விசாரணைக்கு உட்படுத்தப்படலாம்.
தொழிற்பேட்டையில் நிகழ்ந்த இந்த விபத்து தொழிலாளர்களின் பாதுகாப்பு குறித்த கவலையை மீண்டும் எழுப்பியுள்ளது. விசாரணை முடிவடைந்த பின்னரே விபத்துக்கான முழுமையான காரணங்கள் தெரியவரும் என எதிர்பார்க்கப்படுகிறது.
இதையும் படிங்க: தடுப்பூசி முகாமில் குழந்தைகளுக்கு தவறாக வழங்கப்பட்ட மருந்து!! 5 குழந்தைகள் ICU! சூரத்தில் அதிர வைத்த சம்பவம்!