தமிழ்நாட்டில் முதலமைச்சர் ச. ஜோசப் விஜய் தலைமையிலான தவெக அரசு ஆட்சிப் பொறுப்பேற்ற கடந்த ஐந்து மாத காலத்திற்குள், நிர்வாக ரீதியாக அறிவிக்கப்படும் முக்கிய முடிவுகள் அனைத்தும் அடுத்தடுத்து அவசர அவசரமாகத் திரும்பப் பெறப்பட்டு 'யு-டர்ன்' அடிக்கப்படுவதைப் பார்க்கும்போது, உண்மையில் தமிழ்நாடு அரசு நிர்வாகத்தில் என்னதான் நடக்கிறது என்ற மிகப்பெரிய சந்தேகமும் அதிர்ச்சியும் பொதுமக்களிடையே எழுந்துள்ளதாகவும், தமிழக அரசில் எடுக்கப்படும் ஒவ்வொரு முடிவும் முதல்வரின் கவனத்திற்கும் ஒப்புதலுக்கும் சென்றுதான் எடுக்கப்படுகிறதா அல்லது முதல்வருக்கே தெரியாமல் அதிகார வர்க்கம் தன்னிச்சையாக முடிவுகளை எடுக்கிறதா என்ற அடுக்கடுக்கான கேள்விகளை முன்வைத்து பாரதிய ஜனதா கட்சியின் மூத்த தலைவர் திரு. கே. அண்ணாமலை அவர்கள் இன்று மிகக் காட்டமான அறிக்கையை வெளியிட்டுள்ளார்.

தமிழக அரசு அண்மையில் அறிவித்த சட்டம் ஒழுங்கு தொடர்பான தகவல் அறியும் உரிமைச் சட்ட (RTI) விலக்கு அரசாணையை மக்கள் எதிர்ப்புக்குப் பணிந்து வாபஸ் பெற்ற சூழலில், தவெக அரசின் ஐந்து மாத காலப் பின்வாங்கல் பட்டியலைத் தோலுரித்து அண்ணாமலை வெளியிட்டுள்ள விரிவான அறிக்கையில், "தவெக ஆட்சிக்கு வந்த இந்த குறுகிய ஐந்து மாதங்களில் அரசு எடுத்த பல்வேறு கொள்கை முடிவுகள், கடும் எதிர்ப்பு எழுந்த உடனேயே அடுத்தடுத்துக் கைவிடப்பட்டுள்ளது அதிர்ச்சியளிக்கிறது. 

முதலமைச்சரின் அரசியல் பிரிவு சிறப்பு அதிகாரி நியமனம் முதல், லஞ்ச ஒழிப்பு மற்றும் ஊழல் தடுப்புத்துறை (DVAC) இயக்குநர் மாற்றம், ஆவின் பால் மொத்த விற்பனையாளர்களுக்கான அதிரடி விலை உயர்வு, கல்லூரி மாணவர்கள் ஜனநாயகப் போராட்டங்களில் பங்கேற்பதற்குக் கொண்டுவரப்பட்ட அடக்குமுறைக் கட்டுப்பாடுகள், மற்றும் தற்போது வெடித்துள்ள சட்டம் ஒழுங்கு தொடர்பான ஆர்டிஐ விலக்கு விவகாரம் வரை, முதலில் ஒரு முடிவை அறிவிப்பதும், அதற்கு நாலாபுறமும் கடும் எதிர்ப்பு கிளம்பியதும் உடனடியாக அந்த முடிவை வாபஸ் பெறுவதும் ஒரு வழக்கமான நாடகமாகவே மாறிவிட்டது" என்று மிகக் காரசாரமாகச் சாடியுள்ளார்.

இதையும் படிங்க: “எங்கள் ஆதரவில் தான் தவெக ஆட்சி... அதற்காக சகலத்திற்கும் ஆதரவா?”.. சிபிஎம் பெ.சண்முகம் கேள்வி

மேலும், அரசின் தலைமைச் செயலக நிர்வாகக் குளறுபடிகளை மிகக் கடுமையாக விமர்சித்துள்ள அவர், "ஒரு மாநிலத்தின் மிக முக்கியமான இத்தகைய நிர்வாக முடிவுகள் அனைத்தும் முதலமைச்சர் விஜய் அவர்களின் நேரடி ஒப்புதலுக்குப் பிறகுதான் எடுக்கப்படுகிறதா அல்லது முதலமைச்சருக்குத் தெரியாமலேயே தலைமைச் செயலகத்தில் உள்ள அதிகார மையங்கள் இந்த முடிவுகளைத் திணிக்கின்றனவா என்ற நியாயமான சந்தேகம் மக்களுக்கு எழுகிறது. 

எந்தவொரு தொலைநோக்குப் பார்வையும் திட்டமிடலும் இன்றி அவசர அவசரமாகத் தவறான முடிவுகளை அறிவித்துவிட்டு, பின்னர் மக்கள் கொந்தளித்தவுடன் பின்வாங்குவது தவெக அரசின் நிர்வாகத்தில் நிலவும் அப்பட்டமான தெளிவின்மையையும், குழப்பத்தின் உச்சத்தையும் காட்டுகிறது. ஒரு ஜனநாயக அரசு கொள்கை முடிவுகளை இறுதி செய்வதற்கு முன்பாக, அதன் சட்டரீதியான அம்சங்கள், நிர்வாக நடைமுறைகள் மற்றும் பொதுமக்களுக்கு ஏற்படும் தாக்கங்களை முழுமையாக ஆய்வு செய்வது அடிப்படை கடமையாகும். எனவே, தவெக அரசு தங்களது முடிவெடுக்கும் முறையில் அதிக கவனத்தோடும், முழுமையான வெளிப்படைத்தன்மையோடும், பொறுப்புணர்வோடும் செயல்பட வேண்டும்" என்று ஆணித்தரமாக வலியுறுத்தியுள்ளார்.

இதையும் படிங்க: தவெக அரசுக்கு சவால்.. செங்கோட்டையன் பேட்டிக்கு நடுவே பவர் கட்.. அப்செட்டான நிர்வாகிகள்!!