தவெக அரசின் புதிய அரசாணையால் அரசு பணியிடங்கள் குறையும் அபாயம் ஏற்பட்டுள்ளதாகவும், லட்சக்கணக்கான இளைஞர்களின் அரசு வேலைவாய்ப்பு பறிபோகும் நிலை உருவாகியுள்ளதாகவும் முன்னாள் அமைச்சர் ஆர்.பி. உதயகுமார் குற்றம்சாட்டியுள்ளார். தமிழகத்தில் அதிகார மையங்களின் ஆதிக்கம் அதிகரித்து வருவதாகவும், அரசு நிர்வாகத்தில் ரெட்டி சகோதரர்களின் தலையீடு அதிகரித்துள்ளதாகவும் அவர் தெரிவித்துள்ளார்.

ரெட்டி சகோதரர்களின் நிர்வாகத் தலையீடு அரசின் வளர்ச்சிக்கு உதவுமா அல்லது அரசுக்கே ஆபத்தாக அமையுமா என்பது முதலமைச்சர் விஜய்க்கே வெளிச்சம் என்றும் அவர் விமர்சித்துள்ளார்.

நெல் மூட்டைகள் சேதம்: 

அதிமுக முன்னாள் அமைச்சர் ஆர்.பி.உதயகுமார் இன்று வெளியிட்டுள்ள வீடியோவில், நெல் மூட்டைகள் மழையில் நனைந்து சேதமடைவதைத் தடுக்க வேண்டும். தற்போது வடகிழக்குப் பருவமழைக் காலம் நிலவி வருகிறது. ஒரு புயல் கரையைக் கடந்து ஆந்திராவை நோக்கிச் சென்றுள்ளது. அடுத்தடுத்து மற்றொரு புயல் உருவாகும் வாய்ப்பும் உள்ளது.

இதையும் படிங்க: ஆப்பிரிக்காவாக மாறுகிறதா தமிழ்நாடு?... தவெக அரசுக்கு ஆர்.பி. உதயகுமார் கொடுத்த அதிர்ச்சி வைத்தியம்...!

எனவே, தமிழகம் முழுவதும் மழைக்கால முன்னெச்சரிக்கை நடவடிக்கைகளை மேற்கொள்ள வேண்டும். குறிப்பாக, நெல் கொள்முதல் நிலையங்களில் அடுக்கி வைக்கப்பட்டுள்ள நெல் மூட்டைகள் மழையில் நனைந்து வீணாவது தொடர்ந்து நடைபெற்று வருகிறது. இதனால் விவசாயிகள் கடுமையாகப் பாதிக்கப்பட்டு வருகின்றனர்.

தமிழக அரசின் நுகர்பொருள் வாணிபக் கழகத்திற்குச் சொந்தமாக 260 சேமிப்புக் கிடங்குகள் செயல்பட்டு வருகின்றன. இவற்றில் 130 கோடி கிலோ நெல்லைச் சேமிக்க முடியும். மேலும், நுகர்பொருள் வாணிபக் கழகத்திற்குச் சொந்தமாக 575 நிரந்தர நேரடி நெல் கொள்முதல் நிலையங்களும் இயங்கி வருகின்றன.

இதுதவிர, நெல் அறுவடைக் காலங்களில் தற்காலிகமாக 2,000-க்கும் மேற்பட்ட நெல் கொள்முதல் நிலையங்கள் திறக்கப்படுகின்றன. இந்தத் தற்காலிக நெல் கொள்முதல் நிலையங்களில் நெல் மூட்டைகள் திறந்தவெளியில், போதிய பாதுகாப்பின்றி அடுக்கி வைக்கப்படுவதால், பருவமழைக் காலங்களில் அவை நனைந்து சேதமடைகின்றன.

இதனால் விவசாயிகளுக்குப் பெரும் நஷ்டம் ஏற்படுகிறது. எனவே, நெல் மூட்டைகள் மழையில் நனையாமல் பாதுகாக்க உரிய நடவடிக்கை எடுக்க வேண்டும் என்று விவசாயிகள் தொடர்ந்து கோரிக்கை விடுத்து வருகின்றனர்.

இருப்பினும், இந்த விவகாரத்தில் தவெக அரசு முழுமையான அக்கறை காட்டவில்லை. இந்த ஆண்டு ஆட்சி அமைத்த தொடக்கத்திலேயே நெல் மூட்டைகள் மழையில் நனைந்து கடுமையாகச் சேதமடைந்தன. எனவே, தற்போது நிலவும் வடகிழக்குப் பருவமழைக் காலத்தில் நெல் மூட்டைகள் நனையாமல் பாதுகாக்கத் தேவையான நடவடிக்கைகளை அரசு மேற்கொள்ள வேண்டும்.

வாக்குறுதியை நிறைவேற்றாத தவெக அரசு:

தற்போது தவெக அரசு ஓர் அதிரடி அறிவிப்பை வெளியிட்டுள்ளது. தவெக ஆட்சிக்கு வந்தால், அவுட்சோர்சிங் முறையிலான பணி நியமனம் ஒழிக்கப்படும் என்று வாக்குறுதி அளித்திருந்தனர். ஆனால், அந்த வாக்குறுதியை நிறைவேற்றாமல், தற்போது அவுட்சோர்சிங் முறையிலேயே பணியாளர்களை நியமிக்க முடிவு செய்துள்ளனர்.

இதன்படி, அரசுத் துறைகள் மற்றும் பொதுத்துறை நிறுவனங்களில் அவுட்சோர்சிங் முறையில் பணியாளர்களை நியமிப்பதற்காக, அயல்நாட்டு வேலைவாய்ப்பு நிறுவனத்தை முகமையாக நியமித்து, அதற்கான பணிகள் ஒப்படைக்கப்பட்டுள்ளன.

தமிழக அரசின் பல்வேறு துறைகளுக்குத் தேவையான பணியாளர்கள் இதுவரை டிஎன்பிஎஸ்சி (TNPSC), டிஆர்பி (TRB) உள்ளிட்ட தேர்வு வாரியங்கள் மூலம் தேர்வு செய்யப்பட்டு வந்தனர். இனிமேல், இந்தப் பணியிடங்கள் எவ்வாறு நிரப்பப்படும் என்ற கேள்வி எழுந்துள்ளது.

தற்போது வெளியிடப்பட்டுள்ள அரசாணையால் அரசு பணியிடங்கள் குறையும் அபாயம் ஏற்பட்டுள்ளது. அரசுத் துறைகளில் அவுட்சோர்சிங் முறையில் பணியாளர்களை நியமிப்பதன் மூலம், லட்சக்கணக்கான இளைஞர்களின் அரசு வேலைவாய்ப்புக் கனவு பறிபோகும் நிலை உருவாகியுள்ளது. அவர்களின் எதிர்பார்ப்புகள் வெறும் கனவாகவே முடிந்துவிடுமோ என்ற அச்சமும் ஏற்பட்டுள்ளது.

அரசுத் துறைகளில் ஐந்து லட்சத்திற்கும் மேற்பட்ட பணியிடங்கள் காலியாக உள்ளன. இந்தப் பணியிடங்களை அரசின் சார்பிலேயே நிரப்ப வேண்டும் என்று இளைஞர்கள் எதிர்பார்த்துக் காத்திருக்கின்றனர். ஆனால், அவர்களின் எதிர்பார்ப்புகள் நிறைவேறுமா என்பது கேள்விக்குறியாக உள்ளது.

இத்தகைய முடிவுகள் முதலமைச்சரின் கவனத்திற்குச் செல்கின்றனவா, இல்லையா என்ற கேள்வியும் எழுகிறது. அரசாணைகள் வெளியிடப்படுவதும், பின்னர் அவை திரும்பப் பெறப்படுவதும் தொடர்ந்து நடைபெறுகின்றன.

தமிழகத்தில் அதிகரிக்கும் அதிகார மையங்களின் ஆதிக்கம்:

தவெக ஆட்சியில் அதிகார மையங்களின் ஆதிக்கம் அதிகரித்துக்கொண்டே செல்கிறது. அத்தகைய அதிகார மையங்களின் எண்ணிக்கையும் அதிகரித்து வருகிறது. அதிகாரிகள் நியமனம் தொடங்கி, அரசின் முக்கிய முடிவுகள் எடுப்பது வரை அனைத்தையும் விஷ்ணு ரெட்டியே கவனித்து வருவதாகச் சொல்லப்படுகிறது.

இந்த நிலையில், விஷ்ணு ரெட்டியின் உறவினரான சுஜய் ரெட்டியின் அதிகாரமும் நாளுக்கு நாள் அதிகரித்து வருகிறது. ஜான் ஆரோக்கியசாமி, ஜெகதீஷ் பழனிச்சாமி உள்ளிட்டோர் முக்கிய அதிகார மையங்களாகச் செயல்பட்டு வரும் நிலையில், தற்போது ரெட்டி சகோதரர்களும் முக்கிய அதிகார மையமாக உருவெடுத்து, அரசு நிர்வாகத்தில் பங்களித்து வருவதாக ஆர்.பி. உதயகுமார் தெரிவித்துள்ளார்.

ரெட்டி சகோதரர்களின் இந்தத் தலையீடு தமிழகத்தை முன்னோக்கி அழைத்துச் செல்லுமா அல்லது பின்னோக்கித் தள்ளிவிடுமா என்ற கேள்வி எழுந்துள்ளதாகவும் அவர் குறிப்பிட்டுள்ளார். இதற்கான பதில் முதலமைச்சர் விஜய்க்கே வெளிச்சம் என்றும் விமர்சித்துள்ளார்.

முதலமைச்சருக்குத் தெரியாமலேயே முடிவுகள் எடுக்கப்படுகிறதா?

ரெட்டி சகோதரர்கள் தற்போது அரசு நிர்வாகத்தில் முழுமையான ஆதிக்கம் செலுத்தி வருவதாகவும், அவர்களின் அதிகாரத்திற்கு உட்பட்டே அரசு நிர்வாகம் செயல்படுவதாகவும் ஆர்.பி. உதயகுமார் குற்றம்சாட்டியுள்ளார். பல்வேறு முடிவுகள் முதலமைச்சருக்குத் தெரியாமலேயே எடுக்கப்படுவதாகச் செய்திகள் வெளிவருவதாகவும் அவர் தெரிவித்துள்ளார்.

அரசாணைகளை வெளியிடுவதும், பின்னர் அவற்றைத் திரும்பப் பெறுவதும், எதிர்ப்புகள் எழுந்த பிறகு முடிவுகளில் இருந்து பின்வாங்குவதும் தொடர்கின்றன. எனவே, ஒவ்வொரு முடிவையும் எடுப்பதற்கு முன்பாக முதலமைச்சர் உரிய ஆலோசனைகளைப் பெறுகிறாரா, இல்லையா என்பதுதான் தற்போது கேள்வியாக உள்ளது.

ரெட்டி சகோதரர்களின் அரசு நிர்வாகத் தலையீடு அரசின் வளர்ச்சிக்கு உதவுமா அல்லது அரசுக்கே ஆபத்தை ஏற்படுத்துமா? அது அரசுக்குப் பாதுகாப்பாக அமையுமா அல்லது பாதிப்பை ஏற்படுத்துமா? ரெட்டி சகோதரர்களின் தலையீடு தொடர்பான இந்தக் கேள்விகளுக்கான பதில் முதலமைச்சர் விஜய்க்கே வெளிச்சம் என்று முன்னாள் அமைச்சர் ஆர்.பி. உதயகுமார் தெரிவித்துள்ளார்.

இதையும் படிங்க: வாய் திறக்காத முதலமைச்சர் விஜய்... தமிழகமே சர்ச்சையான விவகாரத்தில் வெடியை கொளுத்திப் போட்ட ஆர்.பி.உதயகுமார்...!