கோவை சர்வதேச விமான நிலையத்திற்கு அருகே கல்லூரி மாணவி கூட்டு பாலியல் வன்கொடுமைக்கு உள்ளான சம்பவத்தை கண்டித்து, அதிமுக மகளிர் அணி கோவை கலெக்டர் அலுவலகம் முன் ஆர்ப்பாட்டம் நடத்தியது. "திமுக ஆட்சியில் சட்டம்-ஒழுங்கு சீர்கெட்டுள்ளது. 4150 பெண்கள், குழந்தைகள் பாதிக்கப்பட்டுள்ளனர்" என்று மாநில மகளிர் அணி செயலாளரும், முன்னாள் அமைச்சருமான வளர்மதி கடுமையாக விமர்சித்தார். 

அதிமுக பொதுச் செயலாளர் எடப்பாடி கே. பழனிச்சாமியின் அறிவிப்பின்பேரில் நடந்த இந்த ஆர்ப்பாட்டத்தில், மகளிர் அணி உறுப்பினர்கள் கருப்பு உடைகள் அணிந்து, கண் மூடி, அரசுக்கு எதிராக முழக்கங்கள் எழுப்பினர்.

கடந்த ஞாயிற்றுக்கிழமை (நவம்பர் 2) இரவு, கோவை விமான நிலையத்திற்கு அருகிலுள்ள பிரிந்தாவன் நகர் அருகே, 20 வயது கொண்ட தனியார் கல்லூரி மாணவி தனது நண்பனுடன் காரில் இருந்தார். அப்போது, மூன்று இளைஞர்கள் மோட்டார் சைக்கிளில் வந்து, காரின் கண்ணாடிகளை உடைத்து, இளைஞனை தாக்கி, மாணவியை இழுத்துச் சென்றனர். 

இதையும் படிங்க: இனி இப்படி நடக்காதுனு உறுதியா சொல்ல முடியுமா? பதில் சொல்லுங்க ஸ்டாலின்?! நயினார் நச் கேள்வி!

அவர்கள் அருகிலுள்ள கோவில் புதர்பகுதியில் மாணவியை கூட்டு பாலியல் வன்கொடுமை செய்து, முட்புதரில் தூக்கி வீசி தப்பினர். மாணவி "காப்பாற்றுங்கள்" என்று கதறியபோதும், குற்றவாளிகள் அவளை விடாமல் துன்புறுத்தியதாக போலீஸ் விவரங்கள் தெரிவிக்கின்றன. இளைஞன் போலீசாருக்கு புகார் கொடுத்ததும், போலீஸ் விரைந்து வந்து மாணவியை மீட்டு தனியார் மருத்துவமனையில் சேர்த்தனர். இளைஞன் அரசு மருத்துவமனையில் சிகிச்சை பெறுகிறார்.

வழக்கின் தீவிரத்தால், கோவை சிட்டி போலீஸ் 7 சிறப்பு குழுக்களை அமைத்து குற்றவாளிகளைத் தேடியது. 300-க்கும் மேற்பட்ட CCTV கேமரா காட்சிகளை சோதித்து, குற்றவாளிகளை அடையாளம் கண்டது. நேற்று (நவம்பர் 3) அதிகாலை, துடியலூர் அருகே ஒளிந்திருந்த இடத்தில் போலீஸ் அணுகியபோது, குற்றவாளிகள் ஒரு அதிகாரியை தாக்கி தப்ப முயன்றனர். 
பதிலடியாக, தனிப்படை போலீஸார் அவர்களின் கால்களில் துப்பாக்கிச் சூடு நடத்தி கைது செய்தனர். குற்றவாளிகள் – சதீஷ், குணா, கார்த்திக் (மதுரை மாவட்டத்தைச் சேர்ந்தவர்கள்) – இப்போது கோவை அரசு மருத்துவமனையில் சிகிச்சை பெற்று வருகின்றனர். போலீஸ் கூடுதல் விசாரணை நடத்தி வருகிறது. குற்றவாளிகள் மதுபானம் குடித்த நிலையில் இருந்ததாகவும், சம்பவ இடத்தில் அருகில் உள்ள TASMAC கடை இருந்ததால் இது நடந்ததாகவும் போலீஸ் கூறுகிறது.

இதனை தொடர்ந்து முதல்வர் மு.க. ஸ்டாலின், "குற்றவாளிகளுக்கு அதிகபட்ச தண்டனை வாங்கிக் கொடுக்க உத்தரவிட்டுள்ளேன்" என்று தெரிவித்துள்ளார். கோவை போலீஸ் கமிஷனர் சரவண குமார், "மாணவி அதிர்ச்சியில் உள்ளாள். அவள் குற்றவாளிகளை அடையாளம் காணவில்லை. 60 முகநூல் படங்களைக் காட்டினோம், ஆனால் அடையாளம் இல்லை. இப்போது கோவை மெயின் லேபர் கிளஸ்டர்களை சோதிக்கிறோம்" என்றார். 

இந்நிலையில், அதிமுக பொதுச் செயலாளர் எடப்பாடி கே. பழனிச்சாமியின் அறிவிப்பின்பேரில், கோவை கலெக்டர் அலுவலகம் முன் அதிமுக மகளிர் அணி கண்டன ஆர்ப்பாட்டம் நடத்தியது. கருப்பு உடைகள் அணிந்து, அரசுக்கு எதிராக முழக்கங்கள் எழுப்பிய உறுப்பினர்கள், "பெண்கள் பாதுகாப்பின்மைக்கு ஸ்டாலின் பொறுப்பு" என்று கோஷ்ட்டிட்டனர். 

ஆர்ப்பாட்டத்திற்கு தலைமை தாங்கிய மாநில மகளிர் அணி செயலாளரும், முன்னாள் அமைச்சருமான வளர்மதி பேசுகையில், "கோவையில் கல்லூரி மாணவி பலாத்காரம் செய்யப்பட்டார். அவரை முட்புதரில் தூக்கி வீசினர். 'காப்பாற்றுங்கள்' என்று கதறியும், கும்பல் அவரை விடாமல் சீரழித்தது என்றார்.

வளர்மதி தொடர்ந்து, "3 குற்றவாளிகளை சுட்டுக் கைது செய்ததாக போலீஸ் கூறுகிறது. ஆனால் அவர்களை யாருக்கும் காட்டவில்லை. உண்மையான குற்றவாளிகளா அல்லது போலியானவர்களா சந்தேகம் உள்ளது. எம்.ஜி.ஆர்., ஜெயலலிதா, எடப்பாடி பழனிச்சாமி ஆட்சியில் இருந்த போலீஸ் இப்போது இல்லை. 

திமுக ஆட்சியில் 4150 குழந்தைகள் முதல் பெண்கள் வரை பாதிக்கப்பட்டுள்ளனர். கோவை தொழில் நகரம், விமான நிலையத்திற்கு அருகிலேயே இப்படி ஒரு சம்பவம் நடந்தது அதிர்ச்சி அளிக்கிறது. உண்மை குற்றவாளிகளை கண்டுபிடித்து தண்டிக்க வேண்டும்" என்று கோரினார். இச்சம்பவத்தை பாஜக, NTK போன்ற கட்சிகளும் கண்டித்துள்ளன. பாஜக மாநிலத் தலைவர் நயினார் நாகேந்திரன் மாநில அளவிலான போராட்டம் அறிவித்துள்ளார்.

இதையும் படிங்க: ரூ.888 கோடி ஊழல் விவகாரம்!! திமுகவை அலறவிட்ட அதிமுக! கப்சிப் ஆன போலீஸ்!