கடந்த ஆகஸ்ட் 15, 2026 அன்று கர்நாடக மாநிலம் சாம்ராஜ்நகர் மாவட்டம் ஹனூர் அருகே உள்ள காவிரி வனவிலங்கு சரணாலயப் பகுதிக்குள் தங்களது மாடுகளை தேடிச் சென்ற அந்தோணிசாமி, ஜான் ரோஸ் பீட்டர், குமார் ஆகிய மூன்று தமிழர்கள் கர்நாடக வனத்துறையினரால் சுட்டுக்கொல்லப்பட்டனர். மான் வேட்டையாட வந்தவர்களை சுட்டுக்கொன்றதாக கர்நாடகா அரசு தரப்பில் விளக்கம் அளித்துள்ள நிலையில், இன்று மூவரது பிரேத பரிசோதனை அறிக்கை வெளியாகி பெரும் பரபரப்பைக் கிளப்பியுள்ளது. 

சமீபத்தில் வெளிவந்த பிரேதப் பரிசோதனை அறிக்கையில், உயிரிழந்தவர்களின் உடலில் எலும்பு முறிவுகள் மற்றும் அருகில் இருந்து சுடப்பட்ட காயங்கள் இருப்பதாகக் கூறப்பட்டுள்ளது. இதனால் இக்கொலைகள் குறித்து சிபிஐ (CBI) விசாரணை நடத்த வேண்டும் மற்றும் உரிய நீதி வழங்க வேண்டும் என்று எதிர்க்கட்சிகள் வலியுறுத்தி வருகின்றன.

இதுகுறித்து எதிர்க்கட்சித் தலைவர் உதயநிதி ஸ்டாலின் இன்று சட்டப்பேரவையில் கவன ஈர்ப்பு தீர்மானம் கொண்டு வந்தார். அதில் அவர் பேசியதாவது: மாண்புமிகு பேரவைத் தலைவர் அவர்களே, கர்நாடக மாநிலத்தில் ஹனூர் அருகே அந்தோணிசாமி, ஜான் ரோஸ் பீட்டர், குமார் ஆகிய மூன்று தமிழர்கள் வனத்துறையினரால் கடந்த 15ஆம் தேதி அதிகாலையில் படுகொலை செய்யப்பட்டு, சுட்டுக் கொல்லப்பட்டிருக்கிறார்கள். ஏற்கனவே இந்த அவையினுடைய கவனத்திற்குக் கொண்டு வந்திருக்கிறோம்.

இதையும் படிங்க: இதெல்லாம் நியாயமா?... ஓபிஎஸ் கேட்ட ஒற்றை கேள்விக்கு சரண்டர் ஆன சபாநாயகர்... கையை ஓங்கிக்கொண்டு ஓடி வந்த எம்.எல்.ஏ.க்கள்...!

இந்தச் சுட்டுக்கொலை தொடர்பாக உயிரிழந்த மூன்று தமிழர்களுடைய போஸ்ட்மார்ட்டம் ரிப்போர்ட் இன்று வெளிவந்திருக்கிறது. அதில் மூன்று பேருமே சித்திரவதை செய்யப்பட்டு, மரங்களில் நிற்க வைக்கப்பட்டு சுட்டுக் கொல்லப்பட்டிருக்கிறார்கள் என்ற செய்திகள் போஸ்ட்மார்ட்டம் ரிப்போர்ட் மூலமாகத் தெரிய வந்திருக்கிறது.

மூன்று பேருக்குமே உடல் முழுக்கப் படுகாயங்கள் இருந்திருக்கின்றன. விலா எலும்பு முழுவதும் முறிக்கப்பட்டிருக்கிறது என்பதையும் போஸ்ட்மார்ட்டம் ரிப்போர்ட் தெளிவாகச் சொல்கிறது. எனவே, இது முழுக்க முழுக்க ஒரு படுகொலை.

இந்தப் படுகொலைக்கு எதிராக என்ன நடவடிக்கை எடுத்திருக்கிறீர்கள் என்பதை அறிய விரும்புகிறேன். குறைந்தபட்சம் அம்மாநில அரசு, கர்நாடக முதலமைச்சர், அம்மாநில அமைச்சர்களைப் பொறுத்தவரை நேரடியாக நடவடிக்கை எடுக்க வேண்டும் என்று தமிழ்நாடு வலியுறுத்த வேண்டும் என்று நான் ஏற்கனவே செய்திருக்கிறேன்.

அது சம்பந்தமாக மாநில முதலமைச்சரோடு ஏதாவது அழுத்தம் கொடுக்கப்பட்டதா?, இந்தப் பிரச்சனை நடந்தவுடனே முதலமைச்சர், அமைச்சரவையில் இருப்பவர்கள் கர்நாடகா போயிருக்க வேண்டும். அந்த மூன்று தமிழர்களுடைய மரணத்திற்கு நீதி கிடைக்க தமிழ்நாடு அரசு முழுமுயற்சி செய்ய வேண்டும். துணை நிற்க வேண்டும். அவர்களுடைய குடும்பங்களுக்கு தேவையான நிதி உதவியும், சட்ட உதவியும் அரசு செய்ய வேண்டும் என கவன ஈர்ப்பு தீர்மானம் கொண்டு வந்துள்ளேன்” என்றார். 

இதையும் படிங்க: சட்டப்பேரவையில் பெரிதாக வெடித்த விவாதம்... அனல் பறந்த ‘பவுடர் மேட்டர்’... திமுக எடுத்த திடீர் முடிவு...!