தமிழக பாஜகவில் முக்கிய நிர்வாகியாக இருந்து வந்த கருப்பு முருகானந்தம், மாநில பொதுச்செயலாளர் பொறுப்பில் இருந்து நீக்கப்பட்டுள்ளார். கட்சியின் நற்பெயருக்கு களங்கம் ஏற்படும் வகையில் செயல்பட்டதாக கூறி, தமிழக பாஜக தலைவர் நயினார் நாகேந்திரன் இந்த நடவடிக்கையை எடுத்துள்ளதாக தகவல் வெளியாகியுள்ளது.
டெல்டா மாவட்டங்களில் பாஜகவின் அமைப்பு பணிகளில் முக்கிய பங்காற்றி வந்த கருப்பு முருகானந்தம், கட்சியின் மாநில பொதுச்செயலாளராகவும் செயல்பட்டு வந்தார். இந்த நிலையில், அவருக்கு எதிராக பெண் நிர்வாகி ஒருவர் கட்சியின் தேசிய தலைமையிடம் புகார் அளித்திருந்ததாக தகவல்கள் வெளியாகியுள்ளன.
அந்த புகாரில், கருப்பு முருகானந்தம் தன்னை திருமணம் செய்து கொள்வதாக கூறி ஏமாற்றியதாகவும், உடல் மற்றும் மனரீதியான துன்புறுத்தல் மற்றும் மிரட்டல் உள்ளிட்ட குற்றச்சாட்டுகளையும் பெண் நிர்வாகி முன்வைத்துள்ளதாக கூறப்படுகிறது. மேலும், தனது புகாருக்கு ஆதரவாக மின்னணு ஆதாரங்கள் மற்றும் சாட்சிகளை வழங்கத் தயாராக இருப்பதாகவும் அவர் தெரிவித்திருந்ததாக தகவல் வெளியாகியுள்ளது.
இதையும் படிங்க: "ஸ்ரீவில்லிபுத்தூரில் குண்டு வெடிக்கும்"..! மிரட்டிய நபர்களை தீர விசாரிக்கனும்..! நயினார் வலியுறுத்தல்..!
இதனிடையே, இந்த புகார் குறித்து கருப்பு முருகானந்தத்திடம் ஊடகங்கள் தரப்பில் கேள்வி எழுப்பப்பட்டபோது, புகார் தொடர்பாக தனக்கு தெரியாது என்றும், விவரங்களை அறிந்த பிறகு விளக்கம் அளிப்பதாகவும் அவர் தெரிவித்ததாக இந்தியன் எக்ஸ்பிரஸ் தமிழ் செய்தி குறிப்பிட்டுள்ளது.
இந்த சூழலில், தமிழக பாஜக தலைவர் நயினார் நாகேந்திரன் கருப்பு முருகானந்தத்தை மாநில பொதுச்செயலாளர் பொறுப்பில் இருந்து நீக்கி அறிவிப்பு வெளியிட்டுள்ளார். கட்சியின் நற்பெயருக்கு களங்கம் ஏற்படும் வகையில் அவர் செயல்பட்டதாக அறிவிப்பில் காரணம் தெரிவிக்கப்பட்டுள்ளதாக செய்திகள் வெளியாகியுள்ளன.
கருப்பு முருகானந்தம் மீது ஏற்கனவே பல்வேறு புகார்கள் கட்சி மேலிடத்திற்கு சென்றதாக சில செய்திகள் கூறினாலும், தற்போதைய நடவடிக்கைக்கான அதிகாரப்பூர்வ காரணமாக பெண் நிர்வாகி அளித்த புகார் தொடர்பான விவகாரமே முன்வைக்கப்பட்டுள்ளது. எனினும், புகாரில் கூறப்பட்டுள்ள குற்றச்சாட்டுகள் தொடர்பாக சட்டரீதியான இறுதி முடிவு எதுவும் வெளியாகவில்லை என்பதும் குறிப்பிடத்தக்கது.
தமிழக பாஜகவில் தேர்தல் பணிகள் தீவிரமடைந்துள்ள நிலையில், மாநிலத்தின் முக்கிய பொறுப்பில் இருந்த நிர்வாகி திடீரென நீக்கப்பட்டிருப்பது கட்சியினர் மத்தியில் கவனத்தை ஏற்படுத்தியுள்ளது.
இதையும் படிங்க: சினிமாவில் கதை வசனம் எழுதலாம், ஆட்சியில் எழுதலாமா? முதல்வர் விஜயை விளாசிய தமிழிசை சௌந்தர்ராஜன்!