பாட்னா: பிரதமர் நரேந்திர மோடியின் தந்தை குறித்த காங்கிரஸ் தேசிய தலைவர் மல்லிகார்ஜுன கார்கேவின் பேச்சு அரசியல் வட்டாரத்தில் பெரும் சர்ச்சையை ஏற்படுத்தியுள்ளது.

பீஹார் தலைநகர் பாட்னாவில் நடைபெற்ற நிகழ்ச்சியில், மோடி குறித்து ஒருவர் தெரிவித்த கருத்துக்கு பதிலளித்த கார்கே, “மோடியின் தந்தை வந்தாலும் போக வேண்டியதுதான்” எனப் பொருள்படும் வகையில் பேசியதாகக் கூறப்படுகிறது. இந்தப் பேச்சுக்கு பாஜக தலைவர்கள் கடும் எதிர்ப்பு தெரிவித்துள்ள நிலையில், கார்கே மீது போலீசில் புகார் அளிக்கப்பட்டுள்ளது. 

வாக்காளர் பட்டியல் திருத்தம் குறித்து விமர்சனம்

பீஹாரின் முன்னாள் முதல்வர் ஸ்ரீ கிருஷ்ண சிங்கின் 139வது பிறந்த நாள் விழா, பாட்னாவில் உள்ள பாபு சபாகரில் நேற்று நடைபெற்றது. இதில் காங்கிரஸ் தேசிய தலைவர் மல்லிகார்ஜுன கார்கே கலந்து கொண்டு பேசினார். அப்போது, வாக்காளர் பட்டியலில் மேற்கொள்ளப்படும் சிறப்பு தீவிர திருத்தப் பணிகள் (SIR), பிரதமர் மோடி, பாஜக மற்றும் தேர்தல் ஆணையம் ஆகியவற்றை அவர் விமர்சித்தார்.

இதையும் படிங்க: தொகுதி மறுவரையறை விவகாரம்: காங்கிரஸுக்கு கிரண் ரிஜிஜூ பதிலடி! சிறப்புக் கூட்டத்தொடர் கூடுமா?

வாக்காளர் பட்டியல் திருத்தத்தின் மூலம் எதிர்க்கட்சிகளை ஆதரிப்பவர்களின் பெயர்கள் நீக்கப்படுவதாக கார்கே குற்றம்சாட்டினார். மேலும், வாக்குரிமையைப் பாதுகாக்க எதிர்க்கட்சிகள் ஒன்றிணைந்து செயல்பட வேண்டும் என்றும் வலியுறுத்தினார். 

கூட்டத்தில் நடந்தது என்ன?

கார்கே பேசிக்கொண்டிருந்தபோது, கூட்டத்தில் இருந்த ஒருவர் பிரதமர் மோடி பதவியிலிருந்து செல்ல மாட்டார் என்ற பொருளில் கருத்து தெரிவித்ததாகக் கூறப்படுகிறது. இதற்கு பதிலளித்த கார்கே, “மோடியின் தந்தையும் செல்ல வேண்டியதுதான்” எனக் கூறினார். இதனால் கூட்டத்தில் சலசலப்பு ஏற்பட்டது. அந்த நபரை அங்கிருந்த சிலர் வெளியேற்றியதாகவும், அவரைத் தாக்கியதாகக் கூறப்படும் காட்சிகள் சமூக வலைதளங்களில் பரவியதாகவும் செய்திகள் தெரிவிக்கின்றன. 

கார்கே மீது போலீசில் புகார்

இந்தப் பேச்சைத் தொடர்ந்து, பாஜக மாநில செயற்குழு உறுப்பினர் கிருஷ்ண குமார் சிங், பாட்னா கோட்வாலி காவல் நிலையத்தில் கார்கேவுக்கு எதிராகப் புகார் அளித்துள்ளார். பிரதமரின் குடும்பத்தினரைப் பற்றி அவமதிக்கும் வகையில் பேசப்பட்டதாகக் குறிப்பிட்ட அவர், சம்பவம் குறித்து விசாரணை நடத்தி உரிய நடவடிக்கை எடுக்க வேண்டும் எனக் கோரியுள்ளார். இந்தப் புகார் தொடர்பாக சட்டப்படி நடவடிக்கை எடுக்கப்படுமா என்பது விசாரணைக்குப் பின்னரே தெரியவரும். 

இதற்கிடையே, கார்கேவின் கருத்துக்கு மத்திய உள்துறை அமைச்சர் அமித் ஷா உள்ளிட்ட பாஜக தலைவர்கள் கண்டனம் தெரிவித்துள்ளனர். அரசியல் கருத்து மோதல் தற்போது தனிப்பட்ட குடும்பத்தினரைப் பற்றிய பேச்சு வரை சென்றுள்ளதாக அவர்கள் விமர்சித்துள்ளனர். இந்த விவகாரம் தொடர்பான வீடியோ சமூக வலைதளங்களில் பரவி வரும் நிலையில், காங்கிரஸ் மற்றும் பாஜக இடையிலான அரசியல் மோதல் மேலும் தீவிரமடைந்துள்ளது.

இதையும் படிங்க: மூத்த தலைவர்களை ஓரங்கட்டுகிறாரா ராகுல் காந்தி? காங்கிரஸில் புதிய மாற்றம்! பிரியங்காவின் வியூகம்!