வாஷிங்டன்: அமெரிக்க அதிபர் டொனால்ட் டிரம்ப் ஈரானுக்கு எதிரான கடும் எச்சரிக்கையை விடுத்துள்ளார். ஈரானை நோக்கி மிகப் பெரிய, சக்திவாய்ந்த அமெரிக்க போர் கப்பல்கள் பயணித்துக் கொண்டிருப்பதாக அவர் தெரிவித்துள்ளார். இந்த கப்பல்களை பயன்படுத்த வேண்டிய அவசியம் ஏற்படாமல் இருந்தால் நல்லது என்றும், ஆனால் தேவைப்பட்டால் பயன்படுத்த தயாராக உள்ளோம் என்றும் டிரம்ப் கூறினார்.

நிருபர்களிடம் பேசிய டிரம்ப், "ஈரானை நோக்கி மிகப் பெரிய, மிக சக்திவாய்ந்த கப்பல்கள் செல்கின்றன. அவற்றை நாங்கள் பயன்படுத்த வேண்டிய அவசியம் ஏற்படாமல் இருந்தால் அது மிகவும் நல்லது. ஆனால் ஈரான் இரண்டு விஷயங்களை செய்ய வேண்டும். முதலாவது, அணு ஆயுதம் கொண்டிருக்கக் கூடாது. இரண்டாவது, போராட்டக்காரர்களை கொல்வதை நிறுத்த வேண்டும். அவர்கள் ஆயிரக்கணக்கான மக்களை கொல்கிறார்கள்" என்று திட்டவட்டமாக தெரிவித்தார்.

மேலும், சீனாவுடன் வர்த்தக உறவு கொண்டிருப்பது ஆபத்தானது என்றும் டிரம்ப் குறிப்பிட்டார். "சீனாவுடன் பிரிட்டன் வர்த்தகம் செய்வது மிகவும் ஆபத்தானது. கனடா சீனாவுடன் வர்த்தகத்தில் ஈடுபடுவது இன்னும் ஆபத்தானது. கனடா சிறப்பாக செயல்படவில்லை, மிக மோசமாக செயல்படுகிறது. சீனாவை தீர்வாக பார்க்க முடியாது. ஜி ஜின்பிங் என் நண்பர், அவரை எனக்கு நன்றாக தெரியும்" என்று அவர் கூறினார்.

இதையும் படிங்க: உடைந்த உறவை ஒட்டு போட்ட சசி தரூர்! கார்கே, ராகுல் காந்தியை நேரில் சந்தித்து இணக்கம்!

ஈரானில் சமீபத்தில் நடந்த போராட்டங்களில் ஆயிரக்கணக்கானோர் கொல்லப்பட்டதை சுட்டிக்காட்டிய டிரம்ப், "இரண்டு வாரங்களுக்கு முன்பு நான் 837 தூக்குத் தண்டனைகளை நிறுத்தினேன். ஆனால் ஈரான் ஏதாவது செய்தே ஆக வேண்டும். இது போன்ற சம்பவத்தை யாரும் பார்த்ததில்லை" என்று கூறி கடுமையான எச்சரிக்கை விடுத்தார்.

இந்த அறிவிப்பு உலக அரசியலில் பெரும் பரபரப்பை ஏற்படுத்தியுள்ளது. அமெரிக்கா ஈரானுக்கு அருகே USS Abraham Lincoln தலைமையிலான 'மாசிவ் ஆர்மடா' என்று அழைக்கப்படும் கப்பல் குழுவை அனுப்பியுள்ளது. இதில் 10-க்கும் மேற்பட்ட போர் கப்பல்கள் உள்ளன. ஈரான் அணு ஆயுத திட்டத்தை தொடர்ந்தால் அல்லது போராட்டங்களை அடக்கினால் பெரிய தாக்குதல் நடத்தப்படும் என்று டிரம்ப் மறைமுகமாக எச்சரித்துள்ளார்.

ஈரான் தரப்பில் இதற்கு பதிலடி கொடுக்கும் வகையில் தயாராக உள்ளதாக தகவல்கள் வெளியாகியுள்ளன. அமெரிக்கா-ஈரான் இடையேயான பதற்றம் உச்சத்தை தொடர்ந்துள்ளது. உலக நாடுகள் இதை கவலையுடன் கவனித்து வருகின்றன. டிரம்ப் அணு ஒப்பந்தம் அல்லது இராஜதந்திரம் மூலம் தீர்வு காண விரும்புவதாக கூறினாலும், இராணுவ நடவடிக்கைக்கு தயாராக உள்ளதை தெளிவுபடுத்தியுள்ளார். இது மத்திய கிழக்கு பிராந்தியத்தில் புதிய போர் அபாயத்தை உருவாக்கியுள்ளது. 

இதையும் படிங்க: வன்னியருக்கு 10.5% இட ஒதுக்கீடு! வேணாவே வேணாம்! ஜாதி ஓட்டு பார்த்த மீதி ஓட்டு போயிரும்! திமுக குழப்பம்!