வங்கக்கடலில் நிலைகொண்டிருந்த காற்றழுத்த தாழ்வு மண்டலம் மேலும் தீவிரமடைந்து இன்று ஆழ்ந்த காற்றழுத்த தாழ்வு மண்டலமாக (Deep Depression) வலுப்பெற்றுள்ளதாகவும், இது தொடர்ந்து தென்மேற்கு திசையில் நகர்ந்து நாளை காலைக்குள் தீவிரப் புயலாக (Cyclonic Storm) மாறக்கூடும் என்றும் இந்திய வானிலை ஆய்வு மையம் (IMD) மிக அவசர எச்சரிக்கை விடுத்துள்ளது; இதனால் கடலோரப் பகுதிகள் மற்றும் வட மாவட்டங்களில் பலத்த சூறாவளிக் காற்றுடன் கூடிய கனமழை வெளுத்து வாங்க வாய்ப்புள்ளதாகத் தெரிவிக்கப்பட்டுள்ளது.

மத்திய கிழக்கு மற்றும் அதனை ஒட்டிய தென்கிழக்கு வங்கக்கடல் பகுதிகளில் உருவான காற்றழுத்த தாழ்வு மண்டலம், கடல் வெப்பநிலையின் சாதகமான சூழல் காரணமாக படிப்படியாக ஆற்றலை உறிஞ்சி, இன்று ஆழ்ந்த காற்றழுத்த தாழ்வு மண்டலமாக உருமாறியுள்ளது. தற்போதைய நிலவரப்படி, இந்த ஆழ்ந்த காற்றழுத்த தாழ்வு மண்டலமானது ஆந்திர மாநிலம் விசாகப்பட்டினத்திற்கு கிழக்கு-தென்கிழக்கே சுமார் 870 கிலோமீட்டர் தொலைவிலும், பாபட்லாவிற்கு கிழக்கே சுமார் 1,130 கிலோமீட்டர் தொலைவிலும் கடலில் மையம் கொண்டுள்ளது.

முன்னதாக, கடலில் எந்தத் திசையிலும் நகராமல் ஒரே இடத்தில் பல மணி நேரமாக நீடித்து வந்த இந்த வானிலை அமைப்பு, வளிமண்டல மேலடுக்கு சுழற்சியின் தாக்கத்தால் தற்போது மீண்டும் உயிர் பெற்று நகரத் தொடங்கியுள்ளது. கடந்த 6 மணி நேர நிலவரப்படி, இது மணிக்கு 5 கிலோமீட்டர் வேகத்தில் தென்மேற்கு திசையை நோக்கி சீராக நகர்ந்து வருகிறது.

இதையும் படிங்க: 5 மாவட்டங்களுக்கு ரெட் அலர்ட்: திருச்சி, தஞ்சையில் அதி கனமழை எச்சரிக்கை...வங்கக்கடலில் புயல் உருவாகிறது!

வானிலை மையத்தின் கணிப்பின்படி, இந்த ஆழ்ந்த காற்றழுத்த தாழ்வு மண்டலம் தொடர்ந்து தென்மேற்கு திசையிலேயே நகர்ந்து சென்று, கடலில் மேலும் வலுவடைந்து நாளை (திங்கட்கிழமை) காலை வாக்கில் அதிகாரப்பூர்வமாகப் புயலாக உருவெடுக்க அதிக வாய்ப்புள்ளது. புயலாக வலுப்பெற்ற பின்னர் இது நிலப்பகுதியை நோக்கி எந்தப் பாதையில் நகரும் என்பதை வானிலை ஆய்வாளர்கள் ரேடார் மற்றும் செயற்கைக்கோள் மூலமாக வினாடிக்கு வினாடி மிகத் தீவிரமாகக் கண்காணித்து வருகின்றனர்.

புயல் சின்னம் நெருங்கி வருவதைத் தொடர்ந்து, மத்திய மற்றும் தென்மேற்கு வங்கக்கடல், ஆந்திரா மற்றும் தமிழகக் கடலோரப் பகுதிகளில் பலத்த சூறாவளிக் காற்று மணிக்கு 50 முதல் 65 கி.மீ வேகத்திலும், இடையிடையே 75 கி.மீ வேகத்திலும் வீசக்கூடும் என்பதால் கடல் கொந்தளிப்புடன் காணப்படும். எனவே, மறு உத்தரவு வரும் வரை மீனவர்கள் ஆழ்கடல் பகுதிக்கு மீன்பிடிக்கச் செல்ல வேண்டாம் என்றும், கடலில் உள்ளவர்கள் உடனடியாகக் கரைக்குத் திரும்புமாறும் எச்சரிக்கப்பட்டுள்ளது.

தமிழகத்தில் வடகிழக்குப் பருவமழை ஏற்கனவே தீவிரமடைந்துள்ள நிலையில், வங்கக்கடலில் உருவாகியுள்ள இந்தப் புதிய புயல் சின்னம் கடலோர மாவட்டங்களில் கூடுதல் மழையைக் கொடுக்கும் என்பதால், மாவட்ட நிர்வாகங்கள் அனைத்து முன்னெச்சரிக்கை நடவடிக்கைகளையும் போர்க்கால அடிப்படையில் தயார் நிலையில் வைத்திருக்க அறிவுறுத்தப்பட்டுள்ளன.

இதையும் படிங்க: வங்கக்கடலில் நாளை உருவாகிறது காற்றழுத்த தாழ்வு பகுதி! இந்திய வானிலை மையம் எச்சரிக்கை!