தென்கிழக்கு மற்றும் அதனை ஒட்டிய மத்திய கிழக்கு வங்கக்கடல் பகுதிகளில் நிலவி வரும் வளிமண்டல மேலடுக்கு சுழற்சி காரணமாக, நாளை (அக்டோபர் 23) புதிய குறைந்த காற்றழுத்த தாழ்வுப் பகுதி உருவாக உள்ளதாகவும், இது மேற்கு-வடமேற்கு திசையில் நகர்ந்து வரும் அக்டோபர் 25-ஆம் தேதி வாக்கில் காற்றழுத்த தாழ்வு மண்டலமாக வலுப்பெறக்கூடும் என்றும் இந்திய வானிலை ஆய்வு மையம் அதிகாரப்பூர்வமாக எச்சரித்துள்ளது.
இது தொடர்பாக இந்திய வானிலை ஆய்வு மையம் வெளியிட்டுள்ள விரிவான வானிலை அறிக்கையில், தென்கிழக்கு வங்கக்கடல் மற்றும் அந்தமான் கடல் பகுதிகளில் நிலவும் வளிமண்டல மேலடுக்கு சுழற்சி மேற்கு-வடமேற்கு திசையில் நகர்ந்து குறைந்த காற்றழுத்த தாழ்வுப் பகுதியாக மாறவுள்ளது. அதனைத் தொடர்ந்து மேலும் நகர்ந்து தீவிரமடைந்து அக்டோபர் 25 காலை வாக்கில் காற்றழுத்த தாழ்வு மண்டலமாக மாறும் என்றும், அடுத்த மூன்று நாட்களில் இது மேலும் வலுவடைய அதிக வாய்ப்புள்ளது என்றும் கணிக்கப்பட்டுள்ளது.
இந்த வானிலை அமைப்பின் காரணமாக, வங்கக்கடல் பகுதிகளில் கடல் சீற்றம் அதிகமாகக் காணப்படும் என்பதுடன் பலத்த சூறாவளிக் காற்றும் வீசக்கூடும். அக்டோபர் 23 மாலை முதல் மணிக்கு 35 முதல் 45 கி.மீ வேகத்திலும், அக்டோபர் 24 மற்றும் 25 தேதிகளில் மணிக்கு 50 முதல் 70 கி.மீ வேகத்திலும் காற்று வீசக்கூடும். குறிப்பாக, அக்டோபர் 26-ஆம் தேதி முதல் மத்தியமேற்கு மற்றும் அதனை ஒட்டிய வங்கக்கடல் பகுதிகளில் காற்றின் வேகம் படிப்படியாக அதிகரித்து மணிக்கு 90 கி.மீ வரை பலத்த புயல் காற்றாக வீசக்கூடும் என்று எச்சரிக்கப்பட்டுள்ளது.
இதையும் படிங்க: வங்க கடலில் காற்றழுத்த தாழ்வு மண்டலம்! சென்னை உள்பட 9 துறைமுகங்களில் புயல் எச்சரிக்கை கூண்டு!
கடல் அலைகள் மிகக் கொந்தளிப்புடன் காணப்படும் என்பதால், அக்டோபர் 23 மாலை முதல் 25 வரை தென்கிழக்கு மற்றும் மத்திய கிழக்கு வங்கக்கடல் பகுதிகளுக்கும், அக்டோபர் 26 முதல் 28 வரை மத்தியமேற்கு மற்றும் தென்மேற்கு வங்கக்கடல் பகுதிகளுக்கும் மீனவர்கள் எக்காரணம் கொண்டும் மீன்பிடிக்கச் செல்ல வேண்டாம் என அறிவுறுத்தப்பட்டுள்ளது. ஏற்கனவே ஆழ்கடலில் உள்ள மீனவர்கள் உடனடியாகக் கரைக்குத் திரும்புமாறும், துறைமுகங்கள், கப்பல் போக்குவரத்து மற்றும் கடல்சார் சுற்றுலா அமைப்புகள் தங்களது பாதுகாப்பு முன்னெச்சரிக்கை நடவடிக்கைகளைத் துரிதப்படுத்துமாறும் வானிலை ஆய்வு மையம் கேட்டுக்கொண்டுள்ளது.
இதையும் படிங்க: வங்கக்கடலில் ஆழ்ந்த காற்றழுத்தத் தாழ்வு மண்டலம்! சென்னை உள்பட வட மாவட்டங்களில் மழை எச்சரிக்கை!