அண்ணல் மகாத்மா காந்தியடிகளின் பிறந்த நாளை முன்னிட்டு, தமிழக மக்கள் அனைவரும் கதர் ஆடைகளையும் கிராமப் பொருட்களையும் பெருமளவில் வாங்கி, நமது கிராமப்புற நூற்பாளர்கள், நெசவாளர்கள் மற்றும் கைவினைஞர்களின் வாழ்வாதாரத்தில் புத்தொளி பாய்ச்சிட வேண்டும் என்று தமிழ்நாடு முதலமைச்சர் ச. ஜோசப் விஜய் அவர்கள் வேண்டுகோள் விடுத்துள்ளார்.

தேசப்பிதா அண்ணல் மகாத்மா காந்தியடிகளின் பிறந்த நாளான அக்டோபர் 2-ஆம் நாளை முன்னிட்டு முதலமைச்சர் வெளியிட்டுள்ள அதிகாரப்பூர்வ வாழ்த்து மற்றும் வேண்டுகோள் செய்தியில், கதர் மற்றும் கைவினைப் பொருட்களின் முக்கியத்துவத்தை மிக ஆழமாக எடுத்துரைத்துள்ளார்.

அண்ணல் மகாத்மா காந்தியடிகளின் பிறந்த நாளான அக்டோபர் 2-ஆம் நாள், நமது நாட்டின் ஒப்பற்ற விடுதலைப் போராட்ட வரலாற்றையும், எளிமை, அசைக்க முடியாத சுயநம்பிக்கை, உழைப்புக்குத் தரும் மதிப்பு மற்றும் அனைவரையும் அரவணைக்கும் உன்னத மனிதநேயத்தையும் நினைவுகூரும் புனித நாளாகத் திகழ்கிறது என்று முதல்வர் குறிப்பிட்டுள்ளார்.

இதையும் படிங்க: காந்தி ஜெயந்தி தொடர் விடுமுறை: சொந்த ஊர் செல்வோருக்கு தெற்கு ரயில்வே சிறப்பு ரயில்கள் அறிவிப்பு!

அகிம்சை என்னும் பேராற்றல் வாய்ந்த ஆயுதத்தை ஏந்திய அண்ணல் காந்தியடிகள், இராட்டை என்னும் நூற்புச் சக்கரத்தின் வழியாக ஒவ்வொரு இந்தியக் குடிமகனுக்கும் பொருளாதாரச் சுதந்திரத்தையும், தன்நிறைவு பெற்ற சுயசார்பையும் போதித்தார் என்பதை அவர் நினைவுகூர்ந்துள்ளார்.

கதர் பயன்பாட்டின் உன்னத நோக்கத்தை விளக்கிய முதல்வர், நாம் வாங்கும் ஒவ்வொரு கதராடையும், ஒரு ஏழை நெசவாளரின் கைத்திறனுக்கு நாம் மனதார அளிக்கும் அங்கீகாரமாகும்; ஒரு கிராமப் பொருளை நாம் வாங்குவது, நமது மண்ணின் கைவினைஞரின் வியர்வை சிந்திய உழைப்புக்கு நாம் செலுத்தும் மரியாதையாகும்; உள்ளூரில் தயாரிக்கப்படும் சுதேசிப் பொருட்களை நாம் தொடர்ச்சியாகப் பயன்படுத்தும்போது, அது நமது மண்ணின் உற்பத்தித் திறனுக்கும் பொருளாதார வளர்ச்சிக்கும் அளிக்கும் உன்னதமான ஊக்கமாகும் என்று புகழாரம் சூட்டியுள்ளார்.

இன்றைய நவீன காலகட்டத்தில், சுற்றுச்சூழல் நேயமிக்க இயற்கை இழைகளால் நெய்யப்படும் ஆடைகளுக்கான சர்வதேசத் தேவை பல மடங்கு அதிகரித்து வருவதைச் சுட்டிக்காட்டிய அவர், அதற்கேற்ப தமிழ்நாடு கதர் கிராமத் தொழில் வாரியம் பாரம்பரியத்தையும் நவீன பாணியையும் நேர்த்தியாக இணைத்துச் செயல்பட்டு வருவதாகத் தெரிவித்துள்ளார்.

புதிய கண்கவர் வடிவமைப்புகள், சமகால ஆடைகள் மற்றும் மின்னணு வர்த்தகத் தளங்கள் வாயிலாகக் கதர் மற்றும் கிராமத் தொழில் பொருட்கள் எளிதில் அனைத்துத் தரப்பு மக்களையும் சென்றடையும் வகையில் நவீன முறையில் மேம்படுத்தப்பட்டு வருவதாக அவர் எடுத்துரைத்துள்ளார்.

மேலும், தமிழ்நாடு முழுவதும் பரவலாக இயங்கி வரும் அரசு கதரங்காடிகள் வழியாக, ஆண்டு முழுவதும் 30 சதவீத சிறப்புத் தள்ளுபடியில் கதர் பருத்தி, பாலியஸ்டர் மற்றும் கண்கவர் பட்டு ரகங்கள் பொதுமக்களுக்கு மிகக் குறைந்த விலையில் விற்பனை செய்யப்பட்டு வருகின்றன.

இந்த அரிய நல்வாய்ப்பைப் பயன்படுத்திப் பள்ளி மற்றும் கல்லூரி மாணவ மாணவியர், அரசு ஊழியர்கள், தனியார் நிறுவனப் பணியாளர்கள், இளம் தலைமுறையினர் மற்றும் தமிழகப் பொதுமக்கள் அனைவரும் கதர் ஆடைகளையும் எழில்மிகு கிராமப் பொருட்களையும் பெருமளவில் வாங்கிப் பயன்படுத்த வேண்டும் என முதல்வர் கேட்டுக் கொண்டுள்ளார்.

இறுதியாக, மகிழ்வுடன் அணிந்திடுவோம் கதராடைகளை! வெற்றி பெறச் செய்வோம் நெசவாளர் வாழ்க்கைதனை! கதரைத் தேர்ந்தெடுப்போம்! கைத்திறனைப் போற்றுவோம்! உள்ளூர் உற்பத்திக்கு உயிரூட்டுவோம்! என்ற உணர்ச்சிமிக்க முழக்கத்துடன் முதலமைச்சர் ச. ஜோசப் விஜய் தனது வேண்டுகோளை நிறைவு செய்துள்ளார்.

இதையும் படிங்க: தொழில் நிறுவனங்களுக்கு மின்சாரம் வழங்காமல் ஜெனரேட்டர்களை இயக்கச் சொல்வதா.? நயினார் நாகேந்திரன் கண்டனம்.!