அம்மா மக்கள் முன்னேற்றக் கழகப் பொதுச்செயலாளர் டிடிவி தினகரன், வளர்ச்சியடைந்த பாரதம் – கிராம வேலை உறுதி மற்றும் வாழ்வாதாரத் திட்டத்தின் கீழ் பணியாற்றும் தொழிலாளர்களுக்கு ஊதியம் வழங்கப்படாத நிலையைக் கடுமையாகக் கண்டித்துள்ளார். தேனி, மதுரை உள்ளிட்ட பல்வேறு மாவட்டங்களில் உள்ள கிராமப்புறப் பகுதிகளில் இத்திட்டத்தில் ஈடுபடும் தொழிலாளர்களுக்கு கடந்த பத்து வாரங்களுக்கும் மேலாக ஊதியம் வழங்கப்படவில்லை என்ற புகார் பரவலாக எழுந்துள்ளதாக அவர் தெரிவித்தார்.

வறுமைக் கோட்டிற்குக் கீழ் வாழும் ஏழை, எளிய குடும்பங்களைச் சேர்ந்தவர்கள் பெருமளவில் பணியாற்றும் இந்தத் திட்டத்தில், வாரத்திற்கு ஒருமுறை வழங்கப்பட வேண்டிய ஊதியம் நீண்ட நாட்களாக இழுத்தடிக்கப்படுவதால் தொழிலாளர்களும் அவர்களது குடும்பத்தினரும் கடுமையான பொருளாதார நெருக்கடிக்கு உள்ளாகியுள்ளனர் என தினகரன் சுட்டிக்காட்டினார்.

ஏற்கனவே அரிசி, பருப்பு, சர்க்கரை, எண்ணெய் போன்ற அத்தியாவசிய உணவுப் பொருட்களின் விலை கட்டுக்கடங்காத அளவிற்கு உயர்ந்து வரும் நிலையில், உழைப்பிற்கான ஊதியத்தைக்கூட உரிய நேரத்தில் வழங்காததால் அடுத்தடுத்து வரவிருக்கும் பண்டிகைக் காலங்கள் அவர்களுக்குச் சோதனை மிகுந்த காலங்களாக மாறக்கூடிய அபாயம் ஏற்பட்டுள்ளது என்று அவர் வருத்தம் தெரிவித்தார்.

இதையும் படிங்க: சொற்ப எண்ணிக்கையில் காலிப் பணியிடங்கள்..! அறிவிப்பாணை திருத்தம்.. TTV தினகரன் வலியுறுத்தல்..!!

இந்தச் சூழலில் தொழிலாளர்களின் நியாயமான கோரிக்கையைப் பரிசீலித்து அவர்களுக்கான ஊதியத்தை உடனடியாக விடுவிக்கத் தேவையான நடவடிக்கைகளை மேற்கொள்ள வேண்டும் என ஊரக வளர்ச்சித் துறையையும் தவெக அரசையும் தினகரன் வலியுறுத்தினார். கிராமப்புற மக்களின் வாழ்வாதாரத்தைப் பாதுகாக்கும் இந்தத் திட்டம் முறையாகச் செயல்படுத்தப்படாவிட்டால் ஏழை மக்களின் அன்றாட வாழ்க்கை மேலும் பாதிக்கப்படும் என்றும் அவர் எச்சரித்தார்.

இதையும் படிங்க: "அதிகார துஷ்பிரயோகம்"..! பேச்சுவார்த்தை என்ற பெயரில் அடைத்து வைப்பதா.? கொந்தளித்த TTV தினகரன்..!