ஜல்ஜீவன் மிஷன் திட்டத்தை செயல்படுத்த தனியாக நிதி ஒதுக்கீடு செய்ய முன்வராத மத்திய அரசு அதற்கான பங்களிப்பு தொகையை ஊரக உள்ளாட்சிக்கான நிதிக்குழு மானியத்தில் எடுத்து செலவிட அறிவுறுத்தப்பட்டுள்ளது. இதன் மூலம் தமிழ்நாடு அரசு மேலும் நிதி நெருக்கடியில் சிக்கும் நிலை உருவாகியுள்ளது.

தமிழ்நாட்டில் ஜல்ஜீவன் மிஷன் 2.0 திட்டத்தை செயல்படுத்த கடந்த மாதம் இரண்டாம் தேதி புரிந்துணர்வு ஒப்பந்தம் கையெழுத்தாகி 2028ஆம் ஆண்டு டிசம்பர் மாதம் வரை நீட்டிக்கப்பட்டது. இந்த திட்டத்தின்படி ஒப்புதல் அளிக்கப்பட்ட திட்டங்களின் மதிப்பீடு 18,123 கோடி ரூபாய் இதில் மத்திய அரசின் பங்கு 9,025.68 கோடி ரூபாய் தமிழ்நாடு அரசின் பங்கு 9,097.37 கோடியாகும். இந்த நிலையில் திட்டத்தை செயல்படுத்த மத்திய அரசு அளிக்க வேண்டிய 9,025 கோடி ரூபாய் நிதியை தனியாக அளிக்காமல் உரக உள்ளாட்சி அமைப்புகளுக்கான மத்திய அரசின் நிதிக்குழு மானியத்தில் இருந்து எடுத்து செலவிட அறிவுறுத்தப்பட்டுள்ளது.

இதனால் ஜல்ஜீவன் மிஷன் 2.0 திட்டத்தை எவ்வாறு செயல்படுத்துவது என தெரியாமல் விஜய் தலைமையிலான தமிழ்நாடு அரசு திணறி வருகிறது. ஏனெனில் 16வது நிதிக்குழு பரிந்துரைப்படி தமிழ்நாட்டின் ஊரக உள்ளாட்சி அமைப்புகளுக்கு 16930 கோடி ரூபாய் நிதி ஒதுக்கீடு செய்யப்பட்டுள்ளது. இந்த தொகை 2026- 27ஆம் ஆண்டு முதல் 2030-31 ஆம் நிதி ஆண்டு வரை ஊரக உள்ளாட்சி அமைப்புகளுக்கு வழங்கப்படும்.

இதையும் படிங்க: செசல்ஸ் நவசக்தி விநாயகர் கோயிலில் பிரதமர் மோடி தரிசனம்! தமிழர்கள் கட்டிய ஆலயத்தில் பூரண கும்ப மரியாதை!

ஆனால் இதில் ஜல்ஜீவன் திட்டத்துக்கு 9,025 கோடி ரூபாய் செலவிட்டால் எஞ்சிய 7,000 கோடி ரூபாய் மட்டுமே உள்ளாட்சி அமைப்புகளுக்கு மிஞ்சும். இதனால் உள்ளாட்சி அமைப்புகள் நிதி நெருக்கடியில் சிக்கி வளர்ச்சி திட்டங்களை செயல்படுத்த முடியாத நிலைக்கு தள்ளப்படும். ஏற்கனவே விபிஜிம்ஜி திட்டம் மூலம் தமிழ்நாடு அரசுக்கு ஆண்டுக்கு 5000 கோடி ரூபாய் கூடுதல் நிதிச்சுமை ஏற்பட்டுள்ள நிலையில் தற்போது ஜல்ஜீவன் திட்டம் மூலம் மேலும் 9,000 கோடி நிதிச்சுமை ஏற்படும் என்பதால் மாநில அரசு நிதி நிலைமை பெரும் பாதிப்பை சந்திக்கும் என்று கூறப்படுகிறது.

இதையும் படிங்க: நெய்வேலி தமிழ்நாட்டின் அடையாளம்... பங்கு விற்பனை முடிவுக்கு விஜய் கடும் எதிர்ப்பு..!! பிரதமருக்கு கடிதம்..!!