நொய்டா: உத்தரபிரதேச மாநிலம் நொய்டாவில் உள்ள ஒரு தொழிற்சாலையில் இன்று அதிகாலை பயங்கர தீவிபத்து ஏற்பட்டு, 10க்கும் மேற்பட்ட தொழிலாளர்கள் உள்ளே சிக்கிக் கொண்டுள்ளனர். மீட்புப் பணிகள் தீவிரமாக நடந்து வருகின்றன.

நொய்டாவின் செக்டர் 4 அருகே ஹரோலா பகுதியில் அமைந்துள்ள இந்த தொழிற்சாலை பிளாஸ்டிக் மற்றும் ரசாயனப் பொருட்கள் தயாரிக்கும் இடமாகும். இன்று அதிகாலை சுமார் 5 மணியளவில் உற்பத்தி பிரிவில் திடீரென தீப்பிடித்தது. 

எளிதில் தீப்பற்றும் பொருட்கள் அதிக அளவில் இருந்ததால், தீ மிக வேகமாக பரவியது. சில நிமிடங்களிலேயே முழு தொழிற்சாலையும் தீயில் சிக்கியது. சம்பவ இடத்திலிருந்து கரும்புகை மூட்டம் வானத்தை மூடியது. அருகிலுள்ள குடியிருப்பு பகுதிகளில் வசிப்பவர்கள் பீதியடைந்தனர்.

இதையும் படிங்க: கேஸ் சிலிண்டர் Shortage..!! இண்டக்ஷன் ஸ்டவ்களை வாங்க முண்டியடிக்கும் மக்கள்..!! ஆன்லைனிலும் காலி..!!

மின் கசிவு அல்லது மின் சுற்று கோளாறு காரணமாக தீ ஏற்பட்டிருக்கலாம் என்று ஆரம்ப கட்ட தகவல்கள் தெரிவிக்கின்றன. தீயணைப்புத் துறைக்கு தகவல் கிடைத்ததும், 10க்கும் மேற்பட்ட தீயணைப்பு வாகனங்கள் உடனடியாக சம்பவ இடத்திற்கு விரைந்தன. 

தீயணைப்பு வீரர்கள் தொழிற்சாலையின் ஜன்னல்கள், கதவுகளை உடைத்து உள்ளே நுழைந்து மீட்புப் பணியில் ஈடுபட்டனர். இரவு முழுவதும் பணியாற்றிய சுமார் 10 முதல் 15 தொழிலாளர்கள் உள்ளே சிக்கியிருப்பதாக தகவல் வெளியாகியுள்ளது.

சில தொழிலாளர்கள் 2வது மாடியிலிருந்து கீழே குதித்து உயிரை காப்பாற்றிக் கொண்டனர். தீயில் சிக்கியவர்களை மீட்கும் முயற்சியில் தீயணைப்பு வீரர்களுடன் காவல்துறையினரும், மருத்துவக் குழுக்களும் இணைந்து செயல்பட்டு வருகின்றனர். 

தொழிற்சாலையில் இருந்த பிளாஸ்டிக், ரசாயனப் பொருட்கள் எரிவதால் வெளியாகும் நச்சுப் புகை அருகிலுள்ள குடியிருப்பு பகுதிகளை பாதிக்கும் அபாயம் உள்ளது. இதனால் அப்பகுதி மக்களுக்கு எச்சரிக்கை விடுக்கப்பட்டுள்ளது.

இதுவரை எத்தனை பேர் உயிரிழந்தனர் அல்லது காயமடைந்தனர் என்பது உறுதியாகத் தெரியவில்லை. மீட்புப் பணிகள் தொடர்ந்து நடைபெற்று வருகின்றன. மாவட்ட ஆட்சியர் மற்றும் உயர் அதிகாரிகள் சம்பவ இடத்திற்கு விரைந்து வந்துள்ளனர். 

தீ விபத்து குறித்து விரிவான விசாரணைக்கு உத்தரவிடப்பட்டுள்ளது. தொழிற்சாலையில் பாதுகாப்பு வசதிகள் போதுமான அளவில் இல்லாதது இந்த விபத்துக்கு காரணமாக இருக்கலாம் என்று ஆரம்ப கட்டத்தில் சந்தேகம் எழுந்துள்ளது.

இந்த தீவிபத்து தொழிலாளர்களின் பாதுகாப்பு மற்றும் தொழிற்சாலை பாதுகாப்பு விதிகள் குறித்து மீண்டும் பெரும் கேள்வியை எழுப்பியுள்ளது.

இதையும் படிங்க: ஆம்ஸ்ட்ராங் கொலை வழக்கு... ஜாமீன் ரத்துக்கு இடைக்கால தடை.. சுப்ரீம் கோர்ட் உத்தரவு..!!