திமுக முன்னாள் அமைச்சர் கே. பொன்முடிக்கு எதிராக அமலாக்கத்துறை தொடர்ந்திருந்த சட்டவிரோத பணப்பரிமாற்றத் தடைச் சட்ட (பிஎம்எல்ஏ) வழக்கை சென்னை உயர்நீதிமன்றம் ரத்து செய்துள்ளது. இது செம்மண் முறைகேடு தொடர்பான மூல வழக்கில் அவர் விடுதலையானதை அடுத்து வந்த முக்கிய தீர்ப்பாகும்.2006 முதல் 2011 வரையிலான திமுக ஆட்சிக் காலத்தில் கனிம வளத் துறை அமைச்சராக பொன்முடி பதவி வகித்தார். அப்போது விழுப்புரம் மாவட்டம் வானூர் தாலுகா பூத்துறை கிராமத்தில் உள்ள அரசு செம்மண் குவாரியில் அனுமதிக்கப்பட்ட அளவை விட அதிகமாக செம்மண் வெட்டி எடுக்கப்பட்டதாக குற்றச்சாட்டு எழுந்தது.

இதன் மூலம் அரசுக்கு சுமார் 28.37 கோடி ரூபாய் வருவாய் இழப்பு ஏற்பட்டதாகக் கூறப்பட்டது. பொன்முடி தனது மகன் கவுதம சிகாமணி, நண்பர்கள் மற்றும் உறவினர்களுக்கு குவாரி உரிமம் வழங்கி, அவர்கள் அனுமதிக்கப்பட்ட அளவுக்கு மேல் மண் அள்ளி, உரிய கட்டணம் செலுத்தாமல் அரசுக்கு இழப்பை ஏற்படுத்தியதாகவும், அதில் சதித்திட்டம் இருந்ததாகவும் குற்றம் சாட்டப்பட்டது.இந்த அடிப்படையில் 2012 ஆம் ஆண்டு விழுப்புரம் மாவட்ட குற்றப் பிரிவு போலீசார் எஃப்ஐஆர் பதிவு செய்தனர். ஐபிசி பிரிவுகள் மற்றும் சுரங்கங்கள் மற்றும் கனிமங்கள் சட்டத்தின் கீழ் வழக்கு தொடரப்பட்டது.

பின்னர் இந்த மூல வழக்கு (பிரிடிகேட் ஆபன்ஸ்) அடிப்படையில் அமலாக்கத்துறை சட்டவிரோத பணப்பரிமாற்றத் தடைச் சட்டத்தின் கீழ் வழக்குப்பதிவு செய்தது. அதில் பெறப்பட்ட தொகை ஹவாலா போன்ற வழிகளில் வெளிநாட்டு நிறுவனங்களில் முதலீடு செய்யப்பட்டதாகவும் குற்றம் சாட்டப்பட்டது. இந்த வழக்கு சென்னை சிறப்பு நீதிமன்றத்தில் நிலுவையில் இருந்தது.நீண்ட விசாரணைக்குப் பிறகு, 2026 ஏப்ரல் 2 ஆம் தேதி விழுப்புரம் மாவட்ட முதன்மை அமர்வு நீதிமன்றம் இந்த செம்மண் முறைகேடு வழக்கில் பொன்முடி, அவரது மகன் கவுதம சிகாமணி உள்ளிட்ட ஏழு பேரையும் விடுதலை செய்து தீர்ப்பளித்தது. குற்றச்சாட்டுகளை நிரூபிக்க போதிய ஆதாரங்கள் இல்லை என்றும், உரிமம் வழங்கியதில் முறைகேடு அல்லது சதித்திட்டம் நிரூபிக்கப்படவில்லை என்றும், அரசுக்கு ஏற்பட்டதாகக் கூறப்படும் இழப்பு அனுமான அடிப்படையிலானது என்றும் நீதிமன்றம் தெரிவித்தது.

இதையும் படிங்க: ஜெம் வீரமணி வழக்கை கையில் எடுக்கும் அமலாக்கத்துறை... விஷயத்தை மூடி மறைத்த அனைவரும் கூண்டோடு கைது?

இந்த விடுதலைத் தீர்ப்பை அடுத்து, மூல வழக்கில் விடுதலையானதால் அமலாக்கத்துறை வழக்கு தொடர முடியாது என வாதிட்டு பொன்முடி உள்ளிட்டோர் சென்னை உயர்நீதிமன்றத்தில் மனு தாக்கல் செய்தனர். உச்சநீதிமன்றத்தின் விஜய் மதன்லால் சவுத்ரி வழக்கில் வழங்கப்பட்ட தீர்ப்பின் அடிப்படையில், பிரிடிகேட் ஆபன்ஸில் விடுதலையானால் பிஎம்எல்ஏ வழக்கு நிலைக்காது என அவர்கள் சுட்டிக்காட்டினர்.இந்த மனு தலைமை நீதிபதி எஸ்.ஏ. தர்மாதிகாரி மற்றும் நீதிபதி ஜி. அருள்முருகன் அடங்கிய அமர்வில் விசாரணைக்கு வந்தது. அமர்வு, மூல வழக்கில் ஏப்ரல் 2, 2026 அன்று அனைத்து குற்றவாளிகளும் விடுதலை செய்யப்பட்டதை ஏற்றுக்கொண்டு, உச்சநீதிமன்றத் தீர்ப்பின் படி அமலாக்கத்துறை நடவடிக்கைகள் தொடர முடியாது என தெரிவித்தது. அதன்படி பொன்முடிக்கு எதிரான பிஎம்எல்ஏ வழக்கை ரத்து செய்து உத்தரவிட்டது.

இதையும் படிங்க: அதிமுக எம்எல்ஏக்கள் ராஜினாமா விவகாரம்..! வழக்கு தள்ளுபடி... சென்னை ஹைகோர்ட் அதிரடி உத்தரவு..!!