தமிழகத்தில் பெருகி வரும் முடி மாற்று அறுவை சிகிச்சை (Hair Transplant) மற்றும் அழகு சிகிச்சை மையங்களை முறைப்படுத்தவும், நோயாளிகளின் பாதுகாப்பை உறுதி செய்யவும் தமிழக அரசு புதிய வழிகாட்டுதல்களை வெளியிட்டு அரசாணை பிறப்பித்துள்ளது. இனி வரும் காலங்களில் இத்தகைய சிகிச்சைகளை வழங்கும் நிறுவனங்கள் 'தமிழ்நாடு மருத்துவ நிறுவனங்கள் விதிகளின்' கீழ் கட்டாயம் பதிவு செய்யப்பட வேண்டும் எனத் தெரிவிக்கப்பட்டுள்ளது.

முடி மாற்று அறுவை சிகிச்சையை ஒரு பதிவு செய்யப்பட்ட மருத்துவப் பயிற்சியாளர் மட்டுமே செய்ய வேண்டும். அவர்கள் பிளாஸ்டிக் அறுவை சிகிச்சையில் MCh/DNB அல்லது தோல் மருத்துவத்தில் (Dermatology) MD/DNB பட்டம் பெற்றவர்களாக இருக்க வேண்டும்.

ஒவ்வொரு அறுவை சிகிச்சையின் போதும் ஒரு மயக்க மருந்து நிபுணர் (Anesthetist) உடனிருக்க வேண்டும். அவசர கால மருந்துகள் மற்றும் மயக்க மருந்து காப்புப்பிரதி வசதிகள் தயார் நிலையில் இருக்க வேண்டும். அறுவை சிகிச்சைக்கு முன் நிபுணர்களிடம் முறையான அனுமதி பெறப்பட வேண்டும்.

இதையும் படிங்க: விஜய் தாக்கத்தை ஏற்படுத்துவார்... ஆனால்..! நிதியமைச்சர் நிர்மலா சீதாராமன் ஓபன் டாக்..!

மருத்துவ அவசர நிலைகளைத் தகுந்த முறையில் கையாளத் தேவையான அனைத்து நவீன உபகரணங்களையும் சிகிச்சை மையங்கள் பராமரிக்க வேண்டும். அறுவை சிகிச்சை அறைகள் (OT) தரமான வழிகாட்டுதல்களின்படி இருக்க வேண்டும்.

அனைத்து மருத்துவ நடைமுறைகளும் இந்திய தோல் மருத்துவர்கள் சங்கம் (IADVL) மற்றும் இந்திய தோல் அறுவை சிகிச்சை நிபுணர்கள் சங்கம் (ACSI) பரிந்துரைத்த குறைந்தபட்ச நடைமுறை வழிகாட்டுதல்களின்படி அமைய வேண்டும். புதிதாகத் தொடங்கப்படும் மற்றும் ஏற்கனவே இயங்கி வரும் மையங்கள் பின்வரும் ஆவணங்களைச் சமர்ப்பித்துத் தங்களைப் பதிவு செய்துகொள்ள வேண்டும்:

மருத்துவர்கள், செவிலியர்கள், மருந்தாளுநர்கள் மற்றும் தொழில்நுட்ப வல்லுநர்களின் பதிவு எண்கள், உள்ளூர் நிர்வாகத்திடம் பெறப்பட்ட சுகாதாரச் சான்றிதழ், உயிர் மருத்துவக் கழிவு மேலாண்மை ஒப்பந்தம், தீயணைப்புத் துறை உரிமம் மற்றும் கட்டிட நிலைத்தன்மை சான்றிதழ், மாசு கட்டுப்பாட்டு வாரிய உரிமம் மற்றும் மருந்தக உரிமம், இரத்த வங்கி மற்றும் லிப்ட் வசதி இருப்பின் அதற்கான உரிய உரிமங்கள், அழகு சாதனச் சேவைகளை வழங்கும் மருத்துவமனைகளுக்கு எனப் பொதுவான குறைந்தபட்சத் தரம் நிர்ணயிக்கப்பட்டுள்ளது. இந்த விதிகளை முறையாகப் பின்பற்றாத நிறுவனங்கள் மற்றும் போலி மருத்துவர்கள் மீது கடும் நடவடிக்கை எடுக்கப்படும் எனத் தமிழக சுகாதாரத் துறை எச்சரித்துள்ளது.

இதையும் படிங்க: 152 அடியாக உயர்த்துக...! முல்லை பெரியாறு விவகாரத்தில் தமிழக அரசுக்கு விவசாயிகள் கெடு!