தமிழகச் சட்டமன்றத் தேர்தலுக்கான தேதிகள் அறிவிக்கப்பட்டுள்ள நிலையில், வேட்புமனுத் தாக்கல் மற்றும் இதர முக்கியத் தேதிகள் குறித்த அதிகாரப்பூர்வ அறிவிப்பை இந்தியத் தேர்தல் ஆணையம் வெளியிட்டுள்ளது. இதன்படி, தமிழகத்தில் இம்மாத இறுதியில் அதாவது மார்ச் 30-ஆம் தேதி முதல் வேட்புமனுத் தாக்கல் முறைப்படி தொடங்குகிறது.
வரும் மார்ச் 30, 2026 (திங்கட்கிழமை) அன்று வேட்புமனுத் தாக்கல் தொடங்குகிறது. அன்றைய தினம் முதல் வேட்பாளர்கள் அந்தந்தத் தொகுதி தேர்தல் நடத்தும் அலுவலர்களிடம் மனுக்களைத் தாக்கல் செய்யலாம்.
மனுக்களைத் தாக்கல் செய்ய ஏப்ரல் 6, 2026 கடைசி நாளாகும். அன்றைய தினம் மாலை 3 மணி வரை மட்டுமே மனுக்கள் ஏற்றுக்கொள்ளப்படும். தாக்கல் செய்யப்பட்ட வேட்புமனுக்கள் மீதான ஆய்வு மற்றும் பரிசீலனை ஏப்ரல் 7, 2026 அன்று நடைபெறும்.
இதையும் படிங்க: திமுக-விற்கு வேல்முருகன் கெடு! 234 தொகுதிகளிலும் தனித்து போட்டியிட தமிழக வாழ்வுரிமை கட்சி தயார்!
தேர்தலில் போட்டியிட விரும்பாதவர்கள் அல்லது மாற்று வேட்பாளர்கள் தங்களது மனுக்களைத் திரும்பப் பெற ஏப்ரல் 9, 2026 கடைசி நாளாக நிர்ணயிக்கப்பட்டுள்ளது. அன்று மாலையே இறுதி வேட்பாளர் பட்டியல் வெளியிடப்படும்.
தமிழகத்தில் ஏப்ரல் 23-ஆம் தேதி ஒரே கட்டமாக வாக்குப்பதிவு நடைபெறவுள்ள நிலையில், மார்ச் 30-ஆம் தேதி வேட்புமனுத் தாக்கல் தொடங்குவது அரசியல் கட்சிகளிடையே பெரும் பரபரப்பை ஏற்படுத்தியுள்ளது. வேட்புமனுத் தாக்கலின் போது கூட்டமாகச் செல்லத் தடை விதிக்கப்பட்டுள்ளதோடு, ஊர்வலங்களுக்கான வழிகாட்டு நெறிமுறைகளையும் தேர்தல் ஆணையம் கடுமையாக்கியுள்ளது.
இதையும் படிங்க: சென்னையில் பறக்கும் படைகள் அதிரடி! 128 வாகனங்களில் தேர்தல் கண்காணிப்பு பணி தீவிரம்!