ஜப்பானில் நாளை, செப்டம்பர் 19-ம் தேதி தொடங்க உள்ள 2026 ஆசிய விளையாட்டுப் போட்டிகளின் தொடக்க விழாவில் இந்தியாவின் தேசியக் கொடியை ஏந்திச் செல்லும் பெருமையை துப்பாக்கிச் சுடுதல் வீராங்கனை மனு பாகரும், குண்டு எறிதல் வீரர் தஜிந்தர்பால் சிங் தூரும் பெற்றுள்ளனர். இதற்கான அறிவிப்பு இன்று வெளியாகி, இந்திய விளையாட்டு ரசிகர்களிடையே எதிர்பார்ப்பை அதிகரித்துள்ளது.

ஜப்பானின் ஐச்சி-நகோயா பகுதியில் நடைபெறும் 20-வது ஆசிய விளையாட்டுப் போட்டிகள் செப்டம்பர் 19 முதல் அக்டோபர் 4-ம் தேதி வரை நடைபெறுகின்றன. தொடக்க விழா நகோயாவில் உள்ள பலோமா மிசுஹோ மைதானத்தில் நடைபெற உள்ளது.

இந்திய அணியின் தலைமைப் பொறுப்பாளர் சஹ்தேவ் யாதவ், மனு பாகர் இந்தியாவின் கொடியேந்திகளில் ஒருவராக இருப்பார் என்பதை அறிவித்துள்ளார். அதேபோல், தஜிந்தர்பால் சிங் தூர் இரண்டாவது கொடியேந்தியாக இருப்பதை இந்திய தடகள கூட்டமைப்பு உறுதி செய்துள்ளது.

இதையும் படிங்க: 17 இன்னிங்ஸ்.. 1,000 ரன்கள்! விராட் கோலியை பின்னுக்குத் தள்ளிய சுப்மன் கில்! பிரம்மாண்ட சாதனை!!

24 வயதான மனு பாகர், பாரிஸ் 2024 ஒலிம்பிக் போட்டியில் இரண்டு பதக்கங்களை வென்று வரலாறு படைத்தவர். ஒரே ஒலிம்பிக் தொடரில் இரண்டு பதக்கங்களை வென்ற சுதந்திர இந்தியாவின் முதல் வீராங்கனை என்ற சிறப்பையும் அவர் பெற்றுள்ளார். தற்போது ஆசிய விளையாட்டில் 10 மீட்டர் ஏர் பிஸ்டல் மற்றும் 25 மீட்டர் பிஸ்டல் பிரிவுகளில் அவர் போட்டியிட உள்ளார்.

மறுபுறம், தஜிந்தர்பால் சிங் தூர் ஆசிய விளையாட்டில் குண்டு எறிதல் பிரிவில் தொடர்ந்து இரண்டு முறை தங்கம் வென்றுள்ளார். 2018 ஜகார்த்தா மற்றும் 2022 ஹாங்சோ ஆசிய விளையாட்டுகளில் அவர் தங்கப் பதக்கம் வென்றிருந்தார். இந்த முறையும் தனது பட்டத்தை தக்கவைக்க அவர் களமிறங்குகிறார்.

இந்த முறை இந்தியா 503 வீரர்களைக் கொண்ட அணியை அனுப்பியுள்ளது. 269 ஆண்கள், 234 பெண்கள் என மொத்தம் 503 வீரர்கள் பல்வேறு போட்டிகளில் பங்கேற்கின்றனர். 43 விளையாட்டுகளில் நடைபெறும் இந்த ஆசிய விளையாட்டுப் போட்டிகளில், தொடக்க விழாவிலேயே இந்தியாவின் இரண்டு முன்னணி நட்சத்திரங்கள் தேசியக் கொடியை ஏந்துவது ரசிகர்களின் கவனத்தை ஈர்த்துள்ளது.

இதையும் படிங்க: ஒரே அம்பில் மாறியது வரலாறு! வில்வித்தை உலகக் கோப்பையில் இந்திய வீரர் தீரஜ் பொம்மதேவரா தங்கம் வென்று அசத்தல்!