ஐபிஎல் 2026 தொடரின் 30-வது லீக் போட்டியில், குஜராத் டைட்டன்ஸ் (GT) அணியைத் தனது சொந்த மண்ணிலேயே 99 ரன்கள் வித்தியாசத்தில் வீழ்த்தி மும்பை இந்தியன்ஸ் (MI) அணி பிரம்மாண்ட வெற்றியைப் பதிவு செய்துள்ளது. நரேந்திர மோடி மைதானத்தில் நடைபெற்ற இந்தப் போட்டியில், மும்பை வீரர் திலக் வர்மாவின் மின்னல் வேக சதம் ஆட்டத்தின் போக்கையே மாற்றியது.

டாஸ் வென்ற குஜராத் கேப்டன் சுப்மன் கில் பந்துவீச்சைத் தேர்வு செய்தார். மும்பை அணி 44 ரன்களுக்கு 3 விக்கெட்டுகளை இழந்து தடுமாறிய போது, திலக் வர்மா களம் புகுந்தார்: வெறும் 45 பந்துகளில் தனது கன்னிச் சதத்தை விளாசி திலக் வர்மா அசத்தினார் (101* ரன்கள், 8 பவுண்டரிகள், 7 சிக்ஸர்கள்). இதன் மூலம் மும்பை அணிக்காக அதிவேக சதம் அடித்த சனத் ஜெயசூர்யாவின் சாதனையை அவர் சமன் செய்தார். மும்பை இந்தியன்ஸ் அணி 20 ஓவர்கள் முடிவில் 5 விக்கெட் இழப்பிற்கு 199 ரன்கள் சேர்த்தது.

200 ரன்கள் என்ற இலக்கை விரட்டிய குஜராத் அணிக்கு ஆரம்பமே அதிர்ச்சியாக அமைந்தது. மும்பை அணியின் இளம் வேகப்பந்துவீச்சாளர் அஷ்வனி குமார், குஜராத் கேப்டன் சுப்மன் கில் உள்ளிட்ட 4 முக்கிய விக்கெட்டுகளை வீழ்த்தி (4/24) குஜராத்தின் பேட்டிங் வரிசையை நிலைகுலையச் செய்தார். குஜராத் தரப்பில் வாஷிங்டன் சுந்தர் (26) மற்றும் ஷாரூக் கான் (17) தவிர மற்ற வீரர்கள் சொற்ப ரன்களில் ஆட்டமிழந்தனர்.

இதையும் படிங்க: கடைசி ஓவரில் கைநழுவிய வெற்றி! 10 ரன்கள் வித்தியாசத்தில் சென்னை சூப்பர் கிங்ஸ் தோல்வி!

மும்பை பந்துவீச்சாளர்களின் துல்லியமான தாக்குதலால், குஜராத் டைட்டன்ஸ் அணி 15.5 ஓவர்களில் அனைத்து விக்கெட்டுகளையும் இழந்து 100 ரன்களுக்குச் சுருண்டது. மும்பை தரப்பில் அஷ்வனி குமார் 4 விக்கெட்டுகளையும், மிட்செல் சான்ட்னர் மற்றும் கசன்பர் தலா 2 விக்கெட்டுகளையும் வீழ்த்தினர்.

தன்னை கேப்டனாக அறிமுகப்படுத்தி கோப்பை வென்று கொடுத்த குஜராத் அணிக்கு எதிராக, மும்பை கேப்டனாக ஹர்திக் பாண்டியா இன்று களம் கண்டார். பேட்டிங்கில் 15 ரன்கள் எடுத்த அவர், பந்துவீச்சில் ஜாஸ் பட்லரின் விக்கெட்டை வீழ்த்தி அசத்தினார்.

இந்த 99 ரன்கள் வித்தியாசத்திலான வெற்றி, மும்பை இந்தியன்ஸ் அணிக்குத் தொடரில் ஒரு வலுவான மீட்சியை அளித்துள்ளது.

இதையும் படிங்க: பெங்களூருவின் கோட்டையை தகர்த்த டெல்லி! சின்னசாமி மைதானத்தில் ஆர்சிபி முதல் தோல்வி!