அமெரிக்காவின் 47வது அதிபராக இரண்டாவது முறையாக டொனால்டு ட்ரம்ப் இந்தாண்டு ஜனவரி 20ஆம் தேதி பதவியேற்றார். இவரது "அமெரிக்கா முதலில்" ("America First") கொள்கையின் முக்கிய அம்சமாக, உலகளாவிய வர்த்தகத்தில் கடுமையான வரி விதிப்புகளை அறிமுகப்படுத்தினார்.

கடந்த ஏப்ரல் 2ம் தேதி இந்தியா உட்பட பல்வேறு நாடுகளின் மீதும் பரஸ்பர வரி விதித்த டிரம்ப், ஜூலை 9ம் தேதி வரை இந்த வரி விதிப்பை நிறுத்தி வைத்திருந்தார். சில தினங்களுக்கு முன் அவர், அனைத்து நாடுகளின் மீதான பரஸ்பர வரி விதிப்புக்கான கெடுவை ஆகஸ்ட் 1ம் தேதி வரை நீட்டிப்பதாக அறிவித்தார்.

இதற்கிடையே, வங்கதேசம், மலேசியா, ஜப்பான் உள்ளிட்ட 14 நாடுகளுக்கு பரஸ்பர வரி விதிக்கப்படுவதாக அதிபர் டிரம்ப் கையெழுத்திட்ட கடிதங்கள் அனுப்பப்பட்டன. இந்த வரி விதிப்பு அடுத்த மாதம் 1ம் தேதி முதல் அமலுக்கு வருகிறது. பின்னர், பிரேசிலுக்கு 50 சதவீத வரி விதித்து டிரம்ப் உத்தரவிட்டார். பிரேசில், அல்ஜீரியா, புருனே, ஈராக், லிபியா, மால்டோவா, பிலிப்பைன்ஸ் மற்றும் இலங்கை ஆகிய 8 நாடுகளுக்கு, புதிய வரி விதிப்பு குறித்து கடிதங்கள் அனுப்பப்பட்டு உள்ளன. வரும் ஆகஸ்ட் 1ம் தேதி புதிய வரி விதிப்பு நடைமுறைக்கு வருகிறது.

இதையும் படிங்க: பேசி பார்ப்போம்! சரிவரலைனா மொத்தமா முடிச்சி விட்ருவோம்! ஹமாஸை எச்சரிக்கும் இஸ்ரேல்.. நெதன்யாகு வார்னிங்!

இந்த நிலையில் அமெரிக்க அதிபர் டொனால்டு ட்ரம்ப், கனடாவில் இருந்து இறக்குமதி செய்யப்படும் பொருட்களுக்கு 35% வரி விதிக்கப்படும் என அறிவித்தார், இது ஆகஸ்ட் 1, 2025 முதல் அமலுக்கு வரும். இந்த முடிவு, அமெரிக்காவின் மிக முக்கிய வர்த்தகப் பங்காளியான கனடாவுடனான உறவில் பதற்றத்தை ஏற்படுத்தியது. ட்ரம்ப், இந்த வரி விதிப்பிற்கு முக்கிய காரணமாக, கனடாவில் இருந்து அமெரிக்காவிற்கு நுழையும் பென்டானில் போதைப்பொருள் பரவலை கட்டுப்படுத்தத் தவறியதை குறிப்பிட்டார். 

மேலும், கனடாவின் 400% வரை உயர்ந்த பால் பொருட்கள் மீதான வரி மற்றும் அமெரிக்க பொருட்களுக்கு விதிக்கப்பட்ட பதிலடி வரிகளை அவர் விமர்சித்தார். 2024இல் அமெரிக்காவிற்கு கனடா $413 பில்லியன் மதிப்புள்ள பொருட்களை ஏற்றுமதி செய்தது, ஆனால் $349 பில்லியன் மதிப்புள்ள அமெரிக்க பொருட்களை மட்டுமே இறக்குமதி செய்ததால், ஏற்பட்ட வர்த்தக பற்றாக்குறையும் இந்த முடிவுக்கு ஒரு காரணமாக அமைந்தது. 

கனடா, மார்ச் 4, 2025 முதல் $155 பில்லியன் மதிப்புள்ள அமெரிக்க பொருட்களுக்கு 25% வரி விதித்தது, இதில் $30 பில்லியன் மதிப்புள்ள பொருட்களுக்கு உடனடியாகவும், மீதமுள்ளவற்றுக்கு 21 நாட்களுக்குப் பிறகும் அமலுக்கு வரும். மெக்ஸிகோ, மார்ச் 9, 2025 இல், அமெரிக்க பொருட்களுக்கு 25% பதிலடி வரி அறிவித்தது, மேலும் கூடுதல் வரி அல்லாத நடவடிக்கைகளையும் திட்டமிட்டது. சீனா, பிப்ரவரி 10, 2025 முதல், அமெரிக்க விவசாய பொருட்கள், எரிசக்தி பொருட்கள், மற்றும் வாகனங்களுக்கு 15% முதல் 34% வரை வரி விதித்தது, மேலும் 15 அமெரிக்க நிறுவனங்களுக்கு விற்பனை கட்டுப்பாடுகளை அறிவித்தது. 

இந்த வரி விதிப்புகள், உலகளாவிய பொருளாதாரத்தில் குழப்பத்தை ஏற்படுத்தியுள்ளன. பொருளாதார வல்லுநர்கள், இந்த வரிகள் அமெரிக்க நுகர்வோருக்கு விலைவாசி உயர்வை ஏற்படுத்தும் என எச்சரிக்கின்றனர். கனடாவின் பிரதமர் மார்க் கார்னி, இந்த வரிகளை "நியாயமற்றவை" எனக் கண்டித்து, கனடிய தொழிலாளர்களையும் வணிகங்களையும் பாதுகாக்க தொடர்ந்து பேச்சுவார்த்தை நடத்துவதாக உறுதியளித்தார். 

இதையும் படிங்க: நிலைமை சரியில்லை! ஈரானுக்கு போகாதீங்க! சொந்த நாட்டு மக்களுக்கு அமெரிக்கா வார்னிங் மெசேஜ்!