கொல்கத்தா: மேற்கு வங்கத்தில் நடைபெற உள்ள சட்டசபை இடைத்தேர்தலுக்கு இன்னும் சில நாட்களே உள்ள நிலையில், மம்தா பானர்ஜி தலைமையிலான அணிக்கு அடுத்தடுத்து அதிர்ச்சி ஏற்பட்டுள்ளது. நந்திகிராம் தொகுதியில் போட்டியிட இருந்த மம்தா அணியின் வேட்பாளர் சஞ்சிதா பிரதான் டே வேட்புமனுவை வாபஸ் பெற்ற நிலையில், தற்போது ரெஜிநகர் தொகுதியில் அந்த அணியின் வேட்பாளர் ரபியுல் ஆலம் சவுத்ரியும் தனது வேட்புமனுவை திரும்பப் பெற்றுள்ளார்.

மேற்கு வங்கத்தில் நந்திகிராம் மற்றும் ரெஜிநகர் சட்டசபை தொகுதிகளுக்கு அக்டோபர் 6-ம் தேதி இடைத்தேர்தல் நடைபெற உள்ளது. இந்த தேர்தல் களத்தில் கட்சிகளின் வேட்பாளர் தேர்வு மற்றும் தேர்தல் சின்னம் தொடர்பாக பரபரப்பான அரசியல் சூழல் நிலவி வருகிறது. குறிப்பாக திரிணமுல் காங்கிரஸ் கட்சிக்குள் ஏற்பட்டுள்ள பிளவு காரணமாக தேர்தல் ஆணையம் கட்சியின் பெயர் மற்றும் பாரம்பரிய சின்னம் தொடர்பாக இடைக்கால நடவடிக்கைகளை மேற்கொண்டுள்ளது.

இந்த சூழலில் மம்தா பானர்ஜி தலைமையிலான அணியின் சார்பில் ரெஜிநகர் தொகுதிக்கு மூத்த கட்சி நிர்வாகியான ரபியுல் ஆலம் சவுத்ரி வேட்பாளராக அறிவிக்கப்பட்டிருந்தார். தற்போது அவர் திடீரென தேர்தல் போட்டியில் இருந்து விலகியுள்ளார். புதிய தேர்தல் சின்னத்தை மக்களிடம் கொண்டு சேர்ப்பதில் சிரமம் இருப்பதாக அவர் கூறியதாக சில செய்திகள் தெரிவிக்கின்றன. மேலும், கட்சி தொண்டர்கள் களத்தில் பிரசாரம் செய்ய முடியாத நிலை மற்றும் அழுத்தம் இருப்பதாகவும் மற்றொரு செய்தி நிறுவனம் தெரிவித்துள்ளது.

இதையும் படிங்க: மம்தா–கனிமொழி சந்திப்பு: 2029 லோக்சபா தேர்தலுக்கு திமுக போடும் கணக்கு? தேசிய அரசியலில் புதிய திருப்பம்!

இதற்கு ஒரு நாள் முன்னதாகவே நந்திகிராம் தொகுதியில் மம்தா அணியின் வேட்பாளர் சஞ்சிதா பிரதான் டே தனது வேட்புமனுவை வாபஸ் பெற்றிருந்தார். அவர் மேற்கு வங்க முதல்வர் சுவேந்து அதிகாரியை சந்தித்த பின்னர் இந்த முடிவு எடுத்ததாக தகவல்கள் வெளியாகின. இதையடுத்து ரெஜிநகரிலும் வேட்பாளர் விலகியிருப்பது மேற்கு வங்க அரசியலில் புதிய பரபரப்பை ஏற்படுத்தியுள்ளது.

இரண்டு தொகுதிகளிலும் மம்தா அணியின் வேட்பாளர்கள் அடுத்தடுத்து தேர்தல் களத்தில் இருந்து விலகியுள்ளதால், அக்டோபர் 6-ம் தேதி நடைபெற உள்ள இடைத்தேர்தல் மீதான கவனம் மேலும் அதிகரித்துள்ளது. அதே நேரத்தில், தேர்தல் ஆணையத்தின் கட்சி பெயர் மற்றும் சின்னம் தொடர்பான நடவடிக்கைகளும் இந்த தேர்தலின் முக்கிய அம்சமாக மாறியுள்ளது.

இதையும் படிங்க: திரிணாமுல் காங்கிரஸ் பெயர், சின்னம் முடக்கம்! இது கட்சி திருட்டு! ராகுல் காந்தி காட்டம்!