தமிழக முதலமைச்சர் சி. ஜோசப் விஜய், முன்னாள் குடியரசுத் தலைவர் ஏ.பி.ஜே. அப்துல் கலாம் பிறந்தநாளான அக்டோபர் 15 ஆம் தேதியை முன்னிட்டு உணர்வுப்பூர்வமான அஞ்சலி செய்தி வெளியிட்டுள்ளார். இந்தியாவின் அறிவியல் வளர்ச்சிக்கும், மாணவர்கள் மற்றும் இளைஞர்களின் கனவுகளுக்கு ஊக்கமளித்து, அவர்களின் இலட்சியப் பயணத்திற்கு வழிகாட்டியாகத் திகழ்ந்த ஏவுகணை நாயகனை நினைவுகூர்ந்து போற்றி வணங்குவதாக அவர் தனது செய்தியில் குறிப்பிட்டுள்ளார்.

ராமேஸ்வரத்தில் எளிய குடும்பத்தில் பிறந்து, உலகளாவிய அங்கீகாரம் பெற்ற விஞ்ஞானியாகவும், இந்தியாவின் 11வது குடியரசுத் தலைவராகவும் உயர்ந்த கலாமின் வாழ்க்கை, பல தலைமுறைகளுக்கும் ஊக்கமூட்டும் கதையாகத் திகழ்கிறது. இஸ்ரோவில் விஞ்ஞானியாகப் பணியாற்றி, இந்தியாவின் முதல் செயற்கைக்கோள் ஏவுகணைத் திட்டத்தை வெற்றிகரமாக நடத்தி, பின்னர் ஏவுகணைத் தொழில்நுட்ப வளர்ச்சியில் முக்கியப் பங்காற்றியவர் அவர். இந்திய அரசின் முதன்மை அறிவியல் ஆலோசகராகவும், குடியரசுத் தலைவராகவும் பல்வேறு உயரிய பொறுப்புகளை ஏற்றிருந்தபோதிலும், ‘ஆசிரியர்’ என்ற அடையாளத்தையே தன் வாழ்வின் மகுடமாகக் கருதினார்.

இறுதி மூச்சுவரை மாணவர்களின் முன்னேற்றத்திற்காகத் தன் வாழ்வை அர்ப்பணித்த அவரது எளிமை, நேர்மை மற்றும் அறிவியல் சிந்தனை ஆகியவை இன்றும் போற்றுதலுக்குரியவை என முதலமைச்சர் விஜய் தனது செய்தியில் வலியுறுத்தியுள்ளார்.கலாமின் பிறந்தநாள் உலக மாணவர் தினமாகவும் கொண்டாடப்படுகிறது. அவரது உயரிய சிந்தனைகளையும் தொலைநோக்குப் பார்வையையும் நம் மனதில் நிறுத்தி, வளமான மற்றும் வலிமையான இந்தியாவை உருவாக்க இந்நாளில் உறுதியேற்க வேண்டும் என்று முதலமைச்சர் அழைப்பு விடுத்துள்ளார்.

இதையும் படிங்க: ரூ.3,108 கோடி பிரம்மாண்ட குடிநீர் திட்டம்... இன்று அடிக்கல் நாட்டும் சி.எம்.விஜய்... ‘ரிங் மெயின் சிஸ்டம்’ பற்றிய முழு விவரம் இதோ...!

இளைஞர்கள் கனவு காண வேண்டும், கடினமாக உழைக்க வேண்டும், நாட்டின் முன்னேற்றத்திற்குப் பங்களிக்க வேண்டும் என்ற அவரது வாழ்நாள் செய்தி, இன்றைய சூழலிலும் மிகுந்த பொருத்தமுடையதாக உள்ளது.தமிழகத்தின் மண்ணில் பிறந்த இந்த மகத்தான ஆளுமையின் நினைவைப் போற்றும் இந்த அஞ்சலி, அறிவியல் மனப்பான்மை, கல்வி மற்றும் தேசப்பற்று ஆகியவற்றின் முக்கியத்துவத்தை மீண்டும் வலியுறுத்துகிறது.

இதையும் படிங்க: அப்பாடா...!! - இனி சரசரவென ஏறும் கரண்ட் பில் பத்தி கவலையில்ல... விரைவில் வருகிறது புதிய APP...!!