தமிழக அரசியல் மற்றும் தமிழ் சினிமா வரலாற்றில் அரிதாக நிகழும் ஒரு சம்பவமாக, பதவியில் இருக்கும் முதல்வர் ஒருவர் நாயகனாக நடித்த திரைப்படம் 50 ஆண்டுகளுக்குப் பிறகு திரையரங்குகளில் வெளியாகியுள்ளது. தமிழக முதல்வராக பதவியேற்றுள்ள விஜய் நடித்த ‘ஜன நாயகன்’ திரைப்படம் இன்று தமிழகம் முழுவதும் சுமார் 1,000 திரைகளிலும், இந்தியா முழுவதும் 3,000-க்கும் மேற்பட்ட திரைகளிலும், உலகம் முழுவதும் 5,000-க்கும் அதிகமான திரைகளிலும் பிரம்மாண்டமாக வெளியிடப்பட்டுள்ளது.

இந்தப் படம் முதலில் இந்த ஆண்டு ஜனவரியில் வெளியாகும் என அறிவிக்கப்பட்டிருந்தது. ஆனால் சென்சார் சான்றிதழ் தொடர்பான சிக்கல்கள் மற்றும் அதைத் தொடர்ந்து ஏற்பட்ட சட்டப் பிரச்சினைகள் காரணமாக வெளியீடு தள்ளிப்போனது. நீண்டகால எதிர்பார்ப்புக்குப் பிறகு தற்போது படம் ரசிகர்களைச் சந்தித்துள்ளது.

தமிழக அரசியலில் இதற்கு முன்பு இதேபோன்ற வரலாறு 1977-ஆம் ஆண்டில் நிகழ்ந்தது. அப்போது முதல்வராக பொறுப்பேற்ற இரண்டு மாதங்களுக்குப் பிறகு எம்.ஜி.ஆர் நடித்த ‘மீனவ நண்பன்’ திரைப்படம் வெளியானது. அதன்பின் அவர் இயக்கி நடித்த ‘மதுரையை மீட்ட சுந்தரபாண்டியன்’ திரைப்படமும் முதல்வராக பதவியேற்ற ஆறு மாதங்களுக்குப் பிறகு திரைக்கு வந்தது. அந்த இரு படங்களின் தயாரிப்பு பணிகள் தேர்தலுக்கு முன்பே தொடங்கியிருந்தாலும், அன்றைய அரசியல் சூழ்நிலை காரணமாக வெளியீடு தாமதமானது.

இதையும் படிங்க: TITLE CARD-லயே BLAST-U..!! "CM ஜோசப் விஜய்"..! கொண்டாடி தீர்க்கும் ரசிகர்கள்..!

அதேபோல், ‘ஜன நாயகன்’ திரைப்படத்தின் பணிகளும் விஜய் அரசியலில் முழுமையாக களமிறங்குவதற்கு முன்பே தொடங்கப்பட்டதாக கூறப்படுகிறது. தற்போது அவர் முதல்வராக பதவியேற்ற இரண்டு மாதங்களுக்குள் படம் வெளியாகியிருப்பது அரசியல் மற்றும் திரையுலகில் பரபரப்பான விவாதமாக மாறியுள்ளது.

ஒரு நடிகராக விஜய் பேசிய கருத்துகளும், திரையில் வெளிப்படுத்திய சமூக மற்றும் அரசியல் எண்ணங்களும் மக்களிடம் பெரும் தாக்கத்தை ஏற்படுத்தியதாக அவரது ஆதரவாளர்கள் கூறுகின்றனர். அந்த வரவேற்பே தேர்தல் வெற்றிக்கும் காரணமாக அமைந்ததாகவும் அவர்கள் நம்புகின்றனர். இதனால் ‘ஜன நாயகன்’ திரைப்படத்திற்கும் ரசிகர்களிடையே மிகுந்த எதிர்பார்ப்பு நிலவுகிறது.

திரையரங்கு உரிமையாளர்கள் கூறுகையில், விஜய் முதல்வராக பதவியேற்ற பிறகு வெளியாகும் முதல் திரைப்படம் என்பதால் முதல் சில நாட்களில் பெரும் ரசிகர் கூட்டம் இருக்கும் என எதிர்பார்க்கப்படுவதாக தெரிவித்துள்ளனர். சினிமாவும் அரசியலும் இணையும் இந்த அரிய தருணம், தமிழக திரையுலகில் மீண்டும் ஒரு வரலாற்றுப் பக்கமாக பதிவாகியுள்ளது.

இதையும் படிங்க: தடைகளை கடந்தது திரையில் “ஜனநாயகன்”... தமிழகத்தில் 1000+ தியேட்டர்களில் விஜய் ரசிகர்கள் கொண்டாட்டம்...!