இஸ்லாம் சமயத்தைத் தழுவிய பிற்படுத்தப்பட்டோர் இடஒதுக்கீடு பெற முடியாது என்ற நிலைப்பாடு இந்திய அரசமைப்புச் சட்டத்திற்கு எதிரானது என்றும், மதம் மாறியவர்களின் இடஒதுக்கீட்டு உரிமையைப் பாதுகாக்க மத்திய அரசு உடனடியாகச் சட்டத்திருத்தம் கொண்டுவரத் தமிழ்நாடு அரசு உரிய அழுத்தம் தர வேண்டும் என்றும் இந்தியக் கம்யூனிஸ்ட் கட்சியின் தமிழ்நாடு மாநிலச் செயலாளர் மு. வீரபாண்டியன் வலியுறுத்தியுள்ளார்.
மதம் மாறிய பிற்படுத்தப்பட்ட வகுப்பினருக்கான இடஒதுக்கீடு உரிமை குறித்த விவாதங்கள் தீவிரமடைந்துள்ள நிலையில், இதுதொடர்பாக மு. வீரபாண்டியன் வெளியிட்டுள்ள அறிக்கையில் தெரிவித்திருப்பதாவது இஸ்லாம் மதம் மாறியவர்கள் இடஒதுக்கீடு கோர முடியாது என்ற தீர்ப்பு நமது அரசமைப்புச் சட்டத்தின் மாண்புகளுக்கு முற்றிலும் எதிரானதாகும். இந்திய அரசியல் சாசனம் என்பது சமூக மற்றும் கல்வி ரீதியில் பின்தங்கிய மக்களுக்கு இடஒதுக்கீடு வழங்குவதை முழுமையாக உறுதி செய்துள்ளது.
நமது நாட்டில் இடஒதுக்கீடு என்பது மதத்தின் அடிப்படையில் வழங்கப்படுவதல்ல; மாறாகச் சமூக ரீதியாகப் பின்தங்கியவர்கள் என்ற அடிப்படையிலேயே வழங்கப்பட்டு வருகிறது. சாதி அமைப்பின் பெயரால் வழிவழியாகக் குலத்தொழில் முறை கட்டாயமாக்கப்பட்டு, தலைமுறை தலைமுறையாக மக்கள் ஒடுக்கப்பட்டனர் என்பதே வரலாற்று உண்மை. மதம் மாறுவதால் இந்த வரலாற்றுச் சமூக ஒடுக்குமுறையும் பின்னடைவும் தானாக மறைந்துவிடுவதில்லை.
இதையும் படிங்க: இஸ்லாம் தழுவியவர்களுக்கு இடஒதுக்கீடு மறுப்பா?உச்சநீதிமன்றத்தில் சீராய்வு மனு தாக்கல் செய்ய கனிமொழி எம்.பி வலியுறுத்தல்!
எனவே, மதம் மாறிய விளிம்புநிலை மக்களின் இடஒதுக்கீட்டு உரிமையைப் பாதுகாப்பதற்குத் தேவையான சட்டத்திருத்தத்தை உடனடியாகக் கொண்டுவர வேண்டும். இந்த விவகாரத்தில் மத்திய அரசு உரிய சட்டத்திருத்தங்களை மேற்கொள்ளும் வகையில் தமிழ்நாடு அரசு வலுவாக வலியுறுத்த வேண்டும் என்று அவர் குறிப்பிட்டுள்ளார்.
சமூக நீதியை நிலைநாட்டவும், வரலாற்று ரீதியாகப் பாதிக்கப்பட்ட ஒடுக்கப்பட்ட மற்றும் பிற்படுத்தப்பட்ட மக்களின் உரிமைகளைப் பாதுகாக்கவும் அனைத்து ஜனநாயக சக்திகளும் ஒருங்கிணைந்து குரல் கொடுக்க வேண்டும் என்றும் அவர் தனது அறிக்கையில் சுட்டிக்காட்டியுள்ளார்.
இதையும் படிங்க: மதம் மாறியவர்களின் இடஒதுக்கீட்டை பறிப்பதா? சட்டத்திருத்தம் கோரும் மார்க்சிஸ்ட் கம்யூனிஸ்ட் கட்சி!